Dia 8 di maart 2025, Soroptimist International Club Aruba (SICA) lo celebra Dia Internacional di Muher cu un evento inspirativo, seccion creativo y oportunidad pa forma relacion y conecta cu otro. E evento lo tuma lugar desde 10:00am te 2.00pm y ta un oportunidad pa bishitantenan conecta, siña di otro y crece. Entrada ta gratis y tur hende ta bon bini. Tur fondo cu lo wordo recauda e dia aki lo wordo uza pa proyectonan pa conscientisacion di mucha- y hende muher pa cu nan desaroyo y crecemento personal.
Keynote Speakers
E dia aki ta nos lo bay tin tres keynote speakers dinamico cu lo comparti nan experiencia y historia pa inspira y motiva hende muhe. Ta trata di Stephanie Croes, Cristina Tromp y Lisen Lalwani. Y nan presentacion ta enfoca riba empoderamento, crecemento personal y liderazgo.
Sesion Creativo di Neurogratics Arts
Na colaboracion cu e artista Jo-ann Kock nos ta ofrece un seccion creativo di NeurograticsArts, unda e participantenan lo tin oportunidad pa descubri nan artista interno y expresa nan mes. E secion aki ta ofrece un oportunidad nobo riba proceso creativo y auto-expresion. E seccion ta costa awg 12.50, cual un parti lo ta wordo uza pa proyectonan di SICA.
Actuacion di studiantenan di Educampus
Un actuacion special di e studiantenan bou di direccion di nan maestra Natusha Croes cu tin un Master in Performance lo ta parti di e programa. E proposito ta pa inspira generacion mas jong y motiva nan pa realisa nan potencial den diferente area.
Stand Informativo
Durante e evento, lo tin diferente stand cu informacion di varios instancia. Esaki ta ofrece e oportunidad pa participantenan pa por conoce mas kico cada instancia ta haci y oportunidadnan pa crecemento personal y tambe iniciativa pa yuda e hende muhe den nan desaroyo profesional.
Oportunidad di Interactua cu Soroptimist International Club of Aruba
Un otro punto di e dia ta e oportunidad pa intercambia cu miembronan di Soroptimist International Club of Aruba. Esaki ta ofrece un plataforma pa hende muher pa comparti nan conocemento y experiencia y traha hunto na proyectonan cu ta fortalece e posicion di e hende muher na Aruba y mundialmente.
E lo ta un dia yena di inspiracion, pa netwerk y crecemento. Bin pa haya informacion nobo, haci contacto interesante y celebra un poderoso Dia di Hende Muhe, hunto cu otro hende muhe.
Fecha: 8 di maart 2025
Ora: 10:00 am – 2:00 pm
Sitio: EduCampus, Aruba
