Oficina Central di Estadistica ta presenta su publicacion ‘Statistical Overview of Aruba 2023’, y den esaki, a dedica un capitulo na e situacion di vivienda na Aruba. E datonan relaciona cu e caracteristicanan di vivienda di hende y hogar na Aruba a keda colecta durante e Censo 2020, cu a tuma lugar den lunanan di october te cu december 2020.
Segun esaki, e region di Noord/Tanki Leedert ta e region cu e porcentahe mas halto di persona (22.5%) y hogar (22.2%), mientras region di sur di San Nicolas ta region cu e porcentahe mas abao di persona (3.9%) y hogar (4.3%).
Tipo di vivienda
Segun e datonan di CBS, por nota cu un gran mayoria di persona na Aruba (82.8%) ta biba den un cas of apartamento (13.8%). E resto ta biba sea den un camber (room of cuarto; 1.3%), trailer of container (1.8%), otro tipo di acomodacion (0.2%) y tabatin 0.1% cu no a bisa.
Den total, tabatin 38,830 hogar, den cual un poblacion di 107.221 ta biba.
Noord/Tanki Leendert: e region mas pobla
Den e datonan tocante e cantidad di persona pa region y tipo di vivienda, por nota cu mayoria di hende ta biba den region di Noord/Tanki Leendert. Den e area aki, tin 8,603 vivienda, den cual 24,140 persona ta biba. Di nan, 6,430 ta biba den un cas, 1,767 den un apartamento, 229 den trailer/container, 93 den room, 32 den cuarto, 41 den otro tipo di vivienda, y 11 no a contesta.
E di dos region mas pobla na Aruba ta Oranjestad West, cu 5,195 hogar, den cual 13,713 persona ta biba. Na Oranjestad East a registra 5,526 hogar, den cual 14,659 persona ta biba. Santa Cruz tabatin 5,194 hogar (15,202 persona); sigui pa Paradera cu 4,690 hogar (13,756 persona); Savaneta cu 4,288 hogar (11,819 persona); nort di San Nicolas cu 3,620 hogar (9,597 persona) y sur di San Nicolas cu 1,668 hogar (4,219 persona).
