(AP)—E guera comercial cu presidente Mericano Donald Trump a priminti a cuminsa, algo cu ta menasando e economia mundial y ta poniendo presion riba e aliansa tradicional di Merca cu Europa y Asia.
Productonan importa for di decenas pais y teritorio lo bay haya impuesto cu tarifa mas halto, y esaki ta anticipa pa subi e costo di tur cos, for di auto te paña y computer. E tarifanan aki – cual por yega te 50% – ta diseña pa castiga paisnan cu, segun Trump, ta pone obstaculonan inhusto pa limita exportacion Mericano y ta causa un deficit grandi den comercio pa Merca.
Hasta paisnan unda Merca ta disfruta di un surplus – cual ta nifica cu Merca ta bende mas cu ta cumpra, manera Reino Uni y Argentina – ta ser afecta tambe cu un tarifa minimo di 10%. E tarifa mas halto a ser imponi riba dos teritorio chikito cu no tin hopi comercio cu Merca — e reino Africano di Lesoto y teritorio Frances di Saint Pierre y Miquelon na costa Atlantico di Canada.
Mercadonan financiero mundial a reacciona fuertemente diahuebs. Na Wall Street, e averahe industrial di Dow Jones a baha cu 1.679 punto, casi 4%, y e dollar Mericano a perde balor contra otro moneda importante – un señal cu inversionistanan ta preocupa tocante e economia Mericano.
“Esaki ta un cambio di regla total, no solomente pa e economia Mericano pero pa economianan rond mundo,” segun Olu Sonola, hefe di investigacion economico pa Fitch Ratings. “Hopi pais lo probablemente drenta den recesion. Bo por tira mayoria pronosticonan na banda, si e tarifanan keda na e nivel aki pa un periodo largo.”
Tarifanan por daña e economia Mericano y mundial
Segun Yale Budget Lab, e tarifanan cu Trump a impone pa 2025 lo costa e pueblo Mericano 3.800 dollar pa aña, aumentando prijs pa consumidor cu 2.3% den corto plaso.
E tarifanan cu el a anuncia durante “Dia di Liberacion” so a causa un aumento di 1.3% den prijsnan – loke ta representa un impuesto di 2.100 dollar pa cada cas. Prijsnan di paña lo subi cu 17% pa motibo di tarifanan mas halto riba textiel for di Sudeste Asia y Bangladesh.
E laboratorio ta bisa cu e tarifanan di Trump lo reduci e crecemento economico di Merca – cual tabata 2.8% den 2024 – cu 0.9 punto porcentual e aña aki.
E daño no lo keda limita pa Merca. Europa, Sudeste Asia y China tambe lo sinti e impacto. “Nos por spera cu crecemento economico mundial lo cay duro, mientras comercio ta baha, prijsnan ta subi y negoshinan ta atrasa nan inversion,” segun Wendy Cutler, ex-funcionario di comercio Mericano y awor vice-presidente na Asia Society Policy Institute.
Trump ta atacando aliadonan y paisnan pober tambe
Den e tarifanan reciproco y basico, Trump a impone tarifanan riba aliado, adversario, paisnan rico y pober, como tambe paisnan cu ta habri of cera pa exportacion di Merca.
Hasta Singapore, cual ta considera como un di e economianan mas habri pa comercio, a haya impuesto di 10% tarifa, contrario cu loke Trump ta declara tocante balansando politica proteccionista di paisnan, segun Scott Lincicome, analista di comercio di Cato Institute.
“Esaki no ta reciproco por nada,” Lincicome a bisa. “Pa realmente compronde e obstaculonan stranhero den comercio y su impacto riba cifranan comercial Mericano, lo tin mester investigacion largo cu por dura lunas of añas…nan por a wel di saca e cifranan for di un sombre.”
Taiwan, un aliado di Merca, ta enfrentando un tarifa di 32%, cual no ta hopi abao compara cu esun di China cu ta 34%.
Paisnan pober tambe ta sinti e golpi mas fuerte di e tarifanan mas severo di Trump.
Lesoto, un pais chikito rondona pa Sur Africa, a ricibi un tarifa reciproco di 50%, aunke su produccion anual per persona ta bao di 2.900 dollar (compara cu 76.200 dollar pa Merca).
Cambodia, cu su ingreso anual per persona na mas o menos 7.200 dollar, ta haya impuesto di un tarifa di 49%. Segun e Cas Blanco, esaki ta parcialmente pa motibo cu Cambodia a ser usa como un via pa manda productonan Chines pa Merca pa evita tarifanan riba China.
Canada y Mexico a haya menos golpi cu loke a anticipa
E politica di comercio di Trump dirigi pa su bisiñanan panort y pazuid tabata inconstante. El a anuncia dos biaha, y despues suspende of suavisa tarifanan di 25% riba productonan di Canada y Mexico, supuestamente pa pone nan combati mas fuerte e entrada di fentanilo y inmigracion ilegal na Merca.
Luna pasa, Trump a suspende e 25% tarifa riba productonan di Canada y Mexico cu ta cumpli cu e US-Mexico Canada Agreement (USMCA), un acuerdo di comercio cu el a negocia durante su prome termino como presidente. diahuebs, e Cas Blanco a bisa cu importacionnan cu ta cumpli cu USMCA por sigui drenta Merca sin paga tarifa.
Un bes cu e dos pais cumpli cu e exigencianan di Trump tocante inmigracion y droga, e tarifanan riba e resto di nan importacion lo baha di 25% pa 12%, e Cas Blanco a bisa. “E victoria mas grandi tabata Canada y Mexico,” segun Neil Shearing y Paul Ashworth di Capital Economics a comenta.
