Ayera Aruba a celebra su dia nacional, 18 di maart Dia di Himno y Bandera. Manera ta tradicion pueblo di Aruba a sali y disfruta di diferente actividad cu tabatin full rond di e isla caminda por a gosa di shownan di baile, come cuminda crioyo y celebra Aruba en general.
Desde dialuna 17 di maart ya caba Aruba por a disfruta di celebracionnan cultural. Manera ta custumber dialuna anochi a tuma luga e manifestacion cultural cual a tuma luga riba Plaza Betico Croes.
Riba e anochi aki Plaza Betico Croes ta haya bida cu e ambiente cultural. Tin diferente tent cu cuminda crioyo, cos dushi, arte, artesania y hopi mas. Sin lubida, pueblo ta disfruta di un show musical y di baile incomparabel.
Dia 18 di maart mainta ta habri cu e manifestacion cultural cu tuma luga dilanti Plaza Betico Croes y ta conta cu presenta di Gobernador di Aruba SE Alfonso Boekhoudt y demas mandatarionan di e isla.
Gruponan social, cultural, deportivo y diferente organisacion ta forma parti di un desfile oficial y ta presenta dilanti Gobernador di Aruba y e mandatarionan.
Pa sigui celebra pueblo por a disfruta di tur e actividadnan rodn di e isla. Algun di e actividadnan aki tabata entre otro na Club Caiquetio, Aruba Aloe, Cas di Cultura, Biblioteca Nacional Aruba, Museo Arkeologico, Centro Hubenil Washington y hopi otro localidad mas.
