Recientemente a bira conoci cu HIAS, un organisacion internacional cu su oficina na Aruba ta yuda migrante y refugiado na nos isla, ta clausurando su operacion na nos isla. Mirando e cantidad di servicio y e cantidad di hende na cual ta duna esaki, stakeholdernan ta expresando preocupacion pa e falta di claridad tocante ki organisacion of departamento ta bay asumi e tareanan esencial aki.

Luna pasa, riba su pagina di Facebook, HIAS a anuncia tabata suspendiendo varios di nan actividadnan pa motibo di financiamento. E tempo aya, Bon Dia Aruba a tuma contacto cu e organisacion pa puntra si esaki ta un efecto directo di e maneho di presidente Mericano, Donald Trump, cu a corta fondo pa e organisacion di desaroyo di Merca, USAID, un medida cu tabatin impacto amplio rond mundo, afectando cantidad di pais y comunidadnan vulnerable. Esaki no a keda confirma.

Sinembargo, informacion cu a yega mesa di redaccion di Bon Dia Aruba ta mustra cu HIAS ta bay clausura den su totalidad. Ayera e organisacion lo a tene un sesion informativo cu nan clientenan directo, dunando mas informacion riba e ciere di e organisacion y tambe tocante cua organisacionnan awo lo duna asistencia na e migrante y refugiadonan aki.

Servicionan di HIAS
 HIAS ta un organisacion internacional cu ta duna sosten na migrante y refugiado, y ta opera na Aruba desde 2019. Tin mas organisacion cu ta opera na Aruba den e capacidad aki, manera Organisacion di Refugiado di Nacionnan Uni (UNHCR) y Fundacion Panamericano di Desaroyo (PADF.)

Na Aruba, HIAS ta “evalua y responde na e necesidadnan di hende vunerable afecta pa desplasamento door di impodera nan pa maneha riesgonan potencial y pa biba den dignidad y seguridad,” segun su website.

HIAS ta nota cu Aruba tin alrededor di 17mil refugiado y migrante Venezolano, entre otro hende afecta pa desplasamento, kendenan ta ricibi asistencia limita, “particularmente den termino di reconocemento legal di nan status.”

Tambe ta promove integracion local door di duna y aumenta acceso na servicio y derechonan basico.
Entre otro, nan ta yuda cu aplicacion pa asilo y permiso, ta duna workshop cu ta promove integracion y bienestar, y di un manera limita, ta duna asistencia financiero.

Algun di nan servicionan ta critico pa Aruba, ya cu ta trata di obligacionnan cu Aruba tin pa cu migrante y refugiado den contexto di tratado internacional. Gobierno di Aruba a delega algun di su tareanan na e organisacionnan boluntario manera HIAS y UNHCR.

Sinembargo, cu retiro di e organisacion for di nos isla, tin preocupacion entre stakeholdernan.

Bashi den servicio
 Un organisacion cu a expresa preocupacion pa e continuacion di actividad y servicio pa refugiado y migrante na Aruba despues cu HIAS retira, ta Rainbow Warriors. Den un carta dirigi na e UNHCR y organisacion internacional di migracion, IOM, presidente di e organisacion a urgi pa bin cu un plan y un solucion.

Rainbow Warriors tabata instrumental den logra cuminsa cumplimento cu e Convencion pa Refugiado di 1951 na 2005 na Aruba cu asistencia di UNHCR na Suisa y e Vereniging Vluchtelingenwerk Nederland, entre otro organisacion. Desde 2005, nan ta monitorea cumplimento cu e exigencianan di e tratado.

Den nan carta na UNCHR y IOM, Rainbow Warriors ta purba di cera contacto pa evalua e posible escenarionan y plan di contingencia pa remedia e bashi crea pa e retiro di HIAS.

E organisacion a bisa di ta preocupa pa e situacion mirando cu gobierno di Aruba desde 2017 no ta inclui participacion di stakeholdernan den toma di decision, particularmente relaciona cu derechonan humano en general, y derecho di refugiado, migrante y trahador en particular, pa loke e organisacion ta buscando pa resolve e problema aki lo mas pronto posible.

“Nos ta sinti cu mester cuminsa un dialogo lo mas pronto posible cu tur stakeholder relevante involucra pa atende cu e problemanan crea pa e cambio politico den politica cu ta trata fondonan humanitario for di gobierno federal Mericano pa asuntonan di refugiado y migrante den Caribe, y con Union Europeo por posiblemente duna asistencia den yena e bashi,” Rainbow Warriors a bisa.

Asilo na Aruba ta keda un problema mayor

Recientemente, prome minister demisionario, Evelyn Wever-Croes a publica e relato anual di su ministerio.

E Ministerio di Prome Minister ta consisti di cuater cartera, esta Asuntonan General, Innovacion, Organisacion Gubernamental y Infrastructura y Planificacion Teritorial.

Den e ministerio di Asuntonan General, a dedica un parti na e crisis migratorio for di Venezuela, den contexto di Seguridad Nacional di Aruba.

Aruba a firma e Protocol di Convencion di Refugiado di ONU (1967) y e Convencion Europeo riba Derechonan Humano (ECHR). Desde 2019, Aruba tin un unidad dedica na asilo pa trata e cantidad aumentando di aplicacion pa asilo, particularmente for di Venezolanonan.

Fin di 2024, gobierno a dicidi di formalisa e unidad aki como e Departamento di Proteccion di Tratado. E departamento aki ta responsable pa procesa aplicacionnan di asilo dentro di un marco specifico di tempo, mientras ta cumpli cu obligacionnan di tratado. Esaki ta critico, ya cu organisacionnan di derechonan humano ta tene Aruba responsable pa e obligacionnan aki.

Ya caba na october 2024, Amnesty International a critica Aruba pa su maneho pa refugiado y migrante Venezolano, en e rapport “Regla pero no proteccion: desvelando gap den proteccion di refugiado pa Venezolano na Aruba.” E rapport ta resalta e falta di legislacion specifico relaciona cu refugiado na Aruba, problemanan asocia cu detencion di solicitante di asilo y refugiado, y preocupacion tocante e trato di solicitante di asilo Venezolano, incluyendo mucho.

E rapport ta representa e prome investigacion di Amnesty International riba solicitantenan di asilo Venezolano na Aruba.

Segun e jaarverslag menciona anteriormente, pa fin di 2024, a completa e renobacion di oficina di departamento di Proteccion di Tratado, y desde januari 2025 e departamento ta operando den un edificio recien renoba. Adicionalmente, a activa e sistema di registracion VIDA. E sistema aki ta comparable na esun usa pa UNHCR den termino di calidad, contenido y funcionalidad. Gobierno tin meta pa expande e departamento na 2025 pa agilisa tempo di proceso.

Reto di asilo
 E situacion di asilo na Aruba ta keda un problema mayor y ta un prioridad top di gobierno. Implementacion adecua di tratado y e proceduranan relaciona ta crucial. Inversion den desaroyo di proceso di proteccion y training di personal specialisa a conduci na reconocemento internacional di e sistema di asilo na Aruba como un ‘best practice’.

Sinembargo, manera mira na paisnan mas grandi, e capacidad limita di Aruba ta keda bao presion inmenso.

Asilo no ta un fenomeno temporal, sino un problema structural cu mester atende a termino largo.

E instabilidad politico y economico den e region ta continua influenciando patronchinan di migracion.

Entre 2015 y 2024, un total di 4,649 solicitud di asilo a keda entrega, involucrando 5,812 individuo. Mayoria di esakinan a bin di Venezolano y Colombiano. Mayoria di aplicacion a keda rechasa pa inadmisibilidad of keda considera sin base, ya cu hopi solicitante tabata migrantenan economico. Ya cu Aruba no a firma e Declaracion di Cartagena, e cantidad di rechaso ta keda halto.

E proceso di asilo ta destina pa proteccion, mientras e proceso di permiso di residencia ta destina pa permiso di trabao. E procesonan aki ta core paralel y no ta exclui otro. Fin di 2024, analisis di data a revela cu mas di 700 individuo a sea obtene permiso di trabao y residencia of a bandona Aruba. E relahacion di politicanan di inmigracion na maart 2023 y augustus 2024 a contribui na e tendencianan aki.

Awor cu retiro di HIAS – y posiblemente otro organisacionnan cu tambe tabata depende di fondonan Mericano pa opera – gobierno di Aruba lo mester busca un manera pa asumi su resposabilidadnan di tratado, mientras e fondonan local ta bao presion caba pa motibo di acuerdonan haci cu Hulanda den contexto di landspakket, entre otro.

Bon Dia Aruba a manda pregunta riba e tema aki na prome minister demisionario, Evelyn Wever-Croes, pero no a ricibi contesta prome cu ciere di edicion.