Siman pasa, prome minister demisionario Evelyn Wever-Croes a publica e relato anual 2024 di su ministerionan. Den esaki e ta toca diferente topico y un di nan ta trata e comisionnan cu el a establece durante su mandato.

Dos di e comisionnan aki ta Comision Nacional contra Abuso Sexual di Mucha y tambe comision Stop Violencia contra Muhe y Mucha Muhe. Den e relato ta elabora tocante e trabou di e comisionnan aki y nan resultado pa aña 2024

E Comision Nacional contra Abuso Sexual di Menor (CSMM) ta sigui e disposicion ministerial No: MAZ/3605 82/19 di 31 januari 2019 pa actua proactivamente y tuma e pasonan necesario pa duna notificacion di keho, señal y preocupacion na e prome minister y otro instancia cu ta hunga un rol esencial den e Child Protective System (CPS) y proceso gubernamental. Un decision relaciona cu un yiu ta pa bida, p’esey CSMM ta pone prioridad grandi riba prevencion efectivo, informacion, educacion y sosten di calidad.

E relato anual ta splica cu CSMM-kerngroep ta ocupa cu duna conseho na gobierno tocante e obstaculo, señal, proposicion di cambio den ley, politica y proceso cu ta tene na cuenta e victima menor y nan derecho na atencion riba abuso sexual di menor. Tambe, e grupo ta duna informacion tocante e procedemento, guia y derecho di e victima den caso di abuso sexual. E comision ta trata keho no solamente di organisacionnan gubernamental, sino tambe otro organisacion cu tin un rol den e sector di hubentud. E meta ta pa mehora e servicio y sosten, y pa duna mas asistencia na e ciudadano cu tin mester di sosten adicional.

Como resultado di investigacion y señal di keho ricibi, e relato anual ta remarca, tin 33 obstaculo detecta. E recomendacionnan a ser presenta riba 17 augustus 2022 na prome minister, minister di Husticia y Asuntonan Social, y minister di Educacion.

Pa loke ta e trabou realisa, recomendacion y investigacion comparativo 2024 cu e grupo a realisa basa riba e 33 obstaculo detecta, CSMM a tene reunion cu socionan di CPS pa analisa di cerca unda e proceso ta overlap cu ta haci e proceso ta confuso pa e victima(nan) y famia. E documento ta enfatisa cu e idea no ta pa pone ningun instancia den un luz negativo, pero mas bien pa laga tur hende comprende e trabou di otro y traha a base di un colaboracion mas efectivo. Ta importante pa tur instancia ta dispuesto pa ricibi critica constructivo y cumpli cu responsabilidad.

Den e contexto aki, den e relato anual di prome minister, ta indica cu tin plan pa: organisa un conferencia entre instancianan gubernamental, profesionalnan independiente y organisacionnan di Reino Hulandes y mundialmente manera UNESCO, UNICEFy IMF; inicia un investigacion cu studiantenan di Universidad di Aruba (UA) riba abuso sexual y uso excesivo di alcohol durante carnaval, y tambe traha un campaña di conscientisacion pa e periodo aki; CSMM ta constantemente investiga publicacion, desaroyo y cambio den proteccion di menor pa compara situacion local cu internacional den e comunidad multicultural di Aruba.

E relato anual ta trece dilanti factornan importante pa haci CPS mas eficiente. Den e contexto aki ta remarca cu traha hunto efectivamente pa proteha mucha ta un guia statutario desaroya pa gobierno cu ta stipula con profesionalnan cu ta traha cu mucha, hoben y famianan mester traha hunto pa sigura cu mucha y hobennan ta keda sigur.

E documento ta sigui splica cu areglonan di proteccion di mucha mester ta stipula den e Politica di Enseñansa di tur scol. Manteniendo Mucha Sigur den Enseñansa 2023/25: Guia Statutario pa Scol, Colegio y Universidadnan pa establece. En particular, e referencia den caso di señalnan y/of peticionnan pa asistencia.

E relato ta agrega cu e cumplimento cu ley, regulacionnan y politica pa medio di cumplimento di ley ta importante, como tambe un control interno y supervision di proceduranan. Maneho di keho tambe ta importante. Esaki ta conta pa tur sector dentro di CPS y tambe funcionarionan cu ta tuma decision y/of e legislatura y Corte. Informacion tocante esaki ta inclui den e varios corespondencia desde 2019 como tambe den e rapport di recomendacion manera presenta na Gobierno di Aruba.

Lantamento di Oficina di Defensor di Mucha (Ombudsman) lo hunga un rol grandi den atende kehonan y mal comprondemento of pa implementa cambionan apropia pa proteha menor y famianan en general.

Por ultimo, e relato ta indica cu establece y sigui bon politica y proceduranan di seguridad ta tene muchanan sigur di adultonan, y otro muchanan, cu por forma riesgo. Esaki ta inclui organisacionnan di boluntario, comunidad, gruponan di fe, proveedornan di sector priva, pero tambe scol,hospital, y clubnan deportivo.

Comision Stop Violencia conta Hende Muhe y Mucha Muhe

Otro comision importante cu minister di Asuntonan General, Innovacion, Infrastructura y Planificacion Teritorial a establece ta e Comision Stop Violencia contra Hende Muhe y Mucha Muhe.

Na december 2023, prome minister a firma un disposicion ministerial pa forma e comision “Stop Violencia Contra Hende Muhe”. E comision su trabou ta encera traha un plan di implementacion pa combati desigualdad di genero y violencia domestico contra hende muhe na Aruba.

E comision a cuminsa su trabounan na maart 2024 cu cinco miembro, incluyendo director di Bureau Vrouwenzaken (CEDEHM), Bureau Sostenemi y representante di varios ministerio y sector publico y priva.

E meta inicial di e comision tabata colecta informacion riba violencia contra hende muhe y mucha muhe pa duna un idea cla di e problematica na Aruba. Seis instancia gubernamental y stichtingnan tabata envolvi: Korps Politie Aruba, Ministerio Publico, Bureau Sostenemi, Directie Voogdijraad, Fundacion Contra Violencia Relacional y HIAS Aruba.

E relato anual ta remarca cu un di e problemanan principal detecta tabata e falta di un sistema di base di dato centralisa, cu ta haci e problema mas dificil pa analisa. Tambe tabata cla cu tur stakeholder cu tin un rol den prevencion y proteccion di hende muhe y mucha muhe mester traha hunto pa un sistema mas eficaz.

E ‘National Implementation Plan to End Gender-Based Violence’ a ser presenta na prome minister Wever-Croes dia 24 october 2024. E plan a ser comparti cu stakeholdernan di e siete area riba 26 november 2024, cu un presentacion di datonan actual di departamento y fundacionnan di gobierno, un resumen di tur recomendacion, en particular con adiccion na droga y alcohol ta empeora violencia contra hende muhe y mucha muhe, y un declaracion di clausura di e presidente di e comision cu un yamada pa accion pa tur stakeholder traha hunto riba prevencion di violencia contra hende muhe y mucha muhe.

Segun e documento e comision su trabou a keda cla ora cu e plan a ser presenta na prome minister Wever-Croes. Pero ta remarca cu ta di gran importancia pa e recomendacionnan di politica den e plan ser tuma na cuenta pa tur e stakeholdernan, specialmente pa e departamento y fundacionnan cu ta fungi como e prome liña den casonan di violencia contra hende muhe y mucha muhe.

Por ultimo, e relato anula ta enfatisa cu lo mas importante ta cu e cadena ta duna bon cuido na victimanan di violencia basa riba genero y ta trata cada caso cu respet pa trata di evita cu e persona ta bira victima atrobe of di sinti su mes insigur pa pidi ayudo.