Realmente nos no a mira comentario cu e Promer Ministro nobo a asumi tambe responsabilidad pa e cartera di Naturaleza y Medio Ambiente. Talvez nos a custumbra caba cu e promer mandatario di e pais ta tuma un cartera hopi amplio, incluyendo tarea cu den pasado tabata pertenece semper na un otro ministerio. Den e caso di e anterior gabinete esey tabata debi na e problemanan cu tabatin den nan seno, cu e resultado cu e cartera di infrastructura y planificacion a bay pa e premier, den un claro gesto cu na e momento ey esey lo tabata e garantia di no mas incidente den sentido di corupcion. Obviamente esey no a yuda pasobra e directora interino di su escogencia a haya su mes den problema cu husticia tambe.
E caso actual ta parce nos diferente y nos no ta mira pakico Naturaleza y Medio Ambiente no a bay por ehemplo pa e mandatario cu ta maneha infrastructura den e gabinete actual. di tur manera e promer mandatario ta cubri un gama extenso di departamento y servicio, cu normalmente ta mas cu suficiente pa yena su orario. Mester supone cu na e momento aki ta considera naturaleza y medio ambiente asina urgente cu a opta pa mantene esaki den man di e promer mandatario? En todo caso, mas cu suficiente trabao pa haci. Por ehemplo, na Sero Colorado e conservacion di e area alrededor di e hotel nobo ta algo pa vigila bon, mirando e tendencia semper di proyectonan pa extende nan actividad den nan alrededor. Tambe tin cierto areanan for di costa, unda tin colonia di pahra cu mester proteccion y cu por bay keda afecta si turismo den e zona ta trece demasiado trafico di boto cune. Nos sa cu e tema aki pa un motibo of otro no a bin dilanti den discusion publico, pero semper tin tempo pa un promer biaha.
E asunto cu realmente lo exigi hopi atencion ta e rehabilitacion di e tereno di refineria, unda finalmente nos ta keda confronta cu e consecuencia di casi un siglo di industria petrolero cu un mero minimo na regulacion ambiental. Y awor cu e realidad cu comunidad mes lo mester paga pa deshaci di tur desperdicio industrial cu a acumula den tanto aña. Ta obvio caba cu no tin posibilidad pa deshaci di e instalacionnan sin envolve un empresa specializa. Esaki por conduci na un convenio cu un empresa cu ta haci e demolicion y ta hiba e material como compensacion pa por lo menos un parti di e gastonan di demolicion. Despues di desmantela henter e construccion ta bin e tarea di limpieza di e suelo y subsuelo contamina, cu ta otro trabao specializa cu ta requeri intervencion di experticio di exterior. Ta dificil pa bisa di antemano kico ta bay topa y sigur cuanto tur esaki ta bay costa. Finalmente, esaki ta un proyecto cu lo tuma por lo menos algun aña pa planifica y ehecuta.
Otro asunto importante ta e problema di desperdicio, cu mientras tanto no ta solamente e situacion na Parkietenbos, sino tambe di Sero Teishi, ademas di e cincuenta o mas depositonan ilegal di sushi plama riba henter nos isla. For di e plan gubernamental por comprende cu e intencion ta pa recicla mas tanto posible tur material cu por, pa despues pasa pa incineracion di loke keda. Esey ta trece nos atrobe na e tema di un incinerador, cu no mester hiba nos na e mesun debate di tanto aña pasa, cu e perspectiva di un incinerador di tal tamaño cu dado momento mester importa desperdicio pa mantene e proceso di incineracion andando. Nos no a mira detaye ainda tocante un combinacion di incinerador y probecho di e energia genera pa produccion di electricidad, y lo ta pendiente pa mas detaye den esaki. Te awe ainda Aruba no ta parce di ta cla pa introduci separacion di desperdicio na cas of empresa caba, pa facilita e proceso (costoso) di purba haci separacion una vez cu e desperdicio yega na su destino completamente bruha, manera ta e situacion te awe. Mirando e experiencia na otro pais e separacion na cas o empresa a lo largo lo bira un opcion inevitable.
Efecto di cambio di clima riba nos naturaleza, y sigur riba bida den nos awanan teritorial y e zona economico exlusivo ta un tema importante, aunke di otro indole den e sentido cu loke por haci pa detene e proceso aki ta bastante limita. Na varios pais por observa e problemanan cu tin cu efecto negativo di aumento di temperatura di awa di lama, cu consecuencia grandi pa por ehemplo coral y otro bida marino. Nos impresion ta cu te awe ta haya falta di e base minimo cientifico cu nos mester pa por analiza y evalua loke ta tumando lugar den e area marino pa cual nos ta responsable. Un posible solucion lo ta busca cooperacion cu otro pais den nos region cu ta mihor equipa y cu mas experiencia riba e tereno aki. Esaki ta conta tambe pa e tareanan riba tera mes, unda tambe e impresion ta cu nos ta scucha regularmente comentario di loke ta andando, pero no ta mira trabao ni tampoco e colaboracion cu instancia den exterior, si nos mes no ta bay tin e recursonan pa yuda nos mes. En todo caso, segun nos opinion e tempo a yega pa no bay congreso y seminario so, pero mester por cuminza mira e trabaonan cu ta necesario pa nos por avanza. Otro area unda faboritismo politico no tin lugar.
