Recientemente lider di fraccion PPA, Otmar Oduber, a manda un carta pa minister di Finanzas, Economia y Sector Primario, Geoffrey Wever, conforme articulo III.17 di Constitucion di Aruba y articulo 59 di Reglamento di Ordo di Parlamento di Aruba. Den e carta aki Oduber ta dirigi varios pregunta na e mandatario tocante e situacion geopolitico y e impacto di esaki riba Aruba.

Den e carta parlamentario Oduber ta menciona cu diaranson 2 di april 2025 presidente di Merca, Donald Trump, a anuncia cierto cambio pa loke ta trata nan “Tariffs plan”, cu a drenta na vigor desde 5 di april.

E ta señala cu segun Forum Economico Mundial (WEF), e cambionan aki tin implicacion severo mundialmente y por conduci na aumento di obstaculonan comercial y fragmentacion economico cu por conduci na un recesion mundial prolonga.

Oduber ta indica cu mester considera cu Gabinete AVP-FUTURO, pa medio di e Plan di Gobernacion 2025-2028, ta boga pa Aruba tin un crecemento y desaroyo economico inclusivo pa logra un reparticion mas husto di entrada y beneficio di e desaroyo economico di Aruba pa tur hende, locual ta forma e fundeshi di e maneho economico.

E lider di fraccion PPA ta trece dilanti cu den e programa di Entrevista di Dia na Hits 100FM dia 3 di april 2025 e representante di Comerciantenan Uni di Aruba (CUA) a declara cu e cambionan aki por nifica un aumento di prijs di importacion di productonan entre 5 pa 15%.

Den su carta Oduber ta remarca cu Aruba ta un isla cu ta depende casi completamente riba importacion di productonan esencial manera cuminda (comestibel), combustibel, productonan fabrica y otro productonan, door di cual e situacion aki lo tin un efecto grandi riba e prijsnan pa e negoshinan local y consecuentemente riba e consumidonan na Aruba.

Banda di esaki, el a agrega, tin e situacion di BBO na frontera y e aspecto acumulativo di BBO cu lo haci e situacion ainda mas grave.

Oduber ta subraya cu e cambionan aki, mas e situacion fiscal di Aruba lo tin un impacto negativo particularmente riba e costo di bida di e ciudadanonan. Adicionalmente el a indica cu hende di tur parti mundo por descurasha pa biaha internacionalmente y consecuentemente e situacion aki lo tin su efecto devastador riba e unico pilar economico di Aruba, cu ta turismo.

E parlamentario a splica cu Aruba su relacion di comercio cu Merca y Union Europeo ta crucial pa e pueblo Arubano, indicando na mesun momento cu minister Wever tambe ta di acuerdo cu e ponencia aki, y a subraya cu esaki ta nifica cu e cambionan imponi pa Merca por tin un repercusion significativo riba e comercio local.

“E desaroyo aki tin fraccion di PPA hopi preocupa ya cu e situacion geopolitico lo tin un resultado contradictorio y opuesto na e metanan economico stipula den e Programa di Gobernacion 2025-2028. Fraccion di PPA ta preocupa pasobra Merca cu ta un di e paisnan cu tin un rol sumamente importante y crucial pa loke ta trata turismo, inversion y comercio,” el a enfatisa

A base di e splicacion aki parlamentario Oduber a realisa un serie di pregunta na e ministernan di Gabinete AVP-FUTURO.

Oduber a puntra con Gobierno di Aruba, specialmente minister di Finanzas, Economia y Sector Primario ta anticipa, tocante e noticia di 2 di april 2025, e efecto cu esaki tin riba e costo di bida di e ciudadano en general y particularmente riba un posibel aumento di prijs riba productonan esencial, manera comestibel, combustibel y otro productonan, pero tambe posibel aumento di prijs riba servicionan, manera di awa y coriente.

E lider di fraccion PPA a puntra si Gobierno di Aruba tin informacion di e efectonan cu esaki por tin riba e economia di e paisnan cu ta importante pa Aruba su comercio, y tambe ki instrumento Gobierno di Aruba lo usa pa midi (investiga) e efectonan cu e implementacion, desde 5 di april 2025, di e “Tariffs plan” aki tin, riba costo di bida di e ciudadano (inflacion), impacto riba turismo y sector economico na Aruba, con y pa ki tempo lo haci esaki.

Ademas el a puntra ki instrumento Gobierno di Aruba lo usa pa midi (investiga) e efectonan cu e implementacion di e “Tariffs plan” aki tin riba e relacion di comercio entre Aruba y e partnernan principal di Union Europeo y Merca, con y pa ki tempo lo haci esaki.

Oduber ta señala cu si tene cuenta cu tur e te efectonan cu esaki por tin riba Aruba su economia y cu esaki por tin efectonan tambe riba otro sectornan manera salubridad publico, el a cuestiona ki estudio Gobierno di Aruba lo ehecuta pa sa ki efecto esaki lo por tin riba presupuesto di AZV y hospital y con lo atende cu e efecto aki.

El a puntra ki intervencion concreto Gobierno di Aruba ta considera pa efectua pa mitiga posibel aumento di costo riba importacion pa e negoshinan di Aruba y consecuentemente mitiga tambe e aumento di costo di bida pa e consumidornan.

E parlamentario a puntra e mandatario si Gobierno di Aruba tin, basa riba su investigacion, un plan di contingencia pa atende cu un posibel recesion mundial prolonga, con e plan aki lo sostene Aruba su economia en general, y con lo anda y mitiga posibel efecto negativo riba e entrada di pais Aruba calcula den e presupuesto 2025.

Ademas, el a puntra ki strategia Gobierno di Aruba lo implementa pa sigura stabilidad financiero enfrentando un volatilidad creciente den e economia global.

Parlamentario Oduber a puntra tambe si tene cuenta cu BBO na frontera y e parti acumulativo di BBO cu lo nifica aumento di e productonan y servicio na Aruba, ki plan di contingencia Gobierno di Aruba tin pa alivia un probable aumento di prijs di comestibel, combustibel, awa y coriente cu tin un influencia riba costo di bida.

Considerando Aruba su dependencia grandi riba turismo, e lider di fraccion PPA a puntra con Gobierno di Aruba lo atende cu e impacto di e recesion mundial prolonga y aumento di prijsnan local pa loke ta trata e sector turistico, y con gobierno ta anticipa pa mitiga e impacto riba turismo cu un recesion mundial prolonga lo tin den reduccion di biahamento internacional, posibel “layoffs” y reduccion di rutanan di aerolineanan.

E parlamentario a puntra e mandatario, como minister di Economia y Sector Primario, kico ta e plan di Gobierno di Aruba pa diversifica economia pa reduci e dependencia di importacion di productonan di afo y pa consecuentemente tin un economia resiliente y duradero.

Ademas el a puntra si considera cu Aruba ta parti di Reino Hulandes y ta parti di Union Europeo, kico Gobierno di Aruba ta bay haci pa sigura stabilidad den e relacion comercial entre Aruba y Union Europeo.

Oduber a indica cu posiblemente e comerciante y negoshinan local lo ser afecta negativamente pa e aumento di gasto di importacion y lo aumenta nan prijs. Den liña cu esaki el a puntra ki plan specifico Gobierno di Aruba tin pa proteha e consumidor contra esaki.

Por ultimo el a puntra, si tene cuenta cu pa hopi tempo caba kier habri e mercadonan den regional, por ehempel, for di Colombia y Costa Rica, kico ya e status pa importa comestibel for di region y ki dia lo duna inicio na dicho importacion.

Parlamentario Oduber ta spera, mirando e urgencia di e topico y e preocupacion di fraccion PPA pa cu e situacion aki, cu e lo ricibi contesta for di minister Wever mas pronto posibel.