(NLTimes) – E Secretario di Estado pa Hubentud y Prevencion, Vincent Karremans, kier pa e screening di mayornan di criansa ta mas regular y mas estricto, asina el a declara den un debate den Tweede Kamer tocante e mucha muhe di criansa seriamente abusa na Vlaardingen. Karremans y su colega Secretario di Estado Teun Struycken a papia cu e mama biologico di e mucha muhe y tabata mustra visiblemente sacudi ora nan a papia tocante e asunto den e camara mas abou di parlamento Hulandes.

Karremans ta pushando pa controlnan continuo di si mayornan di criansa tin un antecedente penal y kier pa e resultadonan anterior como mayornan di criansa tambe ser tuma na cuenta. E miembro di partido VVD a agrega cu e ta sinti cu de bes en cuando mester bin control pa wak si e mayornan di criansa ta adecua ainda.

Struycken tabata mustra visiblemente altera pa e reunion cu e dos Secretario di Estado tabatin cu e mama di e mucha muhe maltrata. “Esey tabata, un seconde, un reunion emocional pa nos tur dos,” Struycken a bisa durante e debate parlamentario tocante e asunto.

E señora a duna señal cu e tabata sinti cu su yiu ta ser maltrata, pero su preocupacionnan no a ser scucha. E ta contento cu awor ta kere den dje y cu su sufrimento ta ser reconoci, un vocero a bisa.

Organisacionnan responsabel pa proteccion di hobennan y cuido di criansa a admiti fracaso severo den e caso di un mucha muhe di 10 aña di Vlaardingen, cu a sufri abuso extremo na man di su mayornan di criansa. E mucha lo keda den cuido intensivo, permanentemente dependiente di sosten medico, mientras autoridadnan ta investiga fayonan extenso dentro di e sistema.

Durante un encuentro cu Tweede Kamer, representantenan di William Schrikker Stichting (WSS), organisacion di cuido di criansa Enver, y centro di reportahe Veilig Thuis a reconoce cu nan no a actua decisivo a pesar di multiple advertencia. “Horibel, e ta kibra bo curason, completamente inaceptabel, y un desvio grave di deber,” representantenan di e instancianan a bisa mientras cu e legisladornan tabata presiona nan riba con un negligencia asina severo por a sucede. Parlamentarionan a cita por lo menos 23 momento critico caminda intervencion mester a tuma luga pero no a tuma luga, loke a conduci na consecuencianan catastrofico.

E mucha a sufri lunanan di abuso den su cas di criansa, incluyendo asaltonan fisico, hamber, y ser cera den un cashi di electricidad. Su condicion a deteriora asina severamente cu ora el a ser hospitalisa finalmente na mei 2024, e tabata den coma, severamente malnutri, y tabata pisa solamente 20 kilo. Daño cerebral y multiple fractura a lag’e den necesidad di cuido intensivo pa henter su bida.

Un di e fayonan mas alarmante tabata encera un video cu ta mustra e mucha ta dal su cabes riba vloer ripitidamente. Un cientifico di comportacion na WSS a mira e imagennan y a informa esaki na Enver via email. Sinembargo, Enver nunca no a contesta. “Incomprendibel,” un legislador di CDA a bisa, cuestionando dicon no a tuma accion inmediato.

Esther Reinhard di Enver a admiti cu e email por a bay perdi durante un transicion entre trahadonan di caso. “Esaki no ta un excuus. E no mester a sucede nunca. E falta di supervision riba e protector di hoben responsabel ta inaceptabel. E protocol di reportahe obligatorio no a ser sigui, y no a consulta ningun cientifico di comportacion.”

E mayornan di criansa di e mucha muhe, Johnny van den B. y Daisy W., tur dos di 38 aña, a keda aresta despues di su hospitalisacion. E investigacion a revela cu supuestamente nan a abusa di tres otro mucha den nan cuido: dos mucha homber y e ruman muhe di e mucha muhe.

E mucha hombernan, di 11 y 5 aña di edad e tempo ey, segun informe a ser someti na golpi severo, forsa pa drumi den un kennel di cacha, kima cu sigaria, y a ser nenga cuminda. E abuso a tuma luga entre juli y september 2021. Un psicologo cu a trata un di e mucha hombernan despues a duna evidencia di video den cual e mucha a describi e abuso den detaye.

E ruman muhe di e mucha muhe, cu tabatin 2 y 3 aña di edad durante e periodo di abuso di maart 2022 pa december 2023, tambe a ser agredi segun informe. OM (Ministerio Publico) a declara cu e mayornan di criansa a skop’e, a fors’e pa para den un baki yen di su propio sushi, y a feita su cabes como castigo.

Un rapport condenatorio di Inspeccion di Cuido di Salud Hulandes (IGJ) y Inspeccion di Husticia y Seguridad (IJV) a detaya un periodo di seis luna durante cual e mucha a keda sin supervision adecua. A pesar di varios grito pa yudansa, instancianan no a logra actua. E rapport a confirma cu WSS y Enver a ignora señalnan di advertencia y no a logra monitoria e seguridad di e mucha muhe.

E trahado di caso di e mucha, identifica solamente como “Rob,” a hunga un rol crucial den e fayo di e sistema. Enbes di proteha e mucha muhe, segun e informe el a desaroya un relacion personal cu e mayornan di criansa, descartando e informenan di abuso. Ora e mama biologico di e mucha a expresa su preocupacionnan ripitidamente, el a ser ignora.

Autoridadnan tabatin conocemento anterior di abuso dentro di e cas di criansa. Na 2021, Enver a pone tres ruman homber Sirio cu e mesun mayornan di criansa. Informenan a surgi di maltrato severo, incluyendo hamber y ceramento den un kennel di cacho. Polis a urgi e instancia di proteccion hubenil Nidos pa haci acusacionnan, pero no a tuma accion legal. Seis luna despues, a pesar di e informenan aki, “Rob” a aproba e ponemento di e mucha muhe di 10 aña y su ruman muhe den e mesun cas.

E mucha a haci varios intento pa busca ayudo. Na december 2024, el a confia un empleado di supermercado cu e tabata ser maltrata. Polis a ser alerta y a documenta heridanan visibel pero a determina cu no tabatin suficiente evidencia pa interveni. Mas o menos e mesun tempo, el a bisa personal di scol cu e tabata ser forsa pa para pafo sunu den winter como castigo. En bes di raporta esaki, e scol a consulta su mama di criansa y a mand’e cas back.

Den un incidente separa, e mucha muhe a suplica hendenan desconoci na un centro comercial pa yud’e. Atrobe, el a ser debolbi na su famia di criansa sin mas investigacion.

Ministerio Publico a acusa e mayornan di criansa di intento di homicidio imboluntario, asalto severo, privacion ilegal di libertad, y causa daño corporal grave. E caso ta programa pa un audiencia completo riba 6 y 7 di november, cu un fecha di corte adicional fiha pa 11 di november. Un audiencia preparatorio ta programa pa 7 di mei.

Mientras tanto, WSS y Enver a ser poni bou di supervision intensivo pa garantisa cu mehoracionnan proponi ta ser implementa. WSS tabata bou di control caba for di 2020, pero a pesar di intervencionnan anterior, e instancia no a logra preveni mas tragedia. “Nos a mehora procesonan interno y a redobla e cantidad di cientificonan di comportamento,” asina Pim Croiset van Uchelen di WSS a bisa. “Pero e no tabata suficiente. Nos mester haci mas.”