Tabata april di 2020, 5 aña pasa, cu Bon Dia Aruba a publica un Editorial titula “Nos tin un… elephant in the room.” Den e Editorial aki a papia tocante e Ley di Salario Top (Landsverordening Normering Topinkomen, LNT) cu coloquialmente a bira conoci como e ‘Wever-Croes norm’ na Aruba. Den esaki, a conclui cu si mester calcula e beneficionan total di prome minister di Aruba, e compensacion cu directornan di companianan estatal ta ricibi no ta surpasa 130 porciento di e compensacion di e ministernan.
E tempo aya, Bon Dia Aruba a comenta riba e hecho cu Hulanda a usa e oportunidad presenta pa e prestamo den tempo di pandemia pa forsa Aruba pa haci e reformanan cu ya pa generacionnan Hulanda ta bin exigiendo pa Aruba haci, cu meta pa yuda Aruba yega na un presupuesto balansa y sostenible.
Pero algo cu ta destaca y cu a bira hopi relevante, ta e frase den Editorial: “No ta posible haci reduccion substancial di gasto den presupuesto di Aruba sin mishi cu e baca santo, cu ta e salario di ambtenaar y nos mandatarionan.”
Despues di e reduccion temporal di 12.6 porciento riba condicionnan di trabao pa empleadonan publico, e unico cambio structural introduci tempo di pandemia tabata e ‘Wever-Croes norm.’ Esaki ta dicta cu director di empresanan estatal no por tin salario y beneficionan secundario cu ta surpasa 130% di esun di minister president di Hulanda.
Sinembargo, manera Bon Dia Aruba a nota, “ora nos bay trata e beneficionan secundario di nos prome minister, nos no por keda sin mira e olifanti den e camber. Ministernan ta “bouw op” un “vol” pensioen den un periodo di 8 aña. Si bay cuantifica e prima di pensioen aki, lo yega na un suma astronomico di cienmiles di florin pa aña, riba e salario y otro beneficionan cu ministernan tin. Pues no keda sorprendi cu si haci e calculacion na Aruba riba e mesun base cu e norma Hulandes, cu ningun di e directornan di empresanan estatal lo tin salario y beneficionan secundario, superior na 130% di nos ministernan.”
“Un reforma di pensioen di empleadonan di gobierno y esun di nos gobernantenan lo reduci gasto di gobierno substancialmente y lo yuda enormemente pa nos por yega na un presupuesto sostenible. Gastonan di pensioen ta impagable! Nos no por sigui fia placa pa paga salario y pensioen di un happy few, sigui crea debe cu mester wordo paga for di belasting di esunnan sin un bon pensioen den sector priva. We cannot tax our way out of debts. Sector priva no por wanta esaki. ‘Cost of doing business’ na Aruba ya ta mucho halto. Ta inaceptable cu un grupo relativamente chiquito tin un pensioen asina riante y mayoria di pueblo trahador den sector priva no tin mas cu un miserable pensioen,” Bon Dia Aruba a conclui e tempo aya.
Decision den caso di directornan di Hospital contra LNT
Siman pasa, director Jacco Vroegop y CFO Gregory Croeze di Hospital Dr. Horacio Oduber a ricibi decision di hues den nan caso contra LNT, cu a cuminsa aña pasa.
Den su decision, corte a bisa cu e manera con a aplica e LNT den e caso di hospital no tabata corecto. Pero interesantemente, den su decision corte a indica cu no a haci e calculacion di e compensacion total di pensioen di prome minister corectamente, sino cu a laga afo e contribucion di doño di trabao di primanan social y otro beneficio, manera uso di auto di compania, y pues e salario top di e prome minister, cu a keda stipula na Afl. 329mil, no ta corecto. Y aki ta unda Bon Dia Aruba ta bolbe haya razon: es decir, cu si calcula e beneficionan total di e condicionnan di trabao, esta cu “ningun di e directornan di empresanan estatal lo tin salario y beneficionan secundario, superior na 130% di nos ministernan.”
