Ayera mainta Comerciante Uni Aruba (CUA) a tene un conferencia di prensa durante cual a trece dilanti informacion nobo relaciona cu e cobransa di transaccion di banconan relaciona cu e cambio di debit card for di maestro pa master card of visa.

Manera ta conoci desde aña pasa CUA a trece dilanti e tema di cobransa di banco cu banconan a introduci pa motibo di e cambio di debit card for di maestro pa master card of visa. Recientemente tabata circula mas informacion riba Facebook tocante e tema aki.

Presidente CUA, Frans Ponson, a remarca cu CUA ta representa un cantidad grandi di companianan chikito, y ta hustamente companianan chikito ta esunnan cu a bolbe trece informacion pa dilanti cu a lanta preocupacion pa e organisacion.

El a splica cu ta asina cu tur comerciante a ricibi un carta for di tur e banconan cu ta indica cu entrante 1 di april e cifra di e cobransa di transaccion bancario ta bay cambia fisicamente. E cifra aki, e prijs di e cobransa, ta varia te cu 4%, pues tin banco ta cobra 4% y tin otro cu por cobra 2%, y dependiendo di e carchi tambe e suma por ta mas abou.

Ponson a indica cu CUA a haci un calculacion usando e sumanan menciona, pa demostra pueblo, y tambe pa comerciantenan wak, kico ta bay bira e gastonan incluyendo e cobransa aki.

El a splica cu na 2007, ora e ley di BBO a drenta na vigor, niun hende no a pensa cu e BBO ta bay crece asina hopi, ni cu e problemanan aki cobransa di banco ta bay crece. E prome calculacion ta basa riba un cobransa di 2% di banco. Den e caso aki si e comerciante kier keda cu 100 florin, e lo mester cobra e consumidor 9.9% adicional pa epor keda cu e 100 florin cu e tabata kier keda cune pasobra di e 109.9%, di esey mester sali e suma pa paga BBO, cu ta 7%, y e suma cu banco ta cobra cu 2%.

E otro calculacion ta basa riba cobransa di 4% di banco. Den esaki, el a splica, cu si e banco ta cobra 4% y e consumidor ta bay swipe su debit card, total e comerciante mester cobra e consumidor 12.36% pa e por resta loke e tabata kier resta.

Ponson a indica cu aworaki tambe ta resulta cu e comerciante ta paga BBO riba e cobransa di banco aki, locual ta nifica cu e comerciante lo mester pasa esey tambe pa e consumidor.

El a splica cu nan haya un ley cu a hala nan atencion y kier a trece esaki dilanti, y na atencion di gobierno. El a sigui splica cu e ley aki cu gobierno a pasa ta duna tur banco “vrijstelling” di paga BBO riba e transaccion aki.

El a remarca cu esaki ta bon pasobra nan ta compronde cu riba cash no ta paga BBO, no tin cobro di transaccion riba dje, pero door cu banco ta bay cobra e 4%, of 3%, of 2% of sea ta 1%, na momento cu e comerciante paga DIMP, tur comerciante tin cu paga BBO ariba e cobransa di transaccion bancario aki.

“Esey kiermen cu banco no tin cu pag’e, pero e comerciante si tin cu paga DIMP. Nos ta haya si banco no ta paga BBO riba un cobransa di transaccion, nos tin cu exclui e comerciante tambe di e BBO riba e cobransa di transaccion. Banco ta cobra nos e cobransa di transaccion y ami mester cobra e pueblo BBO ariba dje y duna belasting,” el a indica.

Ponson a menciona cu nan a tuma nota di un video riba rednan social den cual minister di Asuntonan Economico a bisa cu nan tin un ley cla caba cu ta bay proteha e consumidor, cual el a expresa nan ta contento di tende.

Pero na mesun momento el a subraya cu CUA ta wardando pa wak ken ta bira minister di Finanzas pa sinta cune di biaha pa trece dilanti cerca gobierno cu banco no ta pagando BBO riba e cobransa di transaccion, pero comerciante si locual ta nifica cu e comerciante mester cobra pueblo esey tambe. “Kiermen ta keda mesun leu pasobra pueblo ta paga p’e toch. Comerciante tambe mester haya e beneficio di trek af esaki fin di luna,” el a bisa.

El a remarca cu ta importante pa pasa e ley aki lihe, teniendo na cuenta cu banco su notificacion ta bisa 1 di april, cual ta hopi cerca. El a agrega cu ya caba varios negoshi ta pidi cash, en bes di swipe carchi pasobra si no, comerciantenan lo mester aumenta nan prijs.

Ponson a splica cu comerciantenan no kier aumenta y mas bien ta prefera di laga e cobransa di e transaccion pafo di e prijs, manera a bisa anteriormente pa haci cu e BBO, y si bin cu carchi ta cobra e suma di transaccion apart. Pero segun el a indica, banco ni gobierno no kier hacie asina y kier pa sconde e cobransa den e prijs.

“Gobierno mester atende cu e cos ki pasobra 1 di april ta hopi cerca. Hopi prijs lo bay subi mirando cada banco e cobransa nan ki y cada banco por cobra loke nan kier, pasobra nan tambe ta comerciante, pero si un comerciante ta ser cobra e cobransa di banconan aki. Final di dia e persona cu ta bende un hamburger banda di caminda tin cu hinca tur su gastonan aden, e tin cu hinca e gasto di cobransa di banco, e tin cu hinca e BBO cu e ta pasa na gobierno, prijsnan ta bay subi,” el a enfatisa.