(AFP) – Ex campeon heavyweight George Foreman, ken a perde contra Muhammad Ali den boxeo su “Rumble in the Jungle” iconico den aña 1974, prome cu el a bolbe tuma e titulo dos decada despues, a fayece cu 76 aña diabierna segun e famia a comparti.
Cariñosamente conoci como Big George, Foreman a sali for di scol y a cuminsa un futuro exitoso unda el a bira un medayista Olimpico di oro, campeon 2 biaha di mundo y leyenda di boxeo.
El a participa den 81 pelea como un profesional, ganando 76, 68 di nan via knockout. Ademas di boxeo, el a usa nomber pa “George Foreman Lean Mean Fat-Reducing Grilling Machine,” actuando cu sonrisa den comercialnan riba television, birando un celebridad fuera di e deporte.
“Cu dolor profundo nos ta anuncia e fayecimento di nos George Edward Foreman Sr. stima, ken a bay laga nos den pas dia 21 di maart 2025 rondona di su sernan keri,” Foreman su famia a bisa den un declaracion riba instagram. “Nos ta gradici tur hende pa e amor y oracionnan, y ta pidi encarecidamente pa respeta nos privacidad mientras nos ta honra e bida extraordinario di un homber cu nos tabatin e bendicion di tin cerca.”
Boxeo tambe a duna tributo di e grandinan den e deporte.
“Nunca nos lo lubida su contribucion na boxeo y mas aleu,” Colega den e categoria di heavyweight y ex campeon Mike Tyson a publica riba X.
Promotor di boxeo legendario Bob Arum a saluda Foreman como un “di e personalidanan y partido di mokette mas grandi cu e deporte a yega di mira.”
President Mericano Donald Trump tambe a duna tributo na un “gran luchado” cu e tabata “conoce hopi bon. E tabata algo sumamente special, pero mas cu tur, e tabata un gran persona,” Trump a publica riba su plataforma Truth Social.
Naci na Texas dia 10 di januari den 1949, Foreman a crece na Houston. E homber cu a cri’e tabata ausente frecuentemente y hopi biaha tabata bebi. Foreman a haya sa cu J.D Foreman no ta su tata biologico despues cu el a gana e titulo mundial di heavyweight ora cu su tata real, un veterano condecora di Guera Mundial II a contacta su persona.
Cu 13 aña di edad, Foreman tabata bisa 200 liber y tabatin un haltura di 1.87m. Ora e tabata adolescente, el a tin un encuentro cu crimen y a sali for di scol cu 16 aña. Ta durante e tempo aki cu el a cuminsa cu boxeo.
“Mi a cuminsa boxeo djis pa mustra mi amigonan cu mi no tin miedo,” Foreman a conta despues. “Well, 25 pelea y 1 aña despues, mi tabata un medayista Olimpico di oro.”
Na e Olimpiada di Mexico di 1968, Foreman cu 19 aña a cana su caminda pa oro den super-heavyweight.
Mientras e tabata celebra su victoria final, 10 dia despues cu Tommie Smith y John Carlos a haci un saludo di ‘black power’ despues di nan careda final di 200m, Foreman a zwaai un bandera Mericano den ring.
Cu 1.93m, “Big George” tabata mas grandi y mas fuerte cu e otro lidernan den heavyweight di e tempo aki. E tabata lihe riba su pia, pero poco poco a cuminsa subi rango den heavyweight y a yega su pelea contra campeon Joe Frazier, derotando e campeon den 2 round.
Pa ora cu a yega e momento pa defende su titulo contra Ali den october di 1974, Foreman tabatin 40 pelea profesional victorioso. El a gana tur menos 3 dentro di e distancia y no mester a desaroya su stamina.
Ali su tacticanan ‘rope-a-dope’ a cansa e campeon, ken a perde den 8 ronda.
E derota aki a debilita Foreman su aura intimidante, specialmente den su mente. “Mi no por a kere cu mi a perde e titulo mundial,” el a expresa e tempo aki. “E tabata e momento mas bergonsoso di mi bida. Mi a bay di orguyo pa pena. E tabata debastador.”
Su campana pa otro titulo a caba ora cu el a perde pa punto contra otro competidor, Jimmy Young, den maart di 1977 na Puerto Rico.
Foreman a bira malo despues di e pelea aki y a bisa cu e tabata sinti cu Dios a bis’e pa cmabia su bida. El a retira cu 28 aña y a bira un minister ordena.
Ora el a anuncia su regreso 10 aña despues, pelon unda antes e tabatin un afro y cu un curpa menos tonifica, e tabata parce un strategia di publicidad di boxeo.
Despues el a skirbi cu e tabatin mester di placa pa su centro di hubentud.
Durante e siguiente 3 aña el a participa den 21 pelea, mayoria contra contrincante mediocre, ganando tur e peleanan aki, 20 di nan dentro di distancia.
Un nomber grandi den un division fragmenta y debilita, el a haya oportunidad di pleita pa titulo contra Evander Holyfield den 1991 y despues contra Tommy Morrison, perdiendo ambos a causa di punto.
Den november di 1994, el a enfrenta contra Michael Moorer, ken a kita e trono for di Holyfield. Den e mesun short cu el a bisti 20 aña anterior contra Ali, Foreman tabata teniendo un mal pronostico ora cu el a golpia Moorer na su cachete y a logra un knockout.
Cu 45 aña y 299 dia e tabata e campeon mundial di heavyweight cu edad mas halto.
A retira su prome titulo di WBA y su corona di IBF pa motibo cu el a nenga pleita contra contrincantenan nomina pero a gana 3 pelea mas y tabata campeon mundial “lineal” ora cu el a perde a causa di punto contra Shannon Briggs den 1997, cu 48 aña y a retira un biaha mas.
Foreeman, cu a anfitriona e programa “Bad Dads” den 1996, a casa 4 biaha, ta tata di 10 yiu y a adopta 2.
El a nombra tur 5 di su yiu homber George Edward, splicando cu e tabata kier pa nan sa cu “si un subi, nos tur ta subi hunto, y si un baha, nos tur ta baha hunto!”
