Den e columna aki nos lo papia tocante e stappenplan pa crea un sistema completamente automatisa di prevencion. Mas cu 6 aña pasa a propone un sistema asina cerca nos mandatarionan. Den e periodo ey, e tabata un plan hopi visionario y tin cu wordo bisa cu hopi di e tecnologianan involucra tabata speculativo. Danki na innovacion global, nos a wak progreso inmenso den e tecnologianan cu nos ta bay menciona

Health Scan di Aruba su Poblacion Adulto

E prome den traha un sistema di “Remote Patient Monitoring” completamente automatisa, ta pa haci un health scan basico di tur adulto na Aruba. Esaki lo encera midi un palet basico di testnan di sanger, midi presion, midi peso y diferente cuestionarionan di por ehempel habitonan dietario y di movecion.

E data aki lo wordo combina cu record digital di dokter di cas. Den e stap final di health scan, tur e data lo wordo hinca den algoritmo di “Predictive Analytics” pa midi cua pacient ta den riesgo mas halto pa eventonan di malesa grave, manera por ehempel un stroke, ataca di curazon of fayo di riñon.

Den e siguiente stap e pacientnan cu e algoritmo a identifica como riesgo halto lo haya nan mesun palet di sensor avansa pa midi nan salud.

Sensors avansa pa Esnan Riesgo Halto

Ora cu mi a propone e proyecto “Predictive Health Aruba” casi 7 aña pasa, hopi di tecnologianan di sensor di midi salud tabata hopi caro of toch un poco precies. Fast-forward pa e dia di awe, tin literalmente tanto na tanto diferente tecnologianan di sensor pa casi tur parti di salud humano. Dependiendo di cua riesgo di salud e pacient ta core, lo dun’e un palet di sensor specifico pa su grupo di riesgo di salud.

Principalmente e pacientnan den e gruponan di riesgo mas halto, lo haya sensornan cu ta track nan data “vital”, 24/7 365 dia pa aña

AI-Tracking

Den e fase final e data di sensor ta monitor un pacient den manera full automatisa cu Inteligencia Artificial (AI). E momento cu AI ta haya indicacion cu por tin un situacion cu ta bay tin mester di intervencion, un verpleegkundige specialisa lo haya un señal cu un cierto pacient mester di atencion. E verpleegkundige por bishita e pacient of puntra e pacient pa bin oficina fisicamente. Si en berdad tin un riesgo significante pa un evento grave di salud, lo notifica hospital y prepara pa un opname preventivo.

Mi ta stress hopi e palabra preventivo den e contexto aki. Henter e meta di e sistema aki ta pa preveni situacion grave manera atake di curazon, stroke of fayo di riñon. Prome cu nan grave. Dor esaki lo spaar inmensamente den sufrimento humano, lo spaar productividad laboral, y tambe factornan familiar di zorg pa un pacient malo. En fin tambe e sistema automatisa di prevencion lo spaar AZV fondonan inmenso den menos gasto grave di salubridad.

Awo ta Ora pa Actua!

E ta mi speransa inmenso cu e gobernacion nobo cu ta bin, lo finalmente duna oido na innovacion den sector di salubridad di Aruba. Esaki siguramente no ta un luho pero un necesidad crucial pa preveni sufrimento humano y tene nos sistema di salud social, cual nos mester ta hopi orguyoso di dje pagabel riba plaso largo. Den contexto aki mi ta spera cu mi columna por ta un inspiracion pa accion y cu nos por yuda Aruba den forma berdadero y duradero.