Diadomingo ultimo mediante un comunicado di prensa, abogado Lincoln Gomez a manda un carta abierto na Alto Comisario di Polis, Sr. Ramon Arnhem, cuestionando e tolerancia cu tin pa violacionnan di trafico cometi pa operadornan di UTV.
“Mi mag di haci un pregunta honesto – operadornan di UTV awendia tambe ta autorisa pa dirigi trafico?” Gomez ta puntra. “Mas y mas frecuentemente mi ta mira e vehiculonan aki, hopi biaha cu turista na stuur, no solo ta drenta y sali di rotonde sin señalisacion, pero hasta ta stop trafico y ta guia esaki comosifuera nan mes ta parti di cuerpo policial.”
Gomez ta continua: “Cu tur respet: esaki ta e intencion? Of regla di trafico y autoridad no ta aplica mas unabes cu un convoy di UTV ta bin cerca?”
“Mi ta haci e pregunta aki no djis pa curiosidad, sino pa preocupacion. Pa seguridad di nos usuarionan di caminda, pa confiansa den aplicacion di ley, y pa claridad tocante ken ta y no ta autorisa pa dirigi trafico. Ya mi a trece e asunto aki dilanti riba rednan social, pero desafortunadamente no tabatin respuesta. Pues e carta abierto aki – den speransa cu ta bay tin un respuesta, y riba tur cos, claridad.
“Pasobra si ta aplica regla di trafico selectivamente, nan ta perde nan poder.”
