Diabierna ultimo, Minister di Finanzas, Asunto Economico y Sector Primario a reuni cu Director di Departamento di Asunto Economico, Sra. Maria Dijkhoff-Pita y Presidente di Banco Central di Aruba, Sra. Jane Semeleer, tocante e desaroyonan politico na Merca. A discuti diferente topico pero specialmente e tarifanan di importacion cu Presidente Trump a anuncia pa diferente paisnan rond di mundo.
“Ta importante pa nos instancianan y Gobierno ta bon informa y bon prepara pa consecuencianan negativo cu e medidanan di Presidente Trump lo por tin pa nos economia”, segun Minister Geoffrey Wever, kende a puntra ambos instancia pa duna nan opinion tocante e posibel consecuencianan. Alabes, tambe a pidi ambos instancia pa asisti Gobierno den prepara un plan di accion pa mitiga e impactonan.
Na e momento aki ta premira cu prijs di producto Mericano lo tin un subida den e temporada binidero. Mirando cu Aruba ta importa hopi producto di Merca ta importante pa sigui explora otro mercadonan regional manera Colombia, Republica Dominicana, Surinam etc. Mester encurasha y sostene nos importadornan local pa por logra esaki. Ta importante pa sigui vigila e efectonan di e decisionnan di Presidente Trump riba e entrada di e poblacion Mericano, ya cu esaki tin un vinculo directo cu turismo.
Minister Wever a continua ta bisa: “E situacion ta cambia dia pa dia, manera nos expertonan tin un indicacion mas concreto di e posibel consecuencianan y solucionnan, mi lo presenta esaki na comunidad debidamente.”
Minister Wever ta gradici Sra. Dijkhoff y Sra. Semeleer y ta sigura cu manera tin mas claridad lo informa esaki debidamente na nos comunidad.
