(AP)—Myrtle, un turtuga mascota hopi stima, a reuni cu su famia atrobe na Mississippi algun siman despues cu el a disparce durante un tornado mortal den luna di maart.
“El a pasa den hopi dificultad,” segun e doño agradecido di Myrtle, Tiffany Emanuel. “Mi sa cu e sa cu mi lo keda cune pa yud’e, cuide di dje, sigura pa e haya loke e mester, e ayudo cu e mester.”
E famia Emanuel a evacua for di nan cas den e area rural di Kokomo net prome cu un tornado a pasa den e area dia 15 di maart. Nan a regresa pa mira cu dos mata di pino a cay riba e cas di nan turtuga patras den cura. Y nan no por a haya Myrtle.
Algun siman despues, un bisiña a haya e turtuga herida. A hib’e na e Central Mississippi Turtle Rescue pa tratamento medico dia 14 di april.
“E señora cu a haya e turtuga a yama mi y a bisa cu el a topa e doñonan,” segun Christy Milbourne, e fundador y codirector di e organisacion. “El a bisa, ‘mi ta kere nan ta bay yama bo.’ Pues mi tabata hopi emociona, y despues e doñonan a yama y bisa, ‘Si, esey ta mi turtuga.’”
Emanuel ta cuidando Myrtle awor durante su recuperacion. “Mi ta sinti bon di tin algo bon sali for di algo terible cu a pasa, y despues di tanto perdida cu nos famia a haya,” Emanuel a bisa.
