(AFP)—Un hues na Merca a manda seis departamento federal reinstala miles di empleado den periodo di prueba cu a ser despedi como parti di e esfuerso di presidente Donald Trump pa reduci e tamaño y alcance di gobierno.
E orden ta e perdido hudicial mas recien di e administracion, despues di un serie di bataya legal cu, sinembargo, aparentemente no a frena e ritmo di e cambionan.
Hues William Alsup a bisa cu e motibo pa “prestacion malo” pa e despedidonan masivo luna pasa tabata “un engaño pa purba evita e rekisitonan legal,” segun New York Times.
Den su decision den un caso presenta pa sindicatonan di empleadonan, Alsup a manda e departamento di Tesoreria, Asuntonan di Veteranonan, Agricultura, Defensa, Energia y Asunto Interior pa reinstala tur esnan cu tabata den un periodo di prueba y a ser despedi indebidamente.
“Ta un dia tristo ora cu nos gobierno ta despedi di un bon empleado y ta bisa cu tabata pa motibo di prestacion, mientras nan mes sa bon cu esaki ta un mentira,” Alsup a bisa durante un sesion den Corte di Districto di San Francisco.
Desde su regreso na e Cas Blanco na januari, Trump a tuma un posicion agresivo contra e gobierno di Merca, cortando gastonan y despidiendo dies miles di empleadonan di e mas di 2 miyon cu ta parti di e payroll federal.
Nan accionnan a enfrenta resistencia di e cortenan, cu varios hues emitiendo un serie di mandato pa stop nan. Luna pasa, Alsup a manda e gobierno federal pa anula mandatonan cu a resulta den despedidonan masivo.
Ayera, el a bisa cu e gobierno ta den su derecho pa reduci personal, pero cu esaki mester ser haci manera corectamente y cu un hustificacion legal – el a menciona cu e mandatonan di “reduccion di personal” emiti pa algun departamento tabata rutanan legal. “Si bo ta hacie na un manera corecto, por tin un reduccion di personal den un agencia, esey ta un hecho,” el a bisa.
“E Congreso mes a bisa cu un agencia por haci un reduccion di personal, si e ta hacie segun ley.” Pero esey no tabata e caso cu e ordennan emiti pa e Oficina di Maneho di Personal (OPM) – e entidad di recurso humano di e gobierno – cual segun e hues, a surpasa su poder.
Abogadonan di e Departamento di Husticia, representando e administracion di Trump, a insisti cu OPM nunca a emiti orden, sino solamente guia, segun Washington Post.
Pero, segun e corant, documentonan di corte a mustra cu oficialnan di departamentonan manera IRS, Departamento di Defensa y Asuntonan di Veteranonan a contradici esaki, bisando cu e orden pa despedi di empleadonan den periodo di prueba a bini directamente for di OPM.
Trump – ken ta ricibi sosten di Elon Musk – a tuma un rumbo pa transforma fundamentalmente e gobierno di Merca den un manera cu e ta afirma lo hacie mas eficiente, pero cu su opositornan ta considera como un intento pa mina su mesun funcion.
E esfuerso aki a haya su ultimo expresion e siman aki ora cu e Departamento di Educacion a anuncia cu el a recorta su personal na mita, un paso cu e Secretario di Educacion a describi como e prome paso pa cera completamente e departamento.
A pesar di e riesgo grandi, Trump no ta enfrentando hopi obstaculo di e establecimento politico di Washington.
E partido Democrata ta den caos despues di nan perdida electoral y su partido Republicano ta parce dispuesto pa laga e poder legislativo den man di e esun ehecutivo.
