(AFP)—Ucrania a bisa cu e charla cu Merca na Saudi Arabia tabata progresando di manera “constructivo” ayera, cu un posible tregua parcial cu Rusia riba mesa despues cu Kyiv a haci su atake di drone mas grandi riba Moscu durante tres aña di guera.
Secretario di Estado Mericano Marco Rubio y minister di Asuntonan Exterior di Ucrania, Andriy Sybiga, a asisti e reunion na Yeda—sin participacion di Rusia—mientras Presidente Donald Trump tabata aumentando presion riba Ucrania pa caba e guera cu a cuminsa cu e invasion Ruso na 2022.
E discusion ta sigui despues cu presidente Volodymyr Zelensky a ricibi un reprimenda publico den e Cas Blanco, despues di cual Merca a corta ayuda militar, comparticion di informacion di inteligencia y acceso na imagennan di satelite.
Ucrania ta spera cu e oferta di un tregua parcial den aire y riba lama lo convence Washington pa restaura su ayudo.
“Nos ta cla pa haci tur cos pa logra yega na paz,” hefe di gabinete presidencial di Ucrania, Andriy Yermak, a conta periodistanan ora el a drenta e reunion ayera.
Un oficial Ucraniano, ken a pidi pa anonimidad, a conta AFP despues cu e discusion “a bay bon, a discuti hopi punto di preocupacion.”
Kyiv a bisa cu e “atake mas grandi di drone den historia,” den cual centenares di drone a dal Moscu y otro area durante oranan di anochi, tabata diseña pa forsa presidente Ruso Vladimir Putin pa acorda na un tregua aereo y marino.
“Esey ta un señal adicional pa Putin cu e mes mester ta interesa den un tregua aereo,” segun Andriy Kovalenko, un oficial di e conseho di seguridad nacional encarga di combati desinformacion.
Tres hende a perde nan bida den e atake, cual segun tanto Ucrania como Rusia, tabata e di mas grandi riba Moscu te awor. E ehercito Ruso a bisa cu nan a intercepta 337 drone den diferente parti di e pais.
Acuerdo di mineral
Zelensky, ken a topa cu e gobernante di facto di Saudi Arabia na Yeda ayera, a sali for di e Casa Blanco luna pasa sin firma un acuerdo pusha pa Trump cu lo duna Merca control riba e recurso mineralnan di Ucrania.
Zelensky a bisa cu e ainda ta dispuesto pa firma, aunke Rubio a bisa cu e asuntonan ey no ta e enfoke di e reunion ayera. Rubio, ken a ser acompaña pa e asesor di seguridad nacional Mike Waltz, a bisa cu e suspension di e yudansa “ta algo cu mi ta spera nos por resolve” den e discusion. “Mi ta spera pa nos tene un bon reunion y bon noticianan pa reporta,” Rubio a bisa ayera prome cu e reunion.
Rubio a agrega cu Merca no a corta e informacion di inteligencia pa operacionnan defensivo. “E reunion cu e equipo Mericano a cuminsa di manera hopi constructivo, y nos ta sigui traha,” Yermak a bisa riba red social ayera.
Ora a puntr’e si e atake di drone por daña e discusionnan di paz, vocero di Kremlin, Dmitri Peskov, a bisa: “No tin ningun (discusion di paz ainda, pues no tin nada pa daña.”
El a rechasa anteriormente pa comenta riba e posicion di Rusia tocante e tregua parcial proponi. “Ta completamente imposible pa papia di posicionnan ainda,” el a bisa.
“Mericanonan lo descubri solamente awe, segun nan mes ta bisa, di parti di Ucrania, te ki punto Ucrania ta dispuesto pa yega na paz.”
Di su banda, Rusia a intensifica su atake riba infrastructura di Ucrania, y a bisa cu el a recaptura 12 asientamento den e region Kursk cu Ucrania tabata controla pa busca mas bentaha den e negociacionnan.
Rubio ta busca pa ‘concesion’
Den e reunion den e Cas Blanco luna pasa, Zelensky a rechasa di keda keto durante e critica di vice-presidente JD Vance, cu e lider Ucraniano cuestionando dicon su pais mester confia riba e promesanan di Rusia.
Despues, el a manda un carta di disculpa na Trump.
Enfrenta cu e presion di Washington, Ucrania ta bay presenta su apoyo pa un tregua limita den aire y riba lama, un oficial Ucraniano a conta AFP riba dialuna. Rubio a indica cu e administracion di Trump probablemente lo ta satisfecho cu un proposicion asina.
“Mi no ta bisa cu solamente esey ta suficiente, pero ta e tipo di concesion cu mester mira pa por caba cu e conflicto,” el a conta periodistanan. “Bo no ta bay haya un tregua ni un fin di e guera si no tin concesion di ambos banda.”
Rubio a bisa cu e no ta anticipa pa “pinta un liña riba mapa” pa un acuerdo final den e reunion na Yeda, pero el a bisa cu e lo hiba e ideanan na Rusia.
Rubio y Waltz a reuni luna pasa cu oficialnan di Rusia, tambe na Saudi Arabia, terminando un periodo sin contacto cu a ser imponi pa ex-presidente Joe Biden despues cu Rusia a desafia e advertencianan di e West y a lansa su invasion.
Siman pasa Trump tambe a menasa mas sancion riba Rusia pa forsa e nacion sinta na mesa mientras nan tabata sigui ataca Ucrania.
Pero e cambio rapido den e politica Mericano—incluyendo su sugerencia pa Ucrania ta culpable pa e guera, y recientemente a bandona Ucrania pa ONU— a laga hopi aliado sorprendi
Rubio a bisa dialuna cu Merca tambe lo opone contra e uso di “lenguahe antagonista” riba Rusia den un proximo encuentro di e ministernan di Asunto Exterior di e bloc G7.
