Diahuebs mainta, 13 di maart durante conferencia di prensa di Gobierno di Aruba, Prome Minister Evelyn Wever-Croes a anuncia, cu gran honor, e publicacion di e Relato Anual 2024 di su ministerio. E Ministerio di Prome Minister ta consisti di cuater cartera y cada un tin un rol fundamental den gobernacion di Aruba; Asuntonan General, Innovacion, Organisacion Gubernamental y Infrastructura y Planificacion Teritorial.

Den e ministerio di Asuntonan General, a dedica un parti na e crisis migratorio for di Venezuela, den contexto di Seguridad Nacional di Aruba.

Den esaki, a nota cu e crisis politico, economico y humanitario na Venezuela a causa un crisis di migracion severo na henter mundo, incluyendo den nos region. Desde 2015, e relato ta nota, e crisis aki a expande den un fenomeno global, cu casi 8 miyon refugiado y migrante Venezolano, di cual 85 porciento ta plama na varios pais den Sur America y Caribe.

Como pais bisiña di Venezuela, Aruba a haya su mes significantemente afecta pa e situacion aki.

E crisis migratorio di Venezuela a pone varios organisacion di derechonan humano di ONU pa bira involucra activamente den sigura cu ta cumpli cu obligacionnan di tratadonan di derechonan humano.

Aruba a firma e Protocol di Convencion di Refugiado di ONU (1967) y e Convencion Europeo riba Derechonan Humano (ECHR). Desde 2019, Aruba tin un unidad dedica na asilo pa trata e cantidad aumentando di aplicacion pa asilo, particularmente for di Venezolanonan.

Fin di 2024, gobierno a dicidi di formalisa e unidad aki como e Departamento di Proteccion di Tratado. E departamento aki ta responsable pa procesa aplicacionnan di asilo dentro di un marco specifico di tempo, mientras ta cumpli cu obligacionnan di tratado. Esaki ta critico, ya cu organisacionnan di derechonan humano ta tene Aruba responsable pa e obligacionnan aki.

Pa fin di 2024, a completa e renobacion di oficina di departamento di Proteccion di Tratado, y desde januari 2025 e departamento ta operando den un edificio recien renoba. Adicionalmente, a activa e sistema di registracion VIDA. E sistema aki ta comparable na esun usa pa UNHCR den termino di calidad, contenido y funcionalidad. Gobierno tin meta pa expande e departamento na 2025 pa agilisa tempo di proceso.

Reto di asilo
 E situacion di asilo na Aruba ta keda un problema mayor y ta un prioridad top di gobierno. Implementacion adecua di tratado y e proceduranan relaciona ta crucial. Inversion den desaroyo di proceso di proteccion y training di personal specialisa a conduci na reconocemento internacional di e sistema di asilo na Aruba como un ‘best practice’.

Sinembargo, manera mira na paisnan mas grandi, e capacidad limita di Aruba ta keda bao presion inmenso.

Asilo no ta un fenomeno temporal, sino un problema structural cu mester atende a termino largo.

E instabilidad politico y economico den e region ta continua influenciando patronchinan di migracion.

Entre 2015 y 2024, un total di 4,649 solicitud di asilo a keda entrega, involucrando 5,812 individuo. Mayoria di esakinan a bin di Venezolano y Colombiano. Mayoria di aplicacion a keda rechasa pa inadmisibilidad of keda considera sin base, ya cu hopi solicitante tabata migrantenan economico. Ya cu Aruba no a firma e Declaracion di Cartagena, e cantidad di rechaso ta keda halto.

E proceso di asilo ta destina pa proteccion, mientras e proceso di permiso di residencia ta destina pa permiso di trabao. E procesonan aki ta core paralel y no ta exclui otro. Fin di 2024, analisis di data a revela cu mas di 700 individuo a sea obtene permiso di trabao y residencia of a bandona Aruba. E relahacion di politicanan di inmigracion na maart 2023 y augustus 2024 a contribui na e tendencianan aki.

Situacion di frontera y efectonan economico
 Desde februari 2019, frontera aereo di Aruba cu Venezuela a keda cera, mientras a habri e frontera maritimo dia 1 di mei 2023, despues di negociacion. A haci esaki pa stimula comercio y combati inflacion. Sinembargo, ta continua explorando rutanan comercial alternativo pa baha prijsnan halto.

Historicamente, Venezuela ta un partner comercial importante di Aruba, pero gobierno a expande lasonan economico mediante misionnan comercial na Surnam y Colombia. Inicialmente, tabata spera reapertura di frontera aereo na 2024, pero despues di eleccion presidencial na Venezuela na augustus, a dicidi pa pospon’e.

Visa pa Venezolano
 E rekisito di visa pa Venezolano ta keda un politica clave pa controla fluhonan di migracion. Autoridadnan Arubano di migracion ta continua monitoriando y evaluando e situacion, haciendo ahuste segun ta necesario. E impacto di migracion a ser sinti na varios sector, incluyendo labor, educacion, husticia, vivienda y cuido di salud. A pesar di esfuersonan andando, preocupacion tocante migracion a keda halto na 2024. Gobierno y servicionan publico ta keda bao presion, loke ta rekeri tempo, recurso y capacidad significante.