(NLTimes) – A pesar di financiamento adicional pa polis contrata detectivenan extra den e preparacion pa un ley nobo contra violencia sexual, polis ta luchando ainda cu problemanan di capacidad masivo. Desde cu e ley nobo a drenta na vigor dia 1 di juli, ni un solo caso di violacion of agresion sexual no a yega den sala di Corte, Trouw ta informa.

E ley nobo a haci cu mas forma di mal conducta sexual a bira castigabel. Por ehempel, awor por condena esunnan cu a comete e crimen si nan tabata sa of mester tabata sa cu nan pareha no tabata kier tene relacion sexual cu nan. Esey ta kita e peso for di e victima pa proba cu nan a opone na tene relacion sexual.

E expectativa tabata cu e ley lo a conduci na mas informe di crimen sexual, pues polis a ricibi 5 miyon euro extra pa amplia e capacidad di su team. E idea tabata pa recluta 70 persona nobo. Segun Trouw, polis a recluta solamente ocho persona.

“Nos simplemente no por yena vacaturanan,” un vocero di polis a bisa e corant. “No ta tur hende gusta e trabou aki.” Ademas nan a agrega cu training pa e personanan aki tambe ta tuma tempo. “E ta un trabou hopi specialisa y mentalmente pisa. Simplemente no ta e posicion mas popular den polis.” Un cantidad relativamente grandi di detective den e departamento aki a bandona e trabou den e periodo cu a pasa, parcialmente debi na con pisa e trabou ta.

Mas cu ocho luna despues cu e ley a drenta na vigor, polis ainda mester proce casi cuater mil caso. Ni un solo caso di agresion sexual of violacion sexual a yega sala di corte despues di 1 di juli 2024.

Segun Trouw, polis ta calcula cu alrededor di mil melding for di 2024 por bay corte bou di e categoria nobo di “violacion of maltrato sin coercion.” Pero polis a agrega cu condena no ta nan meta principal. Segun polis a indica, e ley nobo no ta haci’e mas facil pa hiba esnan cu comete crimen dilanti corte, pero ta principalmente destina pa “cambia comportamento den sociedad.”

Di acuerdo cu e normanan di polis mes, detectivenan di crimen sexual mester transferi e investigacion pa Ministerio Publico dentro di seis luna di e rapport. Segun informacion, aña pasa esaki a sucede cu 57% di e casonan.