Diabierna atardi a tuma luga e protesta pasivo “Justice for Ayden”, den nomber y feliz memoria di e hoben Ayden Lanoy di 19 aña ken a perde su bida durante un tiroteo fatal cu polis despues di un persecucion automobilistico. Na final di e protesta aki a haci entrega di un manifesto na presidente di parlamento, sra. Gerlien Croes.

Manera ta conoci ya caba pa algun tempo a bin ta anuncia e realisacion di un protesta pasivo cu ta carga e lema “Justice for Ayden” despues cu e hoben a perde su bida di un manera tragico y incomprendibel.

E protesta, cu a sali for di Corte di Prome Instancia di Aruba a termina dilanti di Parlamento di Aruba caminda cu e famia, sernan keri, amistad- y conocirnan di Ayden a ser ricibi pa presidente di parlamento y fraccion AVP, y Alto Comisario Ramon Arnhem tambe a presenta na parlamento.

Un hecho cu a disgusta e manifestantenan ta cu di 21 parlamentario solamente tres, entre nan presidente di parlamento, a sali y haci acto di presencia. Ningun otro parlamentario, ni un di fraccion MEP ni fraccion PPA a haci acto di presencia, cual e manifestantenan a sinti ta un falta di solidaridad enorme.

E manifesto entrega na presidente di parlamento como tambe na Alto Comisiario Arnhem ta pidi husticia pa e hoben Ayden Lanoy y ademas ta presenta puntonan cu e grupo di manifestante kier mira cambia den e sistema hudicial pa evita cu un suceso asina lamentabel ta bolbe ripiti un biaha mas. Tanto presidente di parlamento, Alto Comisiario y demas agentenan policial presente a firma e peticion pa sostene e puntonan di cambio presenta den e manifesto aki.

E manifesto ta remarca cu ciudadanonan a perde nan confiansa den estado di derecho, y pa bon motibo. E documento ta subraya cu e principionan fundamental di e orden huridico democratico, husticia, transparencia y igualdad a ser trapa. Ademas ta enfatisa cu te ainda falta contesta crucial tocante e integridad di e investigacion andando riba e sospechosonan.

E manifesto, sosteni pa miles di persona cu a firma esaki, ta exigi pa e fiscal publico y e minister di Husticia implementa e siguiente medidanan: bodycams obligatorio pa cada agente policial entrante 1 di juli 2025; dashcam obligatorio den tur vehiculo polis entrante 1 di augustus 2025; testnan psicologico estricto cada dos aña pa agentenan policial; publicacion inmediato di e inicialnan di e sospechosonan door di Ministerio Publico; y publicacion inmediato di e acusacionnan contra e sospechosonan door di Ministerio Publico.

Tabata diadomingo 9 di februari 2025 den oranan di mainta cu un tiroteo a tuma lugar, caminda e hoben A.C. Lanoy di 19 aña di edad a ser alcansa pa balanan policial, y a fayece. Esaki a hiba na gran emocion y na hopi tristesa cerca su famia y den comunidad completo.

Diamars 4 di maart, Parlamento di Aruba a tene un reunion publico tocante e suceso lamentabel aki durante cual minister di Husticia demisionario, Rocco, Tjon, a contesta varios pregunta relaciona cu e caso. Un di e preguntanan cu mas a bin dilanti ta con por sigura transparencia durante e investigacion, mirando cu e caso ta envolve dos agente policial.

Di su banda, minister Tjon a sigura cu e investigacion ta tuma luga di manera transparente, bou guia di Landsrecherche y Ministerio Publico, y no ta conta cu envolvimento di Cuerpo Policial. Ademas a remarca e importancia pa e investigacion no ser contamina di ningun manera, un di e motibonan pakico ningun di e instancianan ta comparti informacion ainda di e investigacion, pa asina por usa e hallazgonan den corte, si ta yega asina leu.

En conexion cu esaki tambe Ministerio Publico (OM), mediante un comunicado di prensa, a indica cu nan a tuma nota cu den comunidad ta existi indignacion pa e falta di transparencia den investigacionnan penal y cu no semper comunidad tin comprension pa e tempo cu autoridadnan ta tuma pa investiga.

“Ministerio Publico mester tene cuenta cu varios interes den un investigacion. Sigur den e fase inicial un investigacion generalmente no ta duna espacio pa divulga informacion tocante e contenido. Door di haci declaracionnan tocante un investigacion cu ta andando, testigonan (por ehempel) por wordo influencia y esey ta perhudica e buskeda di e berdad,” OM a bisa.

OM a remarca cu pa motibo di obligacion legal di confidencialidad, y derecho di proteccion di privacidad di victimanan of nan famia y tambe sospechosonan, generalmente no ta divulga nomber- of potretnan di e sospechosonan ni di e victimanan. “E no ta pa ta misterioso, sino pa proteha privacidad di tur esnan involucra,” OM a bisa.

Adicionalmente OM a indica cu investigacionnan penal sa dura largo, locual por ta debi na e hecho cu ta trata di un investigacion complica of pasobra mester haci investigacion tecnico. Un investigacion tecnico por tuma hopi tempo, e a sigui splica, specialmente si ta investigacion tecnico complica cu mester ser haci pa NFI (Nederlands Forensisch Instituut, Instituto Forense) na Hulanda.

OM a agrega cu su capacidad ta limita, pasobra, entre otro, no tur funcion den e formacion di OM ta cubri, debi na insuficiente presupuesto disponibel. Door di esaki OM ta bin ta lidiando añanan largo caba cu un falta structural di personal.

“No obstante, Ministerio Publico lo sigui traha incansablemente pa un sociedad husto, semper teniendo cuenta cu e interesnan di e victimanan, e famia y e sospechosonan,” e comunicado a finalisa.

Riba rednan social algun ciudadano a expresa nan tristesa y disgusto pa mira cuanto persona a uni na e protesta pasivo aki. E cantidad di persona no tabata tanto manera cu lo tabata desea of spera, y a hasta trece dilanti comparacion di con hopi persona a sali riba caya pa e protesta pidiendo husticia pa e cacho “Khaleesi” cu a ser maltrata y cu a muri a consecuencia di e maltrato severo.

Pero pa protesta pa husticia pa un ser humano, un hoben di 19 aña cu a perde su bida di un manera cruel, un morto cu tabatin impacto riba un mama, tata, famia completo y hasta supuestamente comunidad, pueblo no a sali pa demostra nan apoyo y solidaridad di manera cu a spera of tabata desea.