Oduber: Cu hopi respet y atencion a atende puntonan den carta na gobernador

Segun Minister Otmar Oduber ta splica, diasabra a bolbe sinta como ministerraad y ainda mainta a combersa cu fraccion di AVP riba puntonan. Cu un minister a sali pafo y tabata pidi atencionnan necesario, mirando cu hopi biaha, ora tin hopi trabao ta tuma luga, e concentracion no por ta riba e puntonan cu bo ta trece dilanti y tin cu bisa cu den e simannan cu a pasa, a sinta, a refleha, a combersa riba e rumbo cu como organisacion politico, pasobra, naturalmente, como politico, cierto momento bo ta mira ki ora bo por score un poco, si bo ta opocision, si bo ta den gobierno tambe, con bo por crea e atencion ey pa bo haya e popularidad den gobernacion, segun 24ora.

Segun Sr. Oduber, loke a tuma luga durante e ultimo dos simannan aki, tabata un reflexion riba un trabao grandi cu a wordo haci durante seis aña, mira con pa continua y si tin base pa continua, si tin confiansa pa continua, si e idealnan por mira hunto por mira den e base y e idealismo aki y tin cu bisa cu despues di varios encuentro cu tabata tin, por a confirma y reconfirma, como organisacion politico, como politico, como profesional, cu tin un meta cu mester caba di cumpli cun’e. Y e meta ey ta loke a pone nan dilanti. Puntonan cu tabata di preocupacion, no solamente di Otmar. A percura pa cada un di nan y minister presidente, cual ta wordo gradici di curason, kende a duna atencion na e puntonan aki, cual ta puntonan fundamental y ora cu combersa hunto, ta realisa cu por ta no tur a pone e mesun peso riba e puntonan ey, pero tur tin’e como prioridad.

Cada un minister, caminda cu ta traha cu cosnan por bay un rato for di ruta, pero a sinta hunto, a papia riba e puntonan aki, no solamente a combersa riba nan, pero a pone accion tras di cada un di nan, a reconfirma esaki den conseho di minister, pa di e forma ey, tur minister y tur otro punto cu a bin riba mesa, caminda cu cada un di e puntonan aki lo percura pa hunto, cu un retreat, hunto cu pone prioridadnan pa e proximo dos añanan pa nos pais, por bisa e base solido, confiansa, cu ta traha pa e comunidad aki y pa cana bay dilanti. E siman aki a cuminsa cu un proceso hopi importante, presupuesto di pais Aruba cu lo cuminsa wordo trata diamars. Un proceso importante pasobra ta delinea un maneho. Puntonan importante cu a atende cun’e, lo wordo presenta tambe durante tratamento aki y cu conhuntamente, ta sali fortaleci, ta sali fuerte, cu un pensamento di por sigui guia e pais aki manera cu AVP semper a haci. Awe por bisa cu Oduber ta mas orguyoso cu nunca di e gobierno aki, e ta mas orguyoso cu nunca di e partido cu el a scoge pa inicia su carera politico y den cuadro di e confiansa, e base cu a wordo poni durante e ultimo simannan aki, tin tur intencion di mundo pa por cumpli cu e votadornan y e ciudadanonan ta pidi y esey ta loke ta bay haci conhuntamente, cu un ekipo di awo, ta bay bek na electorado y naturalmente busca e confiansa bek di nan na 2017.