E plan di gobernacion di Gabinete AVP-FUTURO ta consisti di 22 capitulo cu ta detaya e areanan cu mester di atencion durante periodo di gobernacion 2025-2028. E meta central y criterio final di e gobierno di coalicion AVP-FUTURO ta pa usa tur recurso cu e pais tin y por adkiri pa percura pa ehecucion di vision necesario riba termino largo y cu lo atencion na e retonan mas grandi pa cambia estado di e pais.

Un di e puntonan di atencion den e plan di gobernacion di Gabinete AVP-FUTURO ta pa mehora e relacion entre Gobierno di Aruba y Parlamento di Aruba, cu tin un rol central den funcionamento y toma di decision riba tur area di gobernacion di e pais. Pa gabinete nobo aki, e relacion di e gabinete di minister cu Parlamento di Aruba ta uno importante pa bon funcionamento di tur parti di gobernacion di e pais.

Den un esfuerso pa mehora y fortifica e bon relacion di gabinete AVP y FUTURO cu Parlamento di Aruba, nan lo hiba un maneho lo sostene y stimula e independencia di Parlamento for di gobierno of cualkier otro forsa of organo na Aruba of pafo di Aruba.

Esaki ta nifica entre otro cu gobierno lo haci tur cu ta posibel pa cumpli cu peticion pa informacion, documento y splicacion di plan y decision di ministernan den e tempo cu parlamento stipula; ministernan di gobierno di AVP-FUTURO lo presenta den parlamento riba un frecuencia regular manera lo ser acorda y na cualkier momento cu parlamento indica y acorda cu ministernan di gobierno di AVP-FUTURO; y lo acorda un agenda di tratamento di ley y otro tema den parlamento pa optimalisa e trabou di tanto gobierno como parlamento y duna mas transparencia na e trabou politico y di gobernacion na comunidad.

Otro punto di atencion di Gabinete AVP-FUTURO ta sector publico y bon gobernacion. Den e plan di gobernacion nan ta splica cu sector publico ta duna un cantidad di servicio esencial pa henter comunidad. Pa gobierno ta importante cu e forma con sector publico ta duna servicionan esencial y cumpli cu e necesidadnan di e comunidad ta basa riba transparencia y profesionalismo, algo cu na e momentonan aki e gabinete nobo ta mira mester mehoracion y lo ta un punto di prioridad di Gobierno di AVP-FUTURO.

Bon gobernacion ta un aspecto esencial pa e funcionamento di e estado di derecho y di democracia. Esaki, manera ya caba ambos partido di coalicion a indica, ta un punto importante pa e gobierno nobo. Nan ta remarca cu sin bon gobernacion, no por tin confiansa di pueblo den su representantenan y den servicio di sector publico.

Un proceso di tuma decision transparente y acceso pa tur hende na informacion ta esencial pa fortifica e estado di derecho. Pa gobierno di AVP-FUTURO ta primordial cu e manera con e aparato publico ta usa su poder, fondonan publico y ta duna acceso na servicionan publico ta transparente, comprensible, efectivo y husto semper.

“Gobierno den su totalidad mester actua semper integro, semper mester percura pa un trato corecto y husto di tur y semper mester actua basa riba nos leynan y e maneho aproba.”

Den e plan di gobernacion Gabinete AVP-FUTURO a establece e siguiente prioridadnan urgente cu lo guia e maneho di sector publico.

Primeramente lo duna dialogo base structural como forma democratico di gobernacion. Nan ta splica cu dialogo cu tur gremio, organisacion, fundacion y gruponan organisa den comunidad mester bolbe bira e forma mas importante di comunicacion directo y continuo entre gobierno y comunidad. Pa e motibo aki gobierno lo introduci foronan publico, “townhall meetings” y consultanan online, pa recoge sentimento, opinion y contribucion di publico riba proposicionnan di maneho y decisionnan importante.

E foronan publico aki mester ta facil pa atende y accesibel pa tur hende, pa haya opinionnan mas diverso y di mas tanto hende posibel. Nan ta remarca cu ta importante pa tur area y nivel di e comunidad, incluso hobennan, studiantenan den exterior, gruponan minoritario y gruponan vulnerable, ta envolvi den e dialogo continuo riba gobernacion di nos pais. Esaki lo haci e proceso di maneho nos pais mas inclusivo y mas representativo y cu e punto di bista y interes di tur ciudadano ta inclui den e proceso di tuma decision.

Gabinete AVP-FUTURO tin como meta garantisa bon gobernacion na tur nivel y den tur area di sector publico y semi-publico; habri vacaturanan den sector publico y semi-publico pa tur hende paden y pafo di sector publico; como tambe fiha normanan di transparencia den sector publico y hancra esakinan den ley. Esaki, nan ta subraya, lo obliga por ehempel instancianan gubernamental y semi-gubernamental pa publica decision y gastonan importante, incluso gastonan interno.

Un aspecto importante di transparencia ta accesibilidad na informacion. Pa gobierno ta importante pa pueblo tin acceso na informacion di gobernacion y di sector publico cu ta concreto y comprendibel, pa hende por tin confiansa den gobierno y pa stimula participacion activo di pueblo den gobernacion.

Den contexto di esaki instancianan publico lo raporta regularmente riba e proceso di ehecucion di nan maneho, gasto cu ta haci y resultado di nan maneho pa pueblo ta completamente na altura di con fondonan publico ta ser usa y kico ta e impacto di e maneho riba nan comunidad.

Den nan plan di gobernacion Gabinete AVP-FUTURO ta inclui e introduccion di un areglo legal y un programa di “klokkenluiders” como un punto esencial pa proteccion di esunnan concerni y pa por actua efectivamente riba señal y denuncia di actonan incorecto den sector publico.

E gobierno nobo ta inclui tambe e punto pa reenforsa e funcionamento di bezwaar advies cu LAR pa e por duna su conseho den e periodo stipula pa ley y asina sirbi comunidad cu apela decision di gobierno y tambe pa spaar gobierno gasto innecesario.

Gabinete AVP-FUTURO lo introduci un Ley di Archivo pa garantisa preservacion di documento oficial y pa promove distribucion di informacion y transparencia door di sigura cu tur documento ta registra, cataloga y accesibel pa comunidad.

Ademas gobierno nobo lo sostene y fortalece e funcionamento independiente di e Defensor di Pueblo (Ombudsman) y lo introduci un Ombudsman pa proteccion di derecho di mucha (Kinder Ombudsman).

Gobierno di AVP-FUTURO lo introduci un Codigo di Bon Gobernacion (Good Corporate Governance) y lo promove transparencia den dunamento di conseho y tumamento di decision door di procesa tur conseho y informacion cu haya di pueblo y compara esaki cu e decision y maneho final.

Otro punto cu ta inclui den e plan di gobernacion ta evaluacion di tur organo y instancia publico existente y nobo pa sigura claridad riba tarea y responsabilidad di tur instancia. Di e forma aki gobierno ta sigura cu tur persona y instancia ta duna cuenta di nan trabou y finanzas den sector publico. E meta di esaki ta pa crea un esfera di confiansa nobo den integridad di sector publico y relevancia di loke ta haci cu fondonan publico.

Durante e periodo di gobernacion lo percura pa henter sector publico, den su organisacion, su constelacion di personal, den su trabou y servicionan, ta liber di tur forma di discriminacion, influencia politico of economico indesea y tur forma di persecucion politico. Tambe lo evalua e organisacion y funcionamento di henter sector publico y semi-publico, incluyendo e reglanan vigente y areglonan di gasto, salario y beneficionan cu tin, pa elimina cualkier desigualdad y discrepancia den y entre departamento y servicionan;

Gobierno lo evalua e necesidad y relevancia di tur organo publico y semi-publico pa nan contribucion den sirbi interes general na e forma mas efectivo y eficiente y den crea un comunidad socialmente y economicamente mas husto y sostenibel.

Alabes lo stipula normanan financiero den presupuesto pa crea un pais socialmente y economicamente mas husto y sostenibel pa tur, pa controla gastonan di sector publico, semi-publico y instancianan cu ta haya subsidio di gobierno, y por ultimo lo stimula productividad y miho servicio den sector publico y semi-publico, manera por ehempel, fiha periodo maximo pa trata peticion of duna contesta riba pregunta.