(AP)—Diaranson, Ucrania a amplia su acusacion cu hopi ciudadano Chines ta bringando pa e ehercito di Rusia, y ta bisa cu nan a haya informacion detaya di inteligencia tocante mas di 150 mercenario cu Moscu supuestamente a recluta via red social. Na China, oficialnan a yama e acusacionnan aki “completamente sin base.”
E acusacion di Ucrania y e nengamento di China ta surgi mientras cu Merca ta purba logra un acuerdo di alto-el-fuego den e guera cu ta durando mas di tres aña caba. Diamars, presidente Ucraniano Volodymyr Zelenskyy a anuncia cu e ehercito di Ucrania a capta dos hende Chines cu tabata bringando hunto cu e ehercito Ruso riba tereno Ucraniano. Esaki tabata e prome biaha cu Ucrania a bisa algo tocante bringadornan Chines den e guera.
Diaranson, Zelenskyy a bisa cu e ta dispuesto pa haci un intercambio di dos prisonero di guera pa soldadnan Ucraniano cu ta den captura na Rusia. Sin mustra prueba, Zelenskyy a bisa cu oficialnan na Beijing ta consciente di e campaña Ruso pa recluta mercenarionan Chines. E no a bisa claramente si e gobierno Chines mes a autorisa e participacion di e bringadornan aki den Ucrania.
Zelenskyy a bisa cu Ucrania tin fam y dato di paspoort di 155 ciudadano Chines cu ta bringando pa e ehercito Ruso, y cu “nos ta kere tin hopi mas.” El a comparti cu periodistanan documentonan cu nomber, number di paspoort y otro detayenan personal di e supuesto reclutadonan Chines, incluyendo e fecha cu nan a yega na Rusia pa entrenamento militar y e fecha cu nan a sali pa completa nan servicio; AP no a verifica independiente e documentonan aki.
China a provee sosten diplomatico fuerte na Rusia desde cu el a lansa su invasion total riba Ucrania den februari 2022. China tambe a bende maquinaria y microelectronica cu por ser usa pa fabrica arma, segun oficialnan Occidental, y a yuda e economia di Rusia via comercio di energia y mercancia pa consumidor.
Oficialnan Mericano a acusa Iran di provee Rusia algun drone, mientras cu oficialnan Mericano y Sur Coreano ta bisa cu Corea di Nort a manda miles di trupa y municion pa yuda Rusia den e campo di bataya.
Cu Merca y Europa dunando gran sosten militar y diplomatico na Ucrania, e guera a bira pa un cierto grado un competencia entre e dos bloc di poder.
