Ayera mainta durante un conferencia di prensa parlamentario y lider di fraccion PPA Otmar Oduber a elabora riba algun topico, esta tratamento presupuesto 2025 y e amienda y mocionnan cu e fraccion a presenta, y violacion di reglamento di orde di parlamento y reunion riba Rijkswet⁠.

Oduber a splica cu diabierna ultimo durante tratamento di presupuesto fraccion PPA a vota na fabor di e presupuesto presenta. Algun tempo pasa e fraccion a mustra riba e hecho cu no lo sostene e presupuesto si no mira cu tin recortenan substancial ta ser haci den e presupuesto.

“Nos ta convenci cu tin hopi trabou pa ser haci pa nos comunidad y mi ta kere manera un fraccion cu no ta mara riba un posicion, mi ta kere esey t’e bunita di e democracia y di kier haci politica di un forma diferente,” el a indica.

El a sigui splica cu despues, mediante e amienda cu a ser entrega pa e dos fraccion cu tabata formando gobierno, cu diabierna a ser ingetrokken y a presenta esaki como un nota di cambio como e gobierno nobo cu ta sinta, Oduber a remarca cu ta mira e inicio di un proceso cu fraccion PPA por sostene.

Parlamentario Oduber a indica cu como fraccion PPA y como partido for di aña pasa, hasta prome cu temporada di eleccion, nan a dialoga largo riba e hecho cu mester tin recorte den presupuesto di pais Aruba pa por logra e metanan cu a ser poni of cu a ser comprometi cu pueblo di Aruba den ultimo eleccion, sin pone extra peso riba comunidad. .

El a señala cu mirando cu e gobierno nobo a haci un intento den e direccion aki, cortando cu 10% den goederen en diensten, a pone cu fraccion PPA kier manda un mensahe di “un politica nobo, di un aliento nobo di sostene e presupuesto aki y naturalmente lo sigui pone e presion pa mas recorte tuma luga den nos presupuesto pa di e forma ey por cumpli cu e comunidad di Aruba.”

Durante reunion lider di fraccion PPA a presenta un amienda, cu segun el a subraya, no solamente ta trece diferente punto di interes dilanti, pero ta percura tambe pa recortenan den e presupuesto tuma luga di tal forma cu por cubri y logra e meta cu a ser poni dilanti pa loke ta trata e deseonan cu comunidad di Aruba tin. E amienda no a haya sosten di parlamento.

“Mi ta lamenta esaki profundamente pasobra mi ta sinti cu cada un di e puntonan, di e forma cu el a ser presenta tabata sumamente responsabel sin pone un media riba comunidad, pero percura pa bo tin e entradanan,” el a expresa.

Den e amienda, Oduber a splica, PPA a boga pa un recorte di 4% riba e presupuesto nacional di pais Aruba. El a sigui splica cu den e programa di partido PPA nan a pone 10% cu mester yega na dje despues di cuater aña di gobernacion, por lo tanto a pone 4% den e amienda aki pero no riba goederen en diensten so, pero si no den e totalidad di presupuesto di pais Aruba.

El a indica cu den e amienda aki nan ta presenta e cifranan di tal forma cu e recortenan cu PPA ta propone pa por a logra duna e pensionadonan e 700 florin cu a ser priminti cu nan lo haya. Pero e amienda no a haya sosten y gobierno a tuma e stap pa duna e 700 florin cu a priminti den parti, cuminsa cu e 250 florin.

Parlamentario Oduber a señala cu mirando e contestanan cu a bin di parti di gobierno durante e reunion, e ta kere no lo falta mucho pa fraccion PPA haya rason, “a pesar di cu politicamente no tabatin e grandesa ainda pa acepta e amienda aki, pero e contestanan cu gobierno a duna por mira cu ta bay exactamente den direccion den e amienda cu e maneho cu ta presenta den e amienda aki pa logra duna finalmente e diferencia di 450 pa yega e 700 florin pa e pensionadonan,” el a expresa.

El a sigui splica cu den e amienda nan ta papia tambe di crea y bin cu un ‘pardonregeling’ di e aña aki, un periodo di tres luna caminda ta duna un perdon na tur e personanan cu ta indocumenta na e momentonan aki te cu 1 di januari di 2025. Den e periodo aki ta duna e oportunidad pa nan por yega na remarke pa legalisa nan status aki na Aruba.

Oduber a remarca cu esaki ta algo cu mas cu un aña pasa cu nan a trece dilanti ya bisa cu 10 mil persona ta e minimo cu nan ta wak na e momentonan cu lo por cay bou di e maneho aki. “Mi ta contento di scucha gobernantenan cu a huramenta diabierna awor a bisa den reunion publico di diabierna cu nan tambe ta mira den e direccion pa tin un ‘pardonregeling’.”

El a agrega cu a pesar cu e fraccionnan no a bay di acuerdo cu e amienda, e ta scucha cu for di gobierno posicionnan a cambia y awor ta realisa cu mester legalisa y documenta e hendenan aki pa motibo cu tur e hendenan aki ta forma parti di e forsa laboral caba.

Parlamentario Oduber a splica cu den e proceso aki ta bin un boet pa cada un persona cu ta haya oportunidad pa legalisa nan mes den e pardonregeling y cu e boet aki ta crea un fondo di mas o menos 10 miyon florin e aña aki, fuera di cu e ta crea un otro 12 pa 15 miyon florin pa caha di gobierno, sin papia mes di AZV y SVb cu e ta crea mas o menos un suma di 27 miyon florin pa AZV, mientras cu pa SVb e ta crea un suma di 36 miyon florin pa aña cu Aruba no ta hayando na e momentonan aki.

El a sigui splica cu 10 miyon florin cu ta ricibi na e boet pa e aña aki, ta ser usa den e amienda directamente pa vigilancia di fronteranan, percura pa inverti den drones, den personal di KPA y ekipo pa cera e frontera y evita cu tin entradanan ilicito via e fronteranan maritimo, manera cu ta tuma luga keto bay te dia di awe.

Por ultimo Oduber ta menciona cu den e amienda tambe ta papia di e Cuerpo Policial di Aruba y a remarca cu e ta lamenta cu no a cumpli cu un mocion cu algun siman, cual 21 miembro di parlamento, incluyendo e 6 minister cu a huramenta, a firma y a bay di acuerdo cu cune caminda a duna fondo na Cuerpo Policial.

Den e amienda ta papia di cinco miyon florin na material y ekiponan, bodycam, dashcam pa polis, tur loke a papia riba dje, y percura pa polis por haya psicologonan y cu ta evita loke ta tumando luga na e momentonan aki camindanan ta trahando 12 pa 14 miyon florin na overtime pa aña.

“Esaki por mustra e cansancio y presion cu ta pone riba e Cuerpo Policial y ta trahando entre 12 cu 14 miyon florin pa aña na overtime,” el a indica. Segun Oduber aunke e amienda no a haya sosten, a ser bisa cu gobierno mes lo traha riba esaki.