Mucha hospitalisa pa atake di cacho; Comunidad ta cuestiona e efectividad di Ley di Cacho

Diabierna tardi a drenta informe di cu un cacho a ataca un mucha na Piedra Plat, cu resultado cu e mucha mester a bay hospital pa tratamento. E suceso aki a sacudi comunidad, y hopi a cuestiona e efectividad di e Ley di Cacho.

Diabierna tardi, polis y ambulance a responde na un melding di un atake di cacho. Na yegada di e patruya a bin compronde cu e doñonan di e cacho un biaha mas a laga e porta habri y e cacho a sali y bay ataca muchanan hungando den e bario.

Un di e muchanan a logra scapa for di e cacho ,pero un otro mucha su man a keda casi completamente destrosa. E habitantenan di e bario mesora a sali pa yuda e mucha ataca.

Na yegada di ambulance, mesora a cuminsa duna prome auxilio na e mucha herida, y a transport’e pa hospital pa atencion medico avansa.

Informacion ricibi pa Bon Dia Aruba ta indica cu riba e mesun dia, na Santa Cruz so, tabatin tres caso di cacho cu a ataca hende. Na Cas Ariba, banda di e Misa Protestant na Piedra Plat y awor na Piedra Plat tambe, unda eynan na varios ocasion ta laga e porta habri pa e cacho sali.

Mester remarca cu den caso lamentable asina, e cacho no ta responsable pa su actonan. E doño di e cacho mester para responsable pa cualkier daño cu e animal a causa, maske den e caso aki, e cacho mes mester a paga cu su bida pa e iresponsabilidad di su doñonan. Entre tanto, no a bira conoci ki consecuencia of castigo e doño di e cacho den e caso aki lo enfrenta.

Ley di cacho
Inicialmente, ley di cacho a keda introduci na aña 2015. Pero na 2024, minister di Naturalesa, Ursell Arends (Raiz) a reemplasa e ley antiguo cu uno mehora. E ley nobo ta enfoca riba bienestar animal y riba combati e raiz di e problema cu cacho riba caya. Y un di e puntonan expresamente den e ley, ta cu cacho mester ta cera den cura di cas na tur momento.

Sinembargo, keto bay e implementacion di e ley, of e cumplimento di esaki, ta kedando atras. Hopi biaha ta tende cu ta polis di bario ta encarga cu violacionnan di ley di cacho; sinembargo, hopi ciudadano ta reporta cu nan kehonan ta keda sin haya oido, y e problema ta persisti. A bira ora pa trece castigo fuerte y pisa contra violacionnan di e ley di cacho, de lo contrario, e ta keda un idea bunita sin ningun efecto.