Manera ta conoci, tratamento di presupuesto nacional 2025 a keda suspendi despues cu fraccionnan AVP y Futuro a entrega un amienda cu a cambia completamente e direccion di e presupuesto. A suspende e tratamento pa manda e amienda aki pa e organonan consultativo y ta en espera di e consehonan debido prome cu continua cu e tratamento.
Despues di e reunion cu e formadornan, Gerlien Croes y Mike Eman, tabatin diahuebs mainta cu Gobernador di Aruba SE Alfonso Boekhoudt, durante nan encuentro cu prensa a puntra Croes kico ta e actualisacion di e tema aki y si e ta spera cu lo trata y aproba e presupuesto pa 31 di maart, cual ta e fecha limite cu Conseho di Minister di Reino a duna pa esaki.
Croes a splica cu na momento cu e amienda a drenta a nota cu e ta un amienda cu ta cambia practicamente e contenido di e presupuesto completo y ta carga sosten di 12 miembro di parlamento. El a remarca cu den su funcion como presidente di parlamento el a tuma e decision cu lo mas responsabel e momento ey tabata pa suspende temporalmente e tratamento di e presupuesto si tin un amienda cu lo cambia e esencia di e tratamento di e presupuesto.
El a splica cu a base di esey a tuma contacto cu e organonan consultativo y alabes tambe a tuma contacto cu CAft pa tur miembro di parlamento eventualmente por haya un conseho debido.
Pa loke ta e organonan consultativo, el a indica cu ta spera, y e instancianan a duna di conoce tambe, cu nan lo purba duna nan cooperacion pa manda nan conseho pa asina no desvia di e fecha 31 di maart pa asina pa e dia aki presupuesto di Aruba lo ta aproba.
Miembro si prensa a puntra lider di AVP Mike Eman kico tabata su reaccion of pensamento riba e declaracion cu partido MEP ta esun cu a duna e 250 florin den aumento di reparatietoeslag pa pensionado cu a ta inclui den e amienda di AVP y Futuro.
“Si partido MEP tabata dispuesto pa duna e 250 florin, lo e tabata poni den nan presupuesto. Pero e presupuesto cu nan a presenta no tabatin niun 250 florin pa nos grandinan y tampoco e ultimo ocho aña nos a mira e 250 florin. Kiermen pa bo bin bisa awe cu e 250 florin, cu e cambio aki ta un cambio cu a bin di partido MEP, mi ta kere henter nos comunidad ta compronde cu esaki no ta logico,” el a remarca.
Eman a agrega cu en realidad gobierno a haci algo aun mas complica, ya cu segun e nan por tabatin un suma mas grandi ainda pa e pensionadonan. El a splica cu gobierno a dedica un cambio di impuesto, cu partido EVP y Futuro a dicidi caba cu nan lo laga asina, pasobra mayoria hende a conoce e beneficionan di e cambio aki.
El a indica cu nan no tin nada contra pa e beneficionan ey pasobra na final ta henter Aruba a sufri perdidia di poder di compra y tur clase a perde cu e gobierno aki ocho aña largo.
“Ta henter Aruba a sufri, pero no mas cu si tabata na nos nos lo a cuminsa cu e recursonan cu tin, dedica nan maximalmente na e hendenan cu ta cay bou di 250 florin. Un decision a ser tuma pa bay den otro direccion. Si e gobierno aki kier a yuda esnan cu nos ta yudando, nan lo a yuda nan. Bo a tuma un decision cu bo a kita cu nos por a duna mas na e grupo aki y bo no a bin cu e proposicion tampoco pa duna nos pensionado e 250 florin. Mi ta kere nos comunidad ta sinti cu e argumentonan aki no tin balor,” Eman a remarca
Pa loke ta trata e recorte di 10% de goederen en diensten cu nan a inclui den nan amienda, miembro di prensa a puntra Croes kico ta su reaccion pa e declaracion di minister Tjon indicando cu Departamento di Asuntonan Social a expresa nan preocupacion pa motibo cu lo tin recorte den nan departamento.
Croes a contesta splicando cu minister Tjon a duna un declaracion como si fuera cu specificamente ta na e departamento ey ta bay haci recorte. El a subraya cu e recorte cu nan a presenta den e amienda ta un recorte por lo general.
El a indica cu pa cuminsa esaki ta inclui kita tur e contractantnan cu ta nombra na e momento aki y no ta trahando, “Esey ta loke pueblo kier. Pueblo kier wak cu nos na e momento aki ta haci un entrada debido y nos ta tambe responsabel cu e maneho financiero di e pais aki. E recorte di goederen en diensten ta entre otro kita tambe por ehempel autonan di 150 mil cu un minister ta coriendo. No ta specificamente riba un departamento. E ta general cu nos ta corta 10% riba tur e gastonan cu tin innecesario den e gabinete e ultimo siete aña,” el a señala.
Di su banda sr. Eman a subraya cu den e lista di prioridad di gobierno di AVP y Futuro e ultimo hendenan cu nan lo corta riba dje ta esnan den necesidad, mas bien ta bay yuda.
“No ta bay kita nada di e hendenan cu tin necesidad na Aruba. E gobierno ey ta bayendo, e gobierno cu tabata haci esey ta bayendo. Awor nos ta bay tin un gobierno cu ta bay mira e necesidadnan aki. Pero ta awor aparentemente a cuminsa ripara cu tin hendenan den necesidad pa purba pone como si fuera cu e gobierno di AVP cu Futuro lo bay mishi cu esey. Esey no ta e caso. Nos lo dirigi tur e reduccion caminda nos ta sinti cu tin gastonan innecesario,” el a enfatisa.
