Hues a dicta sentencia y a ordena Benny Sevinger paga 840 mil florin back na Pais Aruba

Diahuebs mainta hues di Corte di Prome Instancia di Aruba a dicta sentencia den e caso di expropiacion di e ex minister y parlamentario Benny Sevinger. A pesar di peticion di abogado di Sevinger pa warda riba e veredicto di Casacion den caso Avestruz, hues a dicta sentencia cu Sevinger mester paga 840.051,91 florin back na pais Aruba.

Manera ta conoci ex minister y parlamentario Benny Sevinger, ken ta sospechoso principal den e caso penal Avestruz, a keda condena dia 14 di april 2023 pa soborno pasivo y malversacion. Sevinger y su ekipo a apela e sentencia aki.

Siguiendo e caso penal, Ministerio Publico (OM) a ordena Sevinger pa paga un suma di placa na Pais Aruba pa privacion di beneficio obteni ilegalmente, calcula na un suma di Afl. 914.651,72.

Den e tratamento di e caso penal Avestruz den Corte di Apelacion Sevinger a keda sentencia dia 12 di juli 2024 pa complicidad den fraude, soborno pasivo, abuso di funcion y malversacion. E sentencia aki tambe Sevinger y su team a apela den Corte di Casacion y ta den e proceso aki actualmente.

Abogado di Sevinger a entrega demanda indicando cu e caso di expropiacion no ta admisibel pa motibo cu caso penal Avestruz ainda ta den proceso di apelacion den Corte di Casacion, y pues a pidi pa warda riba e sentencia di Casacion. Hues a rechasa e demanda aki indicando cu Ley di Aruba ta permiti trata e caso di expropiacion sin cu mester warda riba sentencia di Corte di Casacion.

Ministerio Publico a basa e calculacion di e ganashi ilegalmente obteni riba un rapport di confiscacion cu a ser elabora despues di un investigacion financiero (y e proceso-verbal di hayasgo y documentonan relaciona) riba e entrada y gasto di Sevinger y su casa, cu segun corte tambe mester ser considera manera un unidad economico.

Den e rapport di confiscacion, dos metodo a ser usa pa calcula e ganashi ilegalmente obteni: e kasopstelling simpel y e metodo di transaccion.

E kasopstelling simpel ta un metodo di calculacion caminda den comparacion di gasto cash cu ingreso cash legal ta deduci cual cantidad e persona a obtene di entrada no splica. E base ta e saldo di inicio den e investigacion. Esaki ta inclui ingreso legal cu a ser suma y di eynan e placa cash cu a ser haya na final di e periodo di investigacion ta ser deduci. Despues e gasto real ta ser suma. E resultado di e kasopstelling ta e capital no splica.

E di dos metodo cu a ser usa den e rapport di confiscacion, ta e metodo di transaccion. Pa esaki, ta investiga ki ganashi e persona a obtene den e caso concreto pa medio di e delito cu el a ser condena p’e, of pa otro delito cu tin suficiente indicacion cu e persona ta e autor, caminda e hues mester responde si fuera di duda rasonabel, por a determina cu e persona a comete esaki.

Corte ta evalua e ganashi ilegalmente obteni segun e kasopstelling y e metodo di transaccion. E decision di corte ta basa riba e hecho cu Hof a comproba den su sentencia, e pruebanan cu ta subyace na nan y den e rapport di confiscacion, mas specificamente tambe e hecho y circunstancianan menciona den e notanan di e decision di confiscacion aki cu e pruebanan menciona ta contene.

E postura di defensa cu e rapport di confiscacion no ta cumpli como unico medio di prueba, ta ser desecha. Na principio, no tin ningun regla legal cu ta prohibi di basa e calculacion di ganashi ilegalmente obteni unicamente riba un rapport.

Hues a dicta cu e suma di e beneficio ilegalmente obteni door di Sevinger ta ser calcula na Afl. 840.051,91, suma cu e tin cu paga back na Pais Aruba. Y den caso cu no cumpli cu pago di e suma aki lo aplica detencion sustitutivo pa un duracion di 900 dia.

Na salida for di corte den su declaracion na prensa Sevinger a confirma cu e ta bay apela e veredicto di hues. El a indica cu ta trata di un persecucion politico cu ta cuminsa cu e caso penal Avestruz, cu ta den Casacion na e momentonan aki. “Mi por bisa bo cu hopi speransa cu nos ta gana e casacion ey y e caso ta ser destrui of e ta bay back Hof cu consecuentemente esun aki tambe lo cay afo. Esey ta e trayecto cu nos ta mirando na e momentonan aki,” el a expresa.

Sevinger a indica cu desde momento cu el a tuma nota di e acusacion di OM cu e lo a ricibi riba 900 mil florin di manera ilegal, el a mira cu e ta bringa un instancia cu 100% poder y cu, for di su punto di bista, ta mal usa e poder ey.

El a splica cu el a cuestiona OM di un a saca e suma di riba 900 mil florin, na cual a indica cu e ta basa riba taxatie di su cas. El a sigura cu e mes a traha su cas prome cu el a drenta politica y durante su tempo como funcionario publico el a expande su cas y p’esey e balor di e cas a aumenta.

“Mi tin fe cu e berdad algun dia ta sali na cla y un cos mi por bisa, contrincantenan politico cu ta usa Ministerio Publico, y Ministerio Publico ta laga nan usa nan, pa schakel uit un otro politico, un contrincante den nan opinion, mi ta kere cu ta un pregunta cu nos tur como ciudadano tin cu para un rato keto y mira si nos ta keda permiti esaki y e ora ey nos tur lo ta suheto na loke Ministerio Publico of e grupo ey cu ta den poder, cu ta usa e poder y cu no tin niun hende pa para nan. Pero atrobe ami tin fe cu nos lo gana den Casacion… ,” el a remarca.

Manera ya caba menciona e veredicto di hues ta cu Sevinger mester paga back 840 mil florin, cual el a sigur e no tin y a indica cu OM sa cu e no tin e placa ey placa ey tampoco. Nan sa tur mi storia, cuanto placa mi tabatin dia mi a bira parlamentario, cuanto placa mi a sali cune ora mi tabata minister y e suma ey practicamente ta cero, nan sa masha bon cu mi no tin e placa ey, cu nunca mi a haya e placa ey for di ningun hende,” el a enfatisa.