Prome Minister demisionario, Evelyn Wever-Croes ta anuncia un logro grandi di Gobierno pa docentenan pa loke ta trata compensacion di e gastonan di kilometer. Ta trata di docentenan di SPO, OAA, EPB, EPI y IPA cu tin hopi studiante cu ta core stage y e docentenan mester bishita e studiantenan na e stage pa asina por guia nan.
Wever-Croes ta indica den un comunicado di prensa cu pa mas di 10 aña discusion ta andando riba e tema aki pasobra e docentenan tabata haya un compensacion di 71 cen pa cada kilometer cu nan core pa bay na e luga di stage di e studiante. Na 2018 a yega na un otro areglo y a bin cu categorianan y el a subi di 71 cen pa 1 florin cual segun e mandatario ainda no tabata husto mirando e gastonan cu tin pa por core di un lugar pa otro.
Gabinete Wever-Croes a yega na e decision di subi e compensacion y duna 14fl pa cada kilometer na e docente. Esaki lo cubri e gastonan cu e docentenan tin cu nan propio auto y anteriormente tabata paga di nan propio saco.
Prome Minister ta indica cu e deseo di Gobierno ta pa e stage di e studiantenan ta mas exitoso y p’esey a bin ta trahando riba e profesionalismo di stage di studiantenan cu e proyecto PEL, un proyecto grandi di ex-Minsiter Endy Croes. E logro aki ta corona e proyecto y sigura cu e studiantenan ta haya mas guia y sosten durante nan stage.
