Diahuebs 27 di maart ex-Minister di Naturalesa, Ursell Arends a informa Natura Development N.V y nan team di abogado, GFC Attorneys & Consultants ariba nan obhecion ariba decision previo pa un ontheffings pa traha un beach otro banda di caminda di nan establecimento, Embassy Suites by Hilton.
Tanto nan obhecion, como nan peticion pa exoneracion adapta, ta wordo rechasa, teniendo na cuenta cu e argumentonan presenta den interes di Natura pa ricibi un exoneracion segun Natuurbeschermingsverordening no ta mas importante cu e interes pa proteha e flora y fauna proteha cu ta presente den e area.
Un decision cu ta refleha e mesun compromiso cu a inspira un movemento politico ariba henter un isla.
Na final di su periodo como minister, Arends a wordo confronta cu un decision crucial: Natura Development N.V. a presenta un peticion pa desaroya un beach den un area identifica cu e potencial di ta un santuario marino dilanti di Embassy Suites. Un zona fragil, rico den biodiversidad y hogar pa yerba marino, coral y animalnan marino proteha.
Dia 26 di februari 2025 hues a ordena cu Minister mester tuma un decision nobo dentro di tres luna teniendo na cuenta cu loke hues a bisa den su decision. Despues di un analisis cuidadosamente di hues su uitspraak, informacion cientifico, diferente rapport ecologico y expertonan, incluyendo esnan di Aruba Conservation Foundation y Directie Natuur en Milieu, a keda demostra cu otorga e exoneracion (ontheffing) lo trece daño permanente na un ecosistema di gran balor.
E zona den cuestion ta forma parti di un habitat fragil cu tin varios especie nativo proteha, manera Yerba di caña (Thalassia testudinum), Fofoti (Conocarpus erectus), Cadushi (Stenocereus griseus), y tambe animalnan marino manera coral, calco, kreef, y turtuga di lama (Hawksbill Turtle).
Segun un publicacion riba su pagina di Facebook, en bes di dobla pa presion di inversionistanan, Arends a laga su liderazgo como voz di naturalesa prevalece. A opta pa loke hopi hende kier pero poco tin curashi pa defende: proteccion di nos naturalesa, incluso si e no ta popular of conveni politicamente.
Un di e rapport mas fuerte, prepara pa Aruba Conservation Foundation, ta bisa claramente:
“E area marino dilanti di Hilton Embassy Suites ta probablemente e ultimo seccion sin disturbio di costa west di Aruba. Cualkier desaroyo aki lo elimina tur biodiversidad den e zona.”
Arends ta enfatisa: “E balor ecologico y cultural di e area ta supera e interes di desaroyo. Proteha nos mangel di lama, yerba marino y coral ta un deber legal y moral pa e generacionnan di futuro. E lucha pa naturalesa no ta un trend pa pone den programa di partidonan, pa programa di gobernacion, sino un necesidad.”
Den su carta Arends ta referi tambe na un area alternativo cu ta yama Juanita Beach, cu Natura Development N.V. ya ta uzando pa ofrece facilidadnan di beach sin pone presion riba un habitat sensitivo.
E decision ta reforsa e maneho di ontheffingsbeleid stricto cu e ministerio a bin ta implementa, cu solamente ta permiti exoneracionnan bou di condicionnan specifico relaciona cu siguridad publico, investigacion cientifico y sin pone na peliger e structuranan ecologico. Den e caso aki, ningun di e criterio no a wordo cumpli door di Natura Development N.V. Natura Development N.V. tin derecho pa apela e decision den un termino di 6 siman na Gerecht.
RAIZ ta orguyoso di e acto final di su lider den gobierno, un decision cu ta afirma kico e partido ta y a bin ta representa: gobernacion a base di balor, proteccion di naturalesa y datos como evidencia. “Papia di Naturalesa no ta suficiente, pa Naturalesa bo tin cu actua na su defensa!” tabata palabranan di lider di Raiz.
