Recientemente prome minister Demisionario Evelyn Wever-Croes a presenta e relato anual di 2024 pa su ministerio. Den e relato anual aki, cu ta dividi den cuater capitulo, e ta toca diferente area di importancia, entre otro Seguridad di Estado.

Den e relato anual e mandatario ta splica cu 2024 a representa un aña den cual mester a despidi algun empleado di e Sistema di Seguridad di Aruba (VDA). E situacion aki, el a indica, a afecta e servicio profundamente debi na e perdida di conocemento, habilidad y experticio, cu ya caba ta sensibel.

El a sigui splica cu un ahuste na e formacion di personal ta necesario y urgente pa VDA por sigui enfrenta e menasa contra seguridad di estado, sea di akoordnan estatal of no-estatal.

Den 2024, VDA tabata suheto na un investigacion di e Comision di Supervision, cu tabata enfoca riba e proceso di investigacion di seguridad durante e ultimo kwartaal di e aña. Prome minister ta indica den e relato anual cu un lista di funcionnan di confiansa na forma di concepto ta cla pa, hunto cu DWJZ y DRH, traha pa logra un lista revisa y actualisa di e funcionnan aki.

Den e relato anual, ta splica cu durante 2024, VDA a traha riba 1151 solicitud di informacion (SVI’s) y a duna 750 declaracionnan di ningun obhecion (VGB’s). Pa tres persona, nan VGB a ser retira. Referente na caso di obhecion, dos caso a ser trata pa e Comision di Supervision.

Ta sigui splica cu e desaroyo di un Business Unit VO ta den estado di status quo, debi na cu e ta depende di un ahustamento organisacional. Hunto cu e servicionan di Reino, a tuma decision pa colabora den un manera mas structural, pa nivela e procesonan di seguridad mediante e Platform VO.

Pa loke ta seguridad di informacion y cyberscurity, den e relato anual ta splica cu den cuadro di seguridad di informacion, VDA a contrata un CISO (Chief Information Security Officer) na ultimo di 2024, cu ta encarga cu diseña e structuranan pa implementacion di regulacion di clasificacion di informacion.

Ademas, ta agrega, e servicio a duna diferente conseho pa seguridad na diferente instancia y a realisa varios investigacion di seguridad electronico (EVO). E trabounan aki tabata primariamente enfoca riba seguridad di informacion y cyberaspectonan, cu e meta di fortalece e resilencia di seguridad di estado.

Pa loke ta e analisis di menasa y riesgo, VDA ta contribui na e sistema di vigilancia y proteccion, door di produci 11 rapport di analisis di menasa y riesgo durante 2024.

Ademas, e servicio a tuma parti activamente den e preparacion pa e bishita di estado di presidente di Surinam, Sr. Santokhi, na Aruba den september 2024.

E formacion y reorganisacion di VDA tabata na DRH durante 2024, pero, lamentablemente, no a logra un prome concepto ainda. Pa e futuro di e servicio, e formacion nobo y organisacion ta crucial pa planificacion y pa e inversionnan necesario, tanto financieramente como den conocemento y habilidad.

Capacitacion y training di personal ta fundamental pa e servicio pa mantene cu e desaroyonan rapido den inteligencia, analisis y resistencia contra menasa.

Den e relato anual di prome minister demisionario ta splica cu den 2024, VDA a organisa e ‘Fraudulent Documentation Training’ hunto cu RCMP di Canada pa servicionan di frontera. E servicio a participa den varios otro training cu ta aporta na desaroyo y conocemento di e personal. Ademas, e servicio ta motiva su empleadonan pa sigui e trainingnan online cu e Land Academy ta ofrece.

Pa loke ta e reunion, Consulta di Reino den Servicionan di Inteligencia y Seguridad, normalmente, e capitannan di e servicionan di inteligencia y seguridad den Reino Hulandes ta reuni dos biaha pa aña. Sinembargo, den 2024, e reunion aki a tuma luga solamente un biaha.

A pesar di esaki e preparacion y e reunionnan di expertonan na nivel di trabou a continua na principio y fin di 2024. Varios topico a ser discuti, entre otro influencia politico den e region.

Lesa mas informacion di e relato anual 2024 di prome minister den nos siguiente edicion di Bon Dia Aruba.