Mediante un carta, parlamentario di Tweede Kamer, Raoul White (GroenLinks-PvdA) a dirigi pregunta na e minister Hulandes pa Asilo y Migracion, Marjolein Faber y tambe na Secretario di Estado pa Asuntonan Reino, Zsolt Szabo, tocante e suspension (temporal) di fondo Mericano pa Aruba, como tambe Corsou y Sint Maarten.

Manera ta conoci despues di su huramentacion como presidente di Merca, Donald Trump a duna orden pa suspende ayudo financiero mundialmente, pa un periodo di 90 dia, lo afecta Aruba, y Corsou, tambe.

Na Aruba ya a cuminsa mira algun desaroyo relaciona cu esaki, manera e ciere di HIAS, un organisacion cu ta duna sosten na migrante y refugiado, y cu awo a bandona nos isla.

Teniendo esaki na cuenta, parlamentario White a puntra kico ta e impacto di e suspension di fondo Mericano pa Aruba, Corsou y Sint Maarten (islanan CAS) en general, y specificamente riba organisacionnan di sociedad civil. Ta conoci cu hopi organisacion civil rond mundo tabata depende riba e fondonan aki pa mantene operacion, y e suspension di fondo for di Merca a trece hopi di nan den incertidumbre.

Tambe White a puntra tocante e impacto di e suspension di fondo Mericano specificamente riba sectornan di cuido di salud y educacion, y con e lo afecta ayudo legal y informacion legal pa indocumentado, migrante, y hendenan buscando proteccion. “Si bo no tin informacion concreto riba esaki ainda, bo ta dispuesto pa investiga e asunto aki a corto plaso?” el a puntra.

White ademas a pidi e minister y e Secretario di Estado pa indica kico lo ta e consecuencianan concreto si e fondonan Mericano keda descontinua permanentemente – si tin consecuencianan tangible pa Bonaire, Sint Eustatius y Saba (islanan BES), specialmente Bonaire, awo cu proyectonan importante na Aruba y Corsou no ta ricibiendo fondo. “Bo ta reconoce e importancia di e proyectonan cu tabata siendo ehecuta cu e fondonan aki en general y specificamente pa sociedad civil?”

A pidi e dos mandatario pa pronostica e desaroyo di e situacion despues di e suspension di tres luna anuncia pa Merca, puntrando si nan ta den discusion cu Aruba, Corsou y Bonaire relaciona cu e consecuencianan di e suspension di fondo di USAID, e agencia di desaroyo di Merca cu tabata responsable pa e fondonan en cuestion.

Interesantemente, White ta enfatisa cu “e descontinuacion di e proyectonan aki ta implica e responsabilidadnan di Reino, mirando e relacion cu islanan CAS,” puntrando ki rol Hulanda por hunga den compensa pa e perdida di e proyectonan aki. “Hulanda ta dispuesto pa explora fuentenan alternativo di financiamento pa e proyectonan aki, manera fondonan humanitario internacional of subsidionan Europeo, y pa asumi un rol facilitador den esaki?”

White ta sugeri pa Hulanda proactivamente ofrece sosten financiero den e situacion excepcional aki, teniendo cuenta cu e relacion specifico entre Reino Hulandes y e islanan CAS. E ta pidi pa explicitamente indica si Hulanda y e islanan ta reconoce e trabao crucial ehecuta pa organisacionnan local y internacional cu ta sostene hende buscando proteccion riba e islanan. “Mirando e situacion na Venezuela, Hulanda ta considera individuonan Venezolano riba islanan CAS como un grupo di cual un parti mester proteccion specifico?”

Finalisando, White ta puntra si, como e pais mas grandi dentro di Reino, Hulanda ta sinti su mes reponsable pa e impacto cu e decision di Merca tin riba e derechonan humano di hende riba e islanan CAS en general y individuonan indocumentado, migrante y esnan buscando proteccion en particular.

White ta pidi e mandatarionan pa contesta e preguntanan aki individualmente.

Por spera un contesta di e minister of e Secretario di Estado prontamente.