Manera ta conoci diabierna ultimo Parlamento di Aruba a aproba presupuesto nacional 2025 di forma unanime. Ministernan di e gabinete nobo, Gabinete AVP-FUTURO, cu recien a huramenta e mesun diabierna mainta, a contesta preguntanan di parlamentarionan tocante e presupuesto, enfocando riba e nota di cambio cu nan a entrega.

Minister di Finanzas, Economia y Sector Primario, Geoffrey Wever, a ricibi pregunta kico ta e posicion di partido AVP y FUTURO riba e Rijkswet. Contestando pa partido Futuro, e mandatario a splica cu nan ta di acuerdo pa bin cu un Rijkswet riba supervision financiero y ta parti di locual e partido a trece dilanti den campaña.

El a indica cu nan ta na altura di e deadline di 1 di mei 2025 y kico e consecuencianan ta si pais Aruba no bay di acuerdo cu e Rijkswet. Na mesun momento el a remarca cu na e momento aki e consecuencianan lo ta demasiado devastador financieramente si no acepta e Rijkswet prome cu 1 di mei 2025.

“Ta necesario pa crea espacio pa por duna back y e intencion di e setup di Rijkswet y tambe CAft ta cu a lo largo nan ta ‘phase out’ y esey ta algo cu mi ta kere nos mester tene nos dilanti, cu esaki ta algo temporario, pa nos por yega na reduccion substancial di e interes riba nos debe nacional. Na e momento aki ta e prestamo di covid y tambe e posibilidad pa refinancia e parti cu ta financia riba mercado internacional na Merca, pero ainda tambe tin e parti domestico, tin e obligacionnan di PPP y tur esaki ta oportunidadnan cu den un Rijkswet por busca financiamento pa reduci ainda mas nos gasto di interes,” el a splica.

Contestando pregunta tocante e aumento di prijs di gas, con lo mitiga esaki y kico ta e timeline, e mandatario a indica cu manera ya el a splica na algun ocasion tambe den e constelacion anterior den Conseho di Minister, pa por haci esaki a pidi consehonan, consehonan ta ser duna y ta rekeri un elaboracion mas amplio.

El a indica cu e ta den preparacion y kisas den e prome presupuesto complementario por bin cu un elaboracion mas detaya di esey. El a menciona cu tambe mester corda cu entrante 1 di mei a percura pa un reduccion di accijns cu 10 cen cu ta lo tin un impacto inflatorio positivo mas grandi pa e consumidor cu locual tabata e aumento di gas.

Minister di Husticia, Integracion y Transporte Publico, Arthur Dowers, a ricibi algun pregunta por escrito di parlamentario y lider di fraccion PPA Otmar Oduber, cual el a indica e lo contesta detayadamente por escrito durante siman, pero a duna un contesta chikito toch durante e reunion publico.

Pa loke ta trata nombramento di un comandante nobo pa Brandweer Aruba, minister Dowers a splica cu proceso ey ainda no a cuminsa ya cu tin un caso den apelacion ainda di e comandante actual. “No ta asina cu gobierno tin e libertad completo pa nombra hende eynan na e momentonan aki,” el a indica.

E parlamentario a puntra tambe si e mandatario por confirma si normanan ta ser cumpli door di Brandweer, na cual el a contesta cu esey no ta e caso na e momento aki. El a splica cu ta haciendo esfuersonan grandi na e momentonan aki pa yega na e materialnan cu mester yega na dje pa por cumpli, sinembargo na e momento aki nan no ta cumpli completamente cu e standardnan.

El a agrega cu pa loke ta trata e training di personal, e estado di e edificio y facilidadnan di Brandweer no ta completamente optimal na e momento aki pa garantisa cu ta cumpli cu e norma cu mester cumpli cune.

Contestando e pregunta si tabatin palabracion of negociacion cu aeropuerto pa pasa e facilidad aki pa aeropuerto, e mandatario a indica cu den pasado tempo su mes tabata minister e combersacionnan aki a tuma luga, sinembargo no a sigui cu esakinan y na e momentonan aki tampoco tin combersacion andando pa pasa Brandweer pa aeropuerto, pero ta combersacionnan cu e ta haya interesante pa hiba.

“Lo ta interesante pa bay hiba combersacion den futuro pa mira con bini cu un sosten mas grandi pasobra tin hopi medio ta bini di e departamento aki, un departamento di gobierno. Pero mi ta kere ta importante pa percura cu e servicio di Brandweer na aeropuerto ta optimal pasobra e ta garantisa e nivel di e aeropuerto y e entrada principal di pais,” minister Dowers a bisa.

Minister di Turismo, Labor y Transporte, Wendrick Cicilia a ricibi un pregunta di parti di parlamentario Evelyn Wever-Croes ken a puntra kico ta e mandatario su opinion riba e ley di aumento di minimumuurloon.

Minister Cicilia a splica cu riba su mes ta un ley cu ya caba ta na Parlamento di Aruba. El a sigui splica cu ya tabatin diferente deliberacion pa cu esaki y como minister di Labor ta importante, prome cu e por duna un opinion riba esaki, pa e ta bon informa.

“Den cuadro di nos funcion, bay den dialogo y consulta cu esnan envolvi, e sector economico, comercial, esnan cu ta representa diferente bienestar cu ta tras di e ley aki, pa nos por hiba combersacionnan pa nos por tuma diferente perspectiva y pensamento y punto di bista pa nos por evalua esaki y tuma un decision responsabel,” el a remarca.

Minister di Asunto Social, Salubridad Publico, Cuido di Adulto Mayor y Cuido pa Adiccion Mervin Wyatt Ras tambe a contesta un remarke haci pa parlamentario di fraccion Futuro, Gino Goeloe, cu a indica cu ta importante pa aloca e surplus cu tin den AZV na programanan preventivo.

E mandatario a enfatisa cu esaki ta bay ta un di e enfokenan y ta para den e programa di gobernacion. El a splica cu lo bay dedica atencion na esey,sinembargo aworaki e gabinete a cuminsa y ora tin un gobierno mester scucha e diferente instancia, fundacion, organisacion y stakeholders pa asina por forma kico ta bay haci pa cuminsa y asina concretisa e plannan.

“Nos a constata cu tin diferente problematica den nos comunidad y aworaki nos kier duna nos comunidad e oportunidad di hisa nan calidad di bida,” el a indica.