E tema di finanzas publico ta uno di suma importancia pa loke ta trata maneho di gobierno nobo. Den nan Programa di Gobernacion Gabinete AVP-FUTURO ta brinda un vision riba puntonan importante pa logra mehora aspectonan esencial den loke ta trata finanzas publico di pais Aruba.

Pa e gobierno nobo maneho financiero lo bira e instrumento strategico pa e desaroyo inclusivo di Aruba. Dentro di e cuadro financiero y cu disciplina presupuestario, e stabilidad di un finanzas publico duradero ta necesario pa implementacion di maneho na bienestar di cada persona y hogar. Bienestar di cada persona y hogar ta keda e punto di salida y e meta principal di e gabinete.

Pa Gabinete AVP-FUTURO disciplina presupuestario ta encera traha hunto pa un miho calidad di bida pa generacion di awe y di futuro. Nan ta remarca cu implementacion di e maneho financiero strategico y responsable lo trece confiansa back den hogar nan y sector priva. E nivel di gasto operacional, di entrada y di inversion di Gobierno di Aruba tin e meta di facilita y stimula e desaroyo inclusivo di Aruba.

Dependencia di solamente un pilar economico, e gobierno ta enfatisa, ta un riesgo pa e e stabilidad di finanzas publico di Aruba. P’esey e maneho financiero di e gobierno nobo lo enfoca pa mantene e industria di turismo y alabes acelera e desaroyo di sectornan economico manera entre otro agricultura comercial, economia blauw, sector di tecnologia financiero, energia renovable y industria creativo.

Cumpli cu normanan di presupuesto ta keda necesario, pero uso di presupuesto di Pais Aruba na mehora poder di compra, stimula comercio y hisa calidad di bida riba tur tereno di desaroyo, ta pilarnan di e strategia inclusivo y meta pa un miho calidad di bida pa tur hende di Gabinete AVP-FUTURO.

“Implementacion di e maneho financiero lo tin como fundeshi stimula eficiencia y efectividad pa crea e espacio financiero riba presupuesto pa mehora e poder di compra, baha gastonan di haci negoshi, facilita e diversificacion di Aruba su economia y desaroyo inclusivo,” Gabinete AVP-FUTURO ta subraya,

Pa finanzas publico duradero gobierno tin tres punto di prioridad: lo cumpli cu normanan di presupuesto hancra den e Landsverordening Aruba Financieel Toezicht y lo keda continuamente trata na mehora e normanan den bienestar di finanzas publico di Aruba; normanan di presupuesto ta resultado di un maneho financiero responsable y duradero; pa crea e espacio financiero pa mehora poder di compra, inverti den baha costo di bida y costo di haci negoshi.

Gobierno lo evalua tur componente (entrada y gasto) di e presupuesto pa tin un bista completo di unda tin espacio pa mehoracion y unda por baha/subi esaki, y esaki ta inclui: haci uso di e modelo macro economico MARUBA pa e crecemento economico pa e presupuesto; haci uso di e koopkrachtmodel pa e impacto di maneho riba e poder di compra; haci uso di estadistica di e Sistema Nacional di Estadistica (National Statistitsch Systeem (NSS); traha un modelo pa finanzas publico cu link directo na e modelo macro economico MARUBA y e koopkrachtmodel; “meerjarenkader” mester ta un refleho realistico y prudente di e desaroyo economico; via e presupuesto, cu e espacio financiero, gradualmente lo mehora e poder di compra; pa baha costo di bida lo haci inversion cu lo baha e diferente componentenan di gasto manera coriente, awa, schoolgeld, busgeld y mas; y por ultimo lo implementa un “Koopkrachtplan” (Plan Poder di Compra) pa stimula na un manera structural e poder di compra di tur hende.

Pa loke ta gastonan di personal y con lo reduci esaki, Gabinete AVP- FUTURO lo tin 7 minister; e cantidad di personal na cada oficina di minister lo ta un maximo di 23 persona y di personal di Secretariado di Conseho di Minister lo ta un maximo di 32 persona; den caso di uso di financial lease pa un dienstwagen, e auto mester ta un EV y/of hibrido y un modelo na un prijs rasonabel; auto di trabou di minister no mag ta mas caro cu EV’s y/of hibrido na balor di Afl. 70.000; lo baha e presupuesto di biahe di trabou (dienstreizen) di gobierno cu 10%, y lo evalua cada peticion basa riba eficiencia y efectividad; y cada peticion pa biahe di trabou mester tin 3 oferta pa un camber of hotel y ta scoge esun mas economico.

Den e parti di gasto di producto y servicio, manera ya caba indica lo baha gasto di producto y servicio cu 10%; pa baha gasto di huur, electricidad, y centralisa e “inkoop” Gabinete AVP-FUTURO lo cluster departamentonan bou di respectivo ministerio y muda pa centro di Oranjestad como parti di revitalisa Oranjestad y lo procura pa inverti den panel solar pa baha gasto di utilidat; nan lo evalua pa reduci e suma presupuestario na inhuur deskundig advies via “Overeenkomst van Opdracht”. Resultado di e inhuur deskundig advies mester ta SMART (Specific, Measurable, Achievable, Relevant, and Time-Bound) defini y pa un periodo determina; y lo implementa e-Government pa tur hende tin acceso na ricibi un servicio eficiente cu e procesonan digitalisa.

Gasto di interes ta un di e puntonan di atencion. Manera ta conoci prome cu 1 di mei 2025 tin un Bestuurlijk Akkoord pa introduci un Rijkswet riba supervision financiero pa garantisa financiamento cu interes mas abou y logra reduci e peso di interes y prestamo. Pa Gabinete AVP-FUTURO exit clausule rasonabel mester ta parti di e Bestuurlijk Akkoord; nan lo trata na refinancia e suma total na PPP (Public Private Partnership) pa baha costo financiero di PPP’s, y lo trata na refinancia e resto di e debe nacional di Aruba via Hulanda.

Otro punto importante pa gobierno nobo ta mehora inversion publico. Pa baha e dependencia di entrada di impuesto riba e industria di turismo, Gabinete AVP-FUTURO lo inverti den diversifica e economia di Aruba y baha e costo di bida; ademas lo duna incentivo fiscal na inversion den sector di agricultura comercial, economia blauw, sector di tecnologia financiero, energia renovable y industria creativo; lo adapta e proceso di “Inversion di Capital” pa duna prioridad na inversion den sector di agricultura comercial, economia blauw, sector di tecnologia financiero, energia renovable y industria creativo; lo crea un fondo di inversion cu lo ricibi fondo via inversion di capital pa implementa e Agenda di Inversion den un presupuesto multianual.

Pa facilita y stimula crecemento economico, lo implementa un Agenda di Inversion. E Agenda di Inversion ta un plan multianual di inversionnan publico cu lo contribui na un minimo stipula di crecemento di Aruba su economia.

Lesa mas di Gabinete AVP-FUTURO su vision y plan di gobernacion pa finanzas publico den nos siguiente edicion di Bon Dia Aruba.