(Curacao.nu) – Scol basico na Corsou a ricibi un impulso nobo pa educacion digital ora di ricibi tablet cu tabata ser usa na e Bureau Central di Estadistica. E aparatonan usa a ser dividi entre varios scolnan.
A entrega e tabletnan na un manera special: nan tabata hinca den un caha di palo cu a ser transforma den un forma di un regalo gigante. Ora e caha yega na e scolnan, e studiantenan no tabata sa kico tabatin aden. Maestronan a scoge algun studiante pa habri e caha y revela e ‘Schatkist di Conocemento’.
Pa garantisa un uso sigur y controla di e tabletnan, tur aparato a ser configura di antemano. Acceso na website pa 18+ ta blokia y software educativo, incluyendo e programa ‘Magrid’, a ser instala. Esaki ta un plataforma interactivo specialmente desaroya pa studiantenan chikito y mucha cu tin necesidad educativo special. E ta yuda cu e siñamento di lenguahe y number, y tambe ta apropia pa muchanan multilingual, studiantenan cu fondo migratorio y muchanan cu trastorno di enseñansa manera dislexia, dispraxia y discalculia.
Debi na instalacion di e software, e entregamento di e tabletnan a tarda un tiki mas, pero esaki ta sigura cu tur studiante por saca e mihor probecho di e aparato. E reparticion di e tabletnan lo sigui durante e dianan binidero na otro scolnan.
