11 di april ta bira e fecha pa bisti na blauw pa enfatisa prevencion y concientisacion di abuso di mucha

Ayera mainta Fundacion Mi Voz ta Bo Voz a tene un conferencia di prensa durante cual presidente di e fundacion Lisette Gomes a elabora riba e tema di luna di april cual ta e luna decreta pa Gabinete Wever-CroesII como e luna di prevencion y conscientisacion di abuso di mucha.

Gomes a remarca cu e fundacion tin mas o menos tres pa cuater aña ta usa e luna aki pa pone un dia special pa e comunidad di Aruba bisti na blauw pa asina inculca den e comunidad di Aruba e pakico nan ta haci esaki.

“Nos tin mas cu 15 aña den e lucha aki contra abuso sexual di mucha y nos kier cuminsa pa e parti preventivo ta un poco mas fuerte den e comunidad y e parti di conscientisacion pa mayornan y comunidad henter por compronde kico abuso sexual ta y ki efecto e tin pa nos muchanan y pa e comunidad,” el a splica.

El a sigui splica cu no tin un fecha fiho. P’esey tur aña e fecha ta cambia y e motibo di esaki, el a indica, ta door di Semana Santa, e dianan liber. El a sigui indica cu e aña aki e dia pa bisti na blauw lo ta 11 di april, cual ta un diabierna. Gomes a haci un yamado na comunidad, scolnan, oficina of cualkier persona individual cu kier participa cu e proyecto aki, pa e dia aki bisti na blauw, saca un potret, y manda esaki na e telefon di e fundacion, publica esaki riba Facebook y usa #mivoztabovoz. E fundacion lo ta sacando tres premio pa e potretnan mas creativo.

“Nos kier encurasha henter e comunidad di Aruba pa uni na e causa aki y ban pusha riba e parti preventivo pa asina nos por evita mas tanto caso posibel,” el a enfatisa.

Contestando pregunta tocante kico a cambia compara cu cinco aña pasa, si casonan a baha of subi of a keda mescos, Gomes a remarca cu ta dificil pa bisa casonan a baha. El a sigui splica cu loke tabata pasa algun aña pasa ta door cu no tabata papia di e tema, of no tabatin parti di prevencion y conscientisacion, personanan no tabata entrega keho, pero aworaki esey a cambia.

“Aworaki si. Bo ta kere cu e casonan a subi, pero no ta asina ta mas keho ta ser haci awendia cual ta laga mustra cu e ta mas, pero toch mi kier bisa casonan ta yega cerca nos, pero toch tin mayornan of voogd di e muchanan no ta entrega, y e problema mas grandi ta door cu ta famia. E porcentahe di casonan cu ta yega pa entrega un keho ta hopi menos cu esunnan cu no ta yega pa entrega un keho,” el a señala.

Den e area di cooperacion cu demas fundacionnan, el a indica cu Fundacion Respetami ta e unico fundacion cu eigenlijk tabata haci proyectonan preventivo pa abuso di mucha en general, pero nan team ta hopi chikito y no tabata yega tur scol. Pero aworaki tin diferente fundacion y instancia cu a cuminsa papia di e tema durante e añanan aki.

Gomes a enfatisa cu un di e metanan di e fundacion ta pa purba mantene e tema ariba pa hendenan no lubida pasobra na Aruba tin e tendencia di esey.

Pa loke ta cooperacion pa traha hunto, el a indica cu esey no t’ey ainda. El a menciona cu como fundacion nan a acerca Fundacion Respetami na mas di un ocasion pa sinta hunto pa wak unda lo por yega pa un cooperacion. El a indica cu nan lo bolbe tuma contacto cu Fundacion Respetami pa e proyecto nobo cu nan ta trahando riba dje aworaki.

“Mi tambe ta kere cu union ta haci forsa y e mester bira un proyecto nacional cu nos mester ta hopi pisa riba esaki pa nos por conscientisa na scol, haci nos muchanan mas fuerte cu nan por para y bisa no na esaki,” el a indica.

Manera ta conoci gobierno anterior a lanta un comision, cual Gomes ta presidente di dje, cu tin como meta pa tin un sistema cu tur hende ta riba mesun liña, incluyendo sistema di husticia. Gomes a splica cu e comision tabata t’ey pa conseha gobierno.

El a sigui splica cu e comision aki a haci un investigacion hopi extensivo, cu a dura mas o menos dos aña y mey. Di e investigacion aki a bin un rapport cu tur e puntonan y otro rapport cu ta duna kico tur e solucionnan ta. El a remarca cu tin varios cos cu a cambia den e sistema, y ta dificil pa comunidad mira esaki door cu e cambio tabata di paden, pero tin ainda hopi punto cu mester di atencion.

Gomes a menciona cu e fundacion a ser acerca door di e formadornan, Mike Eman y Gerlien Croes, awor ministernan di Gabinete AVP-FUTURO, na cual nan a entrega e consehonan di e cambionan cu lo mester bin.

“Nos ta spera cu nan lo tene esaki na cuenta pa por sigui cu e trabou pa e cambionan por bin. Cambio ta moelijk e no ta sucede di awe pa mañan, vooral e parti di ley y tin biaha ley ta ser introduci, pero esey no kiermen cu e ta bay traha tampoco di biaha. E ta tuma no solamente gobierno y parlamento, pero e ta tuma comunidad di Aruba tambe pa acepta el ey y respeta e ley,” el a enfatisa.

El a agrega cu gobierno tin e rapport y ta den nan man si nan kier dialoga cu fundacion. El a indica cu den e rapport tin tur e posibel solucionnan pa e puntonan, tur e 33 buraconan cu tin den e sistema y un di nan ta e trahamento hunto.

Julissa Bislip, un di e boluntarionan fundacion, a duna splicacion tocante e proyecto nobo cu e fundacion ta trahando riba dje pa algun tempo caba. El a splica cu e ta un proyecto den cual nan a haya training di cuater dia largo di fundacion Voz di Hubetud na Corsou, un fundacion cu ya tin 30 aña trahando cu scolnan nan Corsou, y ta un proyecto di nivel halto y ta uno special pa kleuterschoolnan pa prevencion di abuso sexual.

El a agrega cu asina cu keda cla cu e proyecto na e kleuterschoolnan lo amplia despues tambe pa eerste y tweede klas di scolnan basico.

Bislip a menciona tambe cu pronto e fundacion lo bay haci un yamado na comunidad di Aruba pa esnan interesa pa e training aki inscribi pa yuda e fundacion haya mas persona posibel pa nan por yega na tur kleuterschool.