Den su Programa di Gobernacion 2025-2028 Gabinete AVP-FUTURO ta elabora riba puntonan di enfoke pa trece cambio y mehoracion den areanan cu mester di atencion. Un di e aspectonan clave pa pais Aruba ta un bon relacion den Reino y cu Europa. Den e programa di gobernacion Gabinete AVP-FUTURO ta trece dilanti algun punto importante pa fortalece e relacionnan aki.

Gobierno nobo ta indica cu Aruba su posicion den Reino Hulandes semper a genera oportunidad nobo di colaboracion y e oportunidadnan aki ta ofrece herment cu por ser usa pa logra un futuro sostenible y duradero pa tur ciudadano y Aruba.

Banda di e reforma y inversionnan di Landspakket, Gabinete AVP-FUTURO ta cla pa demostra cu Aruba ta un partner serio y confiabel den Reino y cu Aruba kier traha hunto cu tur otro pais den Reino pa asina aumenta e posibilidadnan di cooperacion cu Reino Hulandes ta ofrece.

Nan ta splica cu hunto cu minister di Asuntonan General, cu lo lidera e proceso aki, y minister di Finanzas, lo finalisa y formalisa e negociacionnan cu Hulanda pa refinancia e debe nacional cu Hulanda y otro debenan riba mercado internacional y despues inicia e dialogo cu Hulanda pa refinancia e obligacionnan di PPP (Public Private Partnership) y otro debenan di pais Aruba.

Gobierno lo reestablece tambe e cooperacion cu institucionnan Hulandes cu den pasado a duna resultado positivo pa Aruba y Reino riba diferente area; lo aumenta, den cooperacion cu Hulanda, e asistencia tecnico pa varios departamento di gobierno temporalmente; y

den cooperacion cu tur otro ministerio, lo coordina y agilisa e ehecucion di e programa di Landspakket y explora su expansion.

Banda di esey, Gabinete AVP-FUTURO lo inventarisa un lista di fondonan disponibel riba nivel di Reino y crea cooperacion cu otro islanan Hulandes pa cu intercambio di idea y conocemento pa participacion na e fondonan aki.

Como parti di esfuerso pa fortifica e relacion den Reino y cu Europa, gobierno lo crea tambe un team di experto pa desaroya capacidad na Aruba pa cu acceso na fondo Hulandes pa promove entre otro, desaroyo sostenible, educacion, industria creativo, agricultura y innovacion; y lo fortalece e cooperacion den Reino y riba nivel di municipio pa cu comercio, agricultura, salud, husticia (migracion), educacion, digitalisacion di procesonan, Union Europeo y e transicion di energia.

Ademas di esaki Gabinete AVP-FUTURO lo traha riba coordina participacion na misionnan comercial di Reino Hulandes hunto cu ministerio di Economia.

Otro punto cu ta forma parti di e programa di gobernacion ta pa expande presencia di Arubahuis, Aruba su minister plenipotenciario na Hulanda y e representacion di EU na Bruselas; y por ultimo lo structura e cooperacion cu e agencianan coordinador di Hulanda y di Bruselas pa haya acceso na fondonan Europeo.