Ayera mainta minister di Transporte, Integridad, Naturalesa y Asuntonan di Adulto Mayor demisionario, Ursell Arends, a duna su ultimo conferencia di prensa como minister den cual el a elabora riba e ultimo desaroyo di Serlimar.
E mandatario a presenta un evaluacion di e trayecto di e compania y con a compania ta para aworaki na final di su mandato.
El a splica cu na 2021 ora el a asumi e responsabilidad di minister di Naturalesa el a encontra un compania cu tabatin 21 miyon florin den debe den surseance van betalling. E opcionnan cu tabatin tabata sea laga e compania bay bancarota of ta tuma e stapnan pa rescata esaki.
Serlimar a ser estableci na 2005 cu e meta pa colecta y maneha desperdicio di un forma eficiente segun e normanan di medio ambiente vigente e tempo ey. Minister Arends a splica cu Gobierno di Aruba a dirigi e trabounan di Serlimar via un contrato di suministro di servicio, y adicionalmente tur aña na final di aña tabata rekeri tambe pa gobierno contribui financieramente.
El a remarca cu den e ultimo añanan Serlimar a logra mehora considerablemente su situacion financiero, sinembargo, el a indica, ainda tin mas espacio y oportunidadnan pa implementa e disciplina financiero.
El a splica cu actualmente e enfoke di Serlimar ta primordialmente coleccion di desperdicio, pero aworaki cu nan a mehora nan situacion financiero, el a sugeri, cu e compania mester drenta back den procesamento di desperdicio tambe.
Minister Arends a indica cu durante e ultimo cuater aña a enfoca riba cinco pilar strategico pa pone e compania para bek fuertemente y financieramente riba su pia.
E prome pilar strategico tabata pa revisa e landsverordening di Serlimar di 2005. E meta di esaki tabata pa brinda e compania espacio pa por opera como un compania estatal. El a splica cu e forma con a haci esaki tabata siguiendo tur e reglanan di good corporate governance.
El a sigui splica cu den e ley di Serlimar, tin un articulo cu ta duna espacio na e minister pa mete directamente den e compania. El a remarca cu for di inicio como minister encarga el a informa e Conseho di Supervision y gerencia cu e no lo haci uso di e articulo aki. Pa e motibo ey tambe, el a indica, a instala un Conseho di Supervision cu ta consisti di profesionalnan pa yuda guia e compania pa pone para bek financieramente riba su pia.
Minister Arends a subraya cu basa riba e ley di 2005 e propuesta cu a ser traha riba dje pa cambio di e ley aki ta duna un miho base legal den e compania y tambe ta dun’e tur espacio pa e por opera na su maximo capacidad manera un empresa comercial lo ser opera.
Pa loke ta e di dos pilar strategico, el a indica cu esaki a enfoca riba e lema “un empleado un empresa.” El a splica cu ora el a encontra e compania aki na 2021 a haya cu tin un cantidad di ambtenaar, pero tambe di arbeidscontratant cu tabata traha eynan, locual el a indica no tabata un manera sano pa opera un compania comercial. Pa e motibo ey nan traha pa implementa un maneho di HR cu ta referi na un tipo di trahado specifico.
El a sigui splica cu Serlimar ya caba a cuminsa stimula e empleadonan publico pa haci uso di e plan di VUT cu gobierno ta propone y Serlimar mes ta cubri e gastonan si e empleadonan ta dicidi di bay cu VUT.
El a menciona cu desde 2021 te cu 2024 a logra reduci e cantidad di trahadonan cu a haci uso di e VUT cu un total di 19%. El a agrega cu ainda tin un total di 33 empleado publico cu ta trahando na Serlimar, locual el a señala tambe tin su consecuencianan cu no ta faborabel pa e trahadonan.
E di tres pilar strategico cu e mandatario a menciona tabata enfoca riba e coleccion di desperdicio como parti di e negoshi principal di Serlimar. El a subraya cu esaki a duna resultado mirando cu Serlimar a reduci su maneho di desperdicio y a pone mas enfoke riba coleccion.
El a splica cu Eco Gas ya caba for di 2020 a asumi responsabilidad di opera Ser’i Teishi, y aworaki e colecta di desperdicio ta e prioridad. El a indica cu e servicio ta ser experiencia como servicio stabiel y cu e comunidad ta satisfecho cu e servicio cu ta ser brinda. El a agrega cu tin espacio ainda pa engrandece y mehora esaki mirando cu na Aruba tin alrededor di 44 mil cas, y aworaki 23 mil di e casnan aki ta cliente di Serlimar.
E di cuater pilar strategico, y un di e enfokenan principal, minister Arends a indica tabata disciplina financiero. El a splica cu como un compania comercial e punto di salida di maneho ta pa subi entrada y reduci gasto. Esaki, el a sigura, tabata algo cu nan a enfoca riba dje conhuntamente cu e Conseho di Supervision y gerencia na Serlimar.
El a indica cu esaki a duna resultado ya cu e dienstverleningovereenkomst cu Serlimar ta depende di dje di ricibi di gobierno a ser reduci substancialmente. El sigui splica cu na 2018 e tabata consisti di 27.4 miyon florin, aworaki e ta na 19.1 miyon florin cu e bista cu ainda esaki por ser reduci hopi mas si gobierno solamente paga pa e servicio cu Serlimar ta brinda gobierno.
Fuera di esaki, el a agrega, e proceso con Serlimar ta cobra cliente tambe a duna resultado door di introduci softwarenan cu por facilita esaki y ademas por mira con e resultadonan aki tambe a ser logra den e periodo di su gobernacion.
Otro aspecto cu e mandatario a menciona ta cu a logra reduci e gastonan substancialmente locual tambe a duna resultado. El a indica cu di 2021 pa 2024 a reduci e dependencia di Serlimar riba fondonan publico di 69% te cu 54%, y a subi su ingreso cu no ta bin di gobierno di 31% te 45%.
Esakinan, el a remarca, ta cambionan substancial di con e compania ta ser opera. Adicionalmente el a menciona cu pa 2024 e compania a termina e aña cu 2.9 miyon florin di ganashi cu lo ser inverti back den e personal pa sigui aumenta e capacidad humano di e personanan cu ta traha na Serlimar y pa haci e compania competitivo back.
E di cinco y ultimo pilar strategico tabata resolve e problema di dump di Parkietenbos, cual el a señala a resulta di ta un mayor contribucion na un sociedad mas limpi. Manera ta conoci Parkietenbos a cera pa desperdicio di cas y tambe desperdicio comercial. El a splica cu e prome fase di sanacion a ser realisa den 2023, y aworaki e sanacion di asbestos ta den preparacion. El a indica cu ya caba e proyecto a ser otorga na un compania, pero nan ta pendiente pa e hinderverguning pa e trabounan aki por cuminsa.
Fuera di esey, el a menciona, un muraya nobo ta ser construi. Ademas Aworaki ta bezig cu eliminacion di backlog di desperdicio medico y carcas y Serlimar ta bezig ta sinta na mesa cu AWSS pa por yega na un acuerdo pa formalisa esaki pa nan por ser procesa debidamente.
