Ayera tardi durante reunion publico number 16 den Parlamento di Aruba a tuma luga votacion pa e presidente di parlamento nobo, cu a keda den persona di Sr. Alfred Marlon Sneek di fraccion AVP.
Manera ta conoci formacion di gobierno a finalisa y formadornan Mike Eman y Gerlien Croes a anuncia Gabinete AVP-Futuro, cu lo huramenta awe pa 10or di mainta.
Pero di ayera tardi caba cambionan a cuminsa tuma luga. Despues cu resultadonan di eleccion a bira conoci, durante e prome votacion pa presidente di parlamento di e constelacion nobo, Gerlien Croes, lider di partido Futuro a keda eligi como presidente di parlamento y Melvin Wyatt-Ras como vice presidente di parlamento.
Como cu ambos, Croes y Wyatt-Ras, ta forma parti di Gabinete AVP-Futuro, parlamento a vota pa e presidente nobo pa e resto di aña parlamentario 2024-2025. Votacion pa vice presidente lo tuma luga riba un otro fecha.
Durante e prome tanda di votacion, e prome nomber pa presidente di parlamento, Sneek a sali victorioso cu 13 voto na fabor y parlamentario Hendrick Tevreden di fraccion MEP a haya ocho voto.
Den e di dos tanda di votacion, pa scoge e di dos nomber pa presidente di parlamento, parlamentario Jennifer Arends-Reyes di fraccion AVP a ricibi 13 voto, Shailiny Tromp-Lee di fraccion MEP a ricibi siete voto y Hendrik Tevreden a haya un voto.
E dos nombernan cu lo ser manda pa Gobernador di Aruba SE Alfonso Boekhoudt ta di Marlon Sneek y Jennifer Arends-Reyes.
