(AP) – Exencion di tarifa anuncia diabierna riba electroniconan manera smartphone y laptop ta solamente temporario te ora cu e administracion di Trump desaroya un strategia di tarifa nobo pa e industria di semiconductor, U.S Commerce Secretary Howard Lutnick a bisa diadomingo.
“Nan ta exencion for di e tarifa reciproco pero nan ta inclui den e tarifa di semiconductor, cual ta biniendo den mas o menos 1 of 2 luna,” Lutnick a bisa ABC su “This Week”, diadomingo.
President Donald Trump a agrega na e confusion oranan despues, declarando riba rednan social cu no tin “exencion” en general pa motibo cu e articulonan ta “moviendo na un hemchi diferente y lo enfrenta un tarifa di 20% como parti di su administracion su accion pa castiga China pa su rol den trafico di fentanilo.”
E administracion di Trump fin di diabierna a bisa cu e lo exclui electroniconan for di tarifa mas amplio, e asina yama tarifa reciproco, un decision cu por yuda mantene prijs abao pa dispositivo cu tipicamente no ta traha na Merca. E decision ta anticipa di beneficia e companianan di tecnologia grandi manera Apple y Samsung y creadornan di chip manera Nvidia, aunke e incertidumbre di tarifanan den futuro por trece un rally den mercado di tecnologia riba dialuna.
U.S Customs and Border Protection a bisa cu cosnan manera smartphone, laptop, hard drive, monitor y algun chip lo cualifica pa e exencion. Mashin usa pa crea semiconductor ta exclui tambe. E ta nifica cu e no lo keda suheto na mayoria di e tarifa riba China of e tarifa base di 10% otro caminda.
Esaki ta e cambio den tarifa mas recien di e administracion di Trump, cual a haci varios cambio den su plan masivo di pone tarifa riba articulonan di mayoria pais. Lutnick su comentarionan diadomingo a laga cla cu mas cambio ta na caminda, incluyendo un politica specifico pa e industria di chip pa computer.
Riba Air Force One diasabra anochi, President Donald Trump a conta reporteronan cu e lo papia mas specifico tocante exencion dialuna. Den su publicacion diadomingo, riba TruthSocial, el a priminti cu e Cas Blanco ta “mantene bista riba semiconductor y henter e cadena di suministro pa electroniconan den e investigacion di National Security Tariff Investigations.”
Algun a asumi cu e exencion diabierna anochi a refleha e presidente su realisacion cu su tarifa contra China ta tiki probable di cambia na mas fabricacion di smartphone, computer y otro dispositivo na Merca pronto.
E administracion a pronostica cu e guera den mercado lo haci cu Apple lo crea su iPhone na Merca pa prome biaha, pero esaki ta tiki probable di pasa despues cu Apple a pasa decada creando un cadena sumamente calibra na China.
Ademas, e lo tuma varios aña y costa biyones di dollar pa crea planta nobo na Merca, y despues confronta Apple cu e forsanan economico cu lo triplifica e prijs di un iPhone, menasando cu e benta di e producto lo cay.
