E caso reciente di Sudiksha Konanki, un studiante universitario Mericano cu a desaparece durante su vakantie di ‘spring break’ na Merca, a pone Mericanonan recorda e caso di Natalee Holloway, cu a desaparece na Aruba 20 aña pasa. Mama di Natalee y un investigador cu a traha riba su desaparicion a bin dilanti e siman aki pa papia tocante e diferencia y similaridad entre e casonan.

The New York Post a papia cu un investigador priva cu a traha pa famia di Natalee Holloway, kende ta ofreciendo pa yuda den e desaparicion di Konanki – pasobra e ta teme cu probablemente el a keda secuestra.

TJ Ward, kende a yuda mayornan di Holloway tempo cu el a desaparece na Aruba 20 aña pasa, a bisa dialuna cu el a “tuma contacto cu famia” Konaki, pa “purba yuda nan ubica nan yiu muher” den Republica Dominicana.

E investigador priva ta di acuerdo cu famia di e studiante desaparecido, cu algo teribel por a sucede. “Mi no ta kere el a hoga den ocean,” Ward a bisa, agregando cu “hoga lo ta un di e ultimo cosnan cu mi lo pensa aworaki.”

“Mi ta kere totalmente cu un persona sa algo, unda e ta, of un hende a bay cune, of un hende tine algun caminda.”

Autoridadnan local a sugeri cu Konanki por a hoga pasobra a mir’e ultimo riba beach – aparentemente cu un homber jong – alrededor di 4am despues di un anochi cu amigonan.

Sinembargo, Ward a bisa, “si e lo a bay den awa [y hoga], su curpa lo a sali un caminda cu e coriente di e manera cu ta yega den e isla.”

Desaparicion di Konanki tin algun similaridad cu esun di Holloway, incluyendo cu ambos muher a biaha na un resort den Caribe cu nan compañeronan di scol, The New York Post a nota. Ambos muhe tambe a desaparece riba beach e anochi despues di keda laat cu amigonan.

E caso di Holloway a yega na un conclusion horibel aña pasa, despues cu e sospechoso pa hopi tempo den su desaparicion, Joran van der Sloot, a confesa di a mat’e.

Di su banda, Beth Holloway, mama di Natalee, a bisa Fox News cu tin un diferencia clave den e buskeda pa su yiu Natalee 20 aña pasa, y e buskeda pa Sudiksha Konanki na Republica Dominicana.

E caso di Konanki a keda vincula na esun di Holloway pa motibo di e similaridadnan.

Pero Beth Holloway a bisa: “E famia [di Konanki] ta hopi afortuna di tin un embahada Mericano eynan pa traha cune. Ami no tabatin esey na Aruba.”

Natalee Holloway a desaparece durante un biahe di graduacion di scol secundario, mientras Konanki a desaparece durante un biahe di ‘spring break’ cu su amigonan di Universidad di Pittsburgh.

Ultimo biaha cu a mira na bida dia 30 di mei 2005, saliendo di un bar cu Van der Sloot. E tabata e principal sospechoso den su desaparicion pa e siguiente 18 aña y finalmente a admiti di a mat’e den un confesion dia 3 di october 2023, publica despues cu el a admiti culpabilidad den e caso di extorsion.

Desde asesinato di su yiu, Beth Holloway ta boga den su nomber y a bisa cu e desaparicion di Konanki, di 20 aña di edad, mester ta un advertencia pa biaheronan.
“Mi a crea e plan di seguridad ‘full-circle’ pa biahero y ciudadanonan di tur edad pa recorda nan pa pasa mesun hopi tempo den plania e fin di e biahe cu nan ta haci planea unda pa bay, kico pa bisti y cu ken nan ta bay,” Holloway a bisa.

Tata di Konanki, Subbarayudu Konanki, a haci un yamado pa autoridadnan amplia nan investigacion. “Ta cuatro dia caba, y si e tabata den awa, probablemente e lo a sali na e beach,” el a bisa. “No a hay’e, pues nos ta pidiendo nan pa investiga diferente opcion, manera secuestro.”