Tras di guera economico… Tin otro mas menazante…

Den e guera economico cu gobierno Mericano a cuminza cu gran parti di mundo, nos a pasa di ‘never a dull day’ pa ‘never a dull hour’. E reaccion di mercadonan financiero na tur parti di mundo y e accionnan tuma pa e paisnan afecta cu tarifa halto di importacion ta sigui otro cu un velocidad impresionante. Consecuencia di esaki ta cu gobierno di Trump a decreta un pausa di 90 dia, aparentemente pa negocia cu varios pais un acuerdo. Pero tin algo mas tras di e maniobra spectacular aki. Tin otro desaroyo cu ta indica algo mas profundo y grave.

No por kere cu e gobierno aki a bin na mando pa cuminza un guera economico, djis pasobra mundo lo a trata Merca di manera inhusto. Loke ta tumando lugar ta mas bien un redefinicion di e reglanan di wega economico y politico, di acuerdo cu e papel cu e grupo na poder ta mira pa nan pais. Esey ta un manera di pensa basa riba un reparticion di mundo entre e actornan principal, unda Merca ta atende solamente nan ‘parti di mundo’ y no ta ‘hunga polis’ pa henter mundo mas. Y e pensamento ta pa logra esaki cu un reparticion di mundo entre e paisnan autocratico, cu pa por opera segun nan deseo ta opta pa no respeta e reglanan di wega economico y legal, estableci desde Segunda Guera Mundial. Den e guera economico e obhetivo ta pa logra somete mas tanto pais na acuerdo economico cu ta conveniente pa Merca, saliendo di e punto di vista cu e otronan no por gana e guera ey. Esey riba su mes caba ta un idea dudoso, pasobra como consecuencia di e accion Mericano por mira cu ta surgi un cantidad di iniciativa pa cooperacion economico (y militar), lagando Merca un banda. Claro cu lo tin pais cu no por opone e plannan Mericano y lo yega na acuerdo cu probablemente no ta asina positivo pa nan, pero e partinan fuerte, Union Europeo y Canada, e paisnan reuni den BRICS, no lo bay somete nan mes na deseo di Trump y no lo mester tampoco. Aki e ‘gamble’ di Trump ta bira bastante riesgoso, si e ta kere cu den e pausa anuncia di 90 dia e por negocia di manera exitoso pa su pais.

Pero tin algo mas cu ta lanta duda pa loke Trump kier logra. Parti di e aparente ideologia di e movimento Maga ta e pensamento cu Merca ta un pais cu por ta economicamente ‘autarquico’, nan no mester di otro pais. Esey ta un pensamento bastante absurdo pa un pais cu riba diferente tereno clave no ta autosuficiente y ademas nunca lo ta. Por ehemplo algun asunto basico pa cualkier pais, manera energia. Den circulonan conservador ta papia hopi di independencia energetico, pero esey ta leu di ta e realidad. Merca ta actualmente e productor mayor di crudo, alrededor di 13 miyon bari pa dia, pero ta consumi cerca di 20 miyon bari pa dia y ta depende di cumpra e diferencia. Ademas, e red di refineria ta parcialmente calibra pa procesa crudo pisa, loke Merca no ta produci. Ta pesey e importacion di crudo Canades y Mexicano ta asina importante, pasobra e casi 5 miyon bari pa dia di crudo pisa ey ta esencial pa un parti importante di refineria den Norte y na costa Mericano di Golfo di Mexico por opera. E pais no ta conta tampoco cu reserva proba grandi di petroleo y pa futuro lo depende cada vez mas di exterior. Tanto Canada como Mexico den e actual bochorno ta buscando contrato di suministro cu otro pais y ta logrando tambe, tanto cu Union Europeo como China y India. Esaki ta laga Merca cu e opcion di inverti den crudo Venezolano, pero Trump a caba di anula e permiso di Chevron pa produci y importa crudo Venezolano na Merca.

Merca no tin reserva grandi di hero y casi nada di bauxite pa produccion di aluminio. Tur obstaculo pa importacion di material industrial basico manera staal y aluminio, por ehemplo den forma di tarifa di importacion, no tin ningun sentido y ta significa un desbentaha grandi pa tur industria Mericano cu ta depende di e metalnan aki. Riba tereno di energia electrico ta mira e mesun situacion; Merca no ta produci suficiente electricidad y ta depende di Canada pa suministro di esaki. Riba esey e gobierno actual ta rechaza energia alternativo, pasobra den nan mundo no ta existi cambio di clima y otro fenomeno cu segun nan ta ‘invento di hende progresista’. Sigui den e rumbo di insisti den usa carbon y petroleo ta solamente aumenta e dependencia riba fuente di energia di exterior.

Naturalmente e movimento derechista aki tambe sa tur esaki. E idea tras di e anexacion di Canada y Groenland ta hustamente pa crea un pais enorme, cu recurso natural increible cu ta bay ta na nan disposicion como e elite dominante. Cu esey nan lo por competi cu Rusia y China, e dos actornan principal cu Trump y su banda ta mira como nan igual pa reparti mundo entre nan.

Tur esaki cu nan ta desea di logra ta supone un aspecto importante: somete nan propio pueblo na un regimen autocratico, pasobra cu e sistema democratico di tres poder autonomo, e modelo cu ta na bida ainda den e parti unda nos ta biba, nan no por realiza nan soñonan absurdo. Logra somete e otro paisnan ta keda un pregunta, logra caba cu democracia na Merca mes ta un bataya cu apenas a cuminza.