Recientemente, Oficina Central di Estadistica a publica su Statistical Overview di Aruba mas recien. Pa loke ta clima di Aruba, den e periodo observa, a nota un patronchi stabiel di temporada na Aruba, cu temperatura, yobida, y otro indicadornan relativamente stabiel den cinco aña. Sinembargo, a nota un caida consistente den e velocidad di biento durante e periodo observa.

Clima di Aruba ta hopi stabiel durante ultimo 5 aña, cu un temperatura averahe di 28.6 grado Celsius, humedad averahe di 76 porciento, y biento averahe di 7.4 m/s. Pa loke ta trata awasero, Aruba a conoce añanan seco y añanan mas muha, cu un precipitacion averahe di 369mm di yobida pa aña.

E datonan mas recien pa cu temperatura cu CBS a publica ta di 2020. E aña ey, e temperatura mas fresco di 27.5 Celsius tabata registra na luna di januari y december, mientras cu e temperatura mas halto, 29.8 Celsius, tabata na december. Esaki ta sigui e mesun patronchi, cu tur aña di 2015 pa 2020, e luna mas cayente tabata september, y e aña cu e september mas cayente tabata 201e, cu temperatura di 30.2 Celsius. Igualmente e tendencia pa e luna mas fresco di 2015 pa 2020 tabata januari, cu e januari mas fresco esun di 2017, na 26.5 Celsius.

Precipitacion

Nivel di precipitacion na Aruba, segun registra na aeropuerto Reina Beatrix, a varia significantemente durante añanan, cu fluctuacionnan notable den diferente luna.

En general, den e periodo cu CBS a evalua, di 2015 pa 2020, e data ta resalta variacionnan cla den precipitacion na Aruba, cu un tendencia di aumento di precipitacion den e ultimo parti di cada aña, particularmente na october y november. Aña 2020 a resalta como esun mas muha, y mientras 2015 tabata esun mas seco.

E fluctuacionnan aki ta indica patronchinan di yobida, cu ta esencial pa compronde e tendencianan climatico di Aruba.

Igualmente, e cantidad di dia cu yobida midible (1.0mm of mas) na Aruba a varia significantemente entre 2015 y 202, reflehando variacion den patronchi di precipitacion na diferente aña.

En general, e data aki ta indica cu e ultimo parti di aña – particularmente october, november y december – usualmente tin e cantidad mas halto di dia cu ta yobe. Aña 2018 tabatin e mayor cantidad di dia cu a yobe, mientras 2015 esun di menos.

E tendencianan aki ta alinea cu e patronchinan di temporada di Aruba, unda e ultimo lunanan generalmente ta mira mas yobida.

Humedad

E nivel averahe di humedad na Aruba a keda relativamente stabiel di 2015 pa 2020, cu averahe anual variando entre 75% y 76%. Sinembargo, tabatin cambionan notable den diferente luna y aña.

En general, november consistentemente a registra algun di e nivelnan mas halto di humedad, mientras maart y juni usualmente tabata lunanan mas seco. E aumento mas significante den humedad a sucede na juli 2018 (82 porciento) y november 2020 (81 porciento), indicando periodonan ocasional di aumento di humedad den atmosfera.

E patronchinan aki ta refleha e dinamica di clima di Aruba, unda variacionnan di temporada ta influencia nivel di humedad durante aña.

Biento
 E datonan di biento y presion atmosferico colecta di 2015 pa 2020 ta revela variacion den velocidad di biento y rafaga, hunto cu nivelnan relativamente stabiel di presion di aire.

Durante e periodo registra, e velocidad averahe di biento a mustra un tendencia general di caida. Na 2015, velocidad di biento tabata registra na 8.6 m/s, e mas halto den e set di data. Sinembargo, el a baha na 7.5 m/s na 2016, alcansando su punto mas abao na 2017, na 7.0m/s. Un recuperacion leve a sucede na 2018 y 2019, cu velocidad di biento stabilisando na 7.7 m/s, prome cu baha atrobe na 7.2 m/s na 2020.

Rafaganan maximo a varia durante añanan, cu peaknan observa den diferente periodo. E rafaga mas fuerte a keda registra na 2020, na 23.6 m/s, sigui di cerca pa 2015 cu 23.1 m/s. Den contraste, e rafaga mas debil a sucede na 2016, na 18.9 m/s. Otro registro notable di rafaga ta inclui 21.1 m/s na 2017, 20.6 m/s na 2018, y 19.6 m/s na 2019.

E presion averahe di aire a keda relativamente stabiel durante e periodo, variando levemente alrededor di 1,012mb. E presion di aire mas halto registra tabata 1,012.2 mb na 2018, mientras esun mas abao tabata 1,011.8mb na 2017. Variacion den e otro añanan tabata minimo, cu balornan variando di 1,011.7 mb (2016) na 1,012.1 mb (2015 y 2020.)

E datonan aki ta sugeri un caida gradual den velocidad averahe di velocidad di biento durante aña, mientras rafaga maximo varia cu peak ocasional den intensidad, particularmente na 2020 y 2015. Presion di aire a keda en gran parti consistente, indicando condicionnan atmosferico stabiel.

E variacionnan den velocidad di biento y rafaga por refleha patronchinan di clima di temporada, incluyendo e influencia di trade winds, condicion atmosferico local, y tendencianan mas amplio di clima afectando e region.