Gobierno nobo, pero…Kico ta cambia…?

Porfin nos tin un gobierno nobo, aunke falta un mandatario ainda pa caba di pasa screening. Esey lo significa cu e gabinete pa e proximo añanan por cuminza nan labor, cu bastante asunto di peso cu mester atende. Loke ta e plannan concreto pa e periodo di gobierno, nos lo mester warda ainda.

Pero pa cuminza, algun observacion tocante e composicion di e ministerionan y e reparticion di cartera, cu ta mustra algun cambio importante. Por señala cu awor tambe e partnernan gubernamental a scoge pa e custumber, cu ya por considera un ‘tradicion’, cu composicion di e carteranan ministerial, no ta bay ta segun e set up original, segun un cierto logica di trabao y responsabilidadcu ta relaciona cu otro, sino segun e resultado di negociacion politico.Tin cambio importante si, por ehemplo cu e ministro presidente ta bolbe na un paquete ‘casi normal’ pa e puesto aki, compara cu e gabinete saliente. Aki e traspaso di Infrastructura y Planificacion pa otro mandatario ta un bon escogencia, pasobra no lo tabata bon pa mantene esaki hunto cu Asunto General di e premier, cu ta un paquete bastante grandi caba, despues cu incidente a conduci na e adicion di Infrastructura y Planificacion na responsabilidad di e promer ministro saliente. Nos ta señala esey pasobra tambe den pasado incidente a hiba na separacion di e tarea di Integracion y Emision di Permiso di Residencia di e cartera di Husticia, unda segun nos opinion esaki mester ta. E argumento pa esaki ta cu e ta parti di e implementacion di e ley di Admision y Expulsion y cu e hecho cu temporalmente a pone e tarea aki hunto cu Infrastructura y Planificacion, pa mal maneho ministerial, no mester a conduci na e custumber pa mantene esaki hunto cu Infrastructura, como parti di e cartera ministerial ey. Ademas, durante ultimo gabinete a comete un eror mas grave ainda di duna e responsabilidad ey na e mandatario cu tabata responsable pa Labor, cu e responsabilidad tambe pa e conseho laboral encuanto e peticion di permiso (relaciona cu trabao). Nos tur por a presencia con esey a termina y ta di spera cu e responsabilidad separa,y di otro banda comparti manera e ley ta concebi, lo por duna mihor prestacion den un di e trayectonan di permiso mas bao escrutinio y critica den ultimo decadanan.

Otro punto importante, segun nos opinion, ta reuni tur e sectornan economico bao di un solo ministerio. Esaki no ta e caso, parti di economia ta cay bao di encargo di e ministro encarga cu Finanzas, mientras Turismo ta separa y hunto cu Transporte (maritimo y aereo) y Labor. Transporte publico local en cambio a bay pa otro ministerio (Husticia), loke no ta parce nos un bon escogencia, mirando e paquete bastante grandi cu Husticia ta representa caba.

Awor e retonan principal cu nos ta mira pa e gabinete nobo. Di inmediato esey ta naturalmente e aprobacion di ley di presupuesto 2025 y e asunto di e propuesta pa ley di Reino di supervision financiero. E deadline pa e presupuesto ta 31 di maart, condicion imponi pa gobierno di Reino den su mas reciente reunion. Cu e gabinete nobo cu e tarea pa actua durante tratamento, esey mester por logra. Di e recomendacionnan cu Staten a ricibi di Raad van Advies (RvA) tin uno sigur importante pa menciona; esey ta e consideracion cu e ‘reparatietoeslag’ cu kier duna e pensionadonan di AOV, te awor a ser duna na tur pensionado, irespecto nan demas ingreso. RvA ta recomenda proporcionalmente no duna e grupo cu mas ingreso e toeslag, argumentando cu nan no mester esaki y cu ta posible pa digitalmente hiba e control necesario. E accion administrativo aki lo por añadi un Afl. 26,5 miyon na caha di gobierno na toeslag cu no paga, loke por financia, segun RvA, mitar di loke e medida lo costa si paga tur pensionado henter e suma. Tambe RvA a señala pakico e reparatietoeslag ta ser duna na solamente e pensionadonan, mientras tin otro grupo den comunidad cu ta den e mesun situacion precario di ingreso insuficiente. Ta di spera cu e gabinete nobo tin un respuesta riba e critica (constructivo) aki. Un opcion ta cu loke ta spaar na pensionado cu no ta haya henter e suma, por dedica na e otronan na cual RvA ta referi.

E caso di e ley di supervision financiero di Reino ta parce nos un hueso mas dificil pa morde. Mientras e deliberacion pa esaki cu Hulanda a ser hiba pa e promer ministro saliente, ta di supone cu e gabinete entrante ta na altura di e avancenan te awor. Nos a tuma nota cu e deliberacionnan lo ta tumando lugar na nivel ‘ambtelijk’, pero ta dificil pa kere cu un gobierno, cu normalmente lo tabata den funcion caba, no ta na altura di loke ta palabra. Nos no sa sigur si e nombramento di un ministro encarga cu finanzas di e partido menor den e coalicion, di cual ta conoci kico nan posicion ta encuanto e ley di supervision, mester ser tuma como un señal positivo pa aceptacion di e ley. Di tur manera lo mester warda ainda pa e contenido di loke acorda bira conoci, pa despues mira si e dos partidonan grandi lo cambia nan punto di vista.Naturalmente no por descarta e posibilidad cu parlamento ta rechaza e propuesta. Esey lo crea un situacion di tension fuerte cu gobierno Hulandes y nos lo bay paga mas interes riba nos debe. Nos no a ripara ainda cu esey tin hende cu problema di insomnio aki…