CBA: Panorama economico mundial ta mustra tendencia di comercio similar na era di Guera Friu

Den su publicacion di State of the Economy mas recien, Banco Central di Aruba a dedica un capitulo na e panorama economico mundial, den cual ta sobresali e desaroyonan economico mas importante proyecta pa e aña aki. Den esaki, a nota señalnan di fragmentacion geoeconomico, unda comercio ta sucede cada bes mas dentro di blokenan geopolitico.

Segun World Econmic Outlook di Fondo Monetario Internacional (IMF) na october, e panorama economico a experimenta cambionan significante den ultimo añanan, impulsa principalmente pa e diferente maneho di politica fiscal y monetario desde pandemia. Banconan Central den mercadonan emergente a tuma e liderazgo den reforsa politica monetario prome cu nan contrapartinan den economianan avansa, conduciendo na tasanan mas halto di politica real y aumento di costo di prestamo, cu a fria actividad economico y a trece inflacion mas cerca di e meta.

Den contraste, politica fiscal a keda relativamente los, particularmente den economianan avansa manera Merca, unda facilidad fiscal a complica e tarea di autoridadnan monetario y a contribui na apreciacion di e dollar na 2024.

Proyeccionnan ta indica cu consolidacion fiscal necesario den cantidad di economianan ta spera di reduci crecemento. E reduccion aki ta duna impulso na politica monetario mas los pa yuda gobiernonan corta deficit mas facilmente. Economia global a mustra resiliencia remarcable durante periodo desinflacionario. Ta spera cu crecemento global ta bay keda stabiel na 3.2 porciento na 2025, igual na e crecemento calcula na 2024.

Tension geopolitico ainda no tabatin impacto significante riba e volumen di comercio global, pero señalnan di fragmentacion geoeconomico ta biniendo dilanti. Comercio ta sucediendo cada bes mas dentro di blokenan geopolitico na lugar di entre nan, un tendencia similar na era di Guera Friu. E fragmentacion aki por interumpi cadenanan di suministro, aumenta costo di financiamento, y reduci e transferencia di conocemento entre economianan avansa y den desaroyo, presentando riesgo na eficiencia di mercado y resiliencia economico. E cambio pa comercio inter-bloc, mientras cu no necesariamente ta conduci na desglobalisacion, por impone costonan economico significante, particularmente den contexto di e transicion berde.

Crecemento den comercio di producto global ta calcula di a baha cu aproximadamente 2.5 porciento mas entre blocnan geopoliticamente distante cu dentro di e blocnan. Crecemento den economianan avansa a baha notablemente na 2023 y ta proyecta di keda stabiel na 1.8 porciento pa 2024 y 2025.

Na Merca, ta spera cu crecemento lo desacelera, cu produccion cayendo potencialmente pa 2029. Na Reino Uni y area di Euro, actividad ta proyecta pa acelera, cerando e gap di produccion for di abao.
Na Hapon, ta spera cu GDP ta bay crece den linea cu potencial, ya cu e gap di produccion ya a cera.

Crecemento proyecta pa Merca na 2024 a keda revisa bay ariba na 2.8 porciento, impulsa pa consumo mas fuerte y inversion no-residencial. Un slowdown na 2.2 porciento ta spera na 2025, mientras politica fiscal ta reforsa y un mercado laboral den friamento ta baha consumo.
Den area di euro, crecemento ta spera di aumenta na 0.8 porciento na 2024 y aumenta na 1.2 porciento na 2025, sosteni pa miho prestacion di exportacion y un demanda domestico mas fuerte.

E pronostico di crecemento pa mercado emergente y economianan den desaroyo ta keda stabiel pa proximo dosña, alrededor di 4.2 porciento na 2024 y 2025.

E crecemento fuerte di Asia emergente ta spera di baha for di 5.7 porciento na 2023 pa 5.0 porciento na 2025, cu e crecemento di GDP di India moderando di 8.2 porciento na 2023 pa 7.0 porciento na 2024 y 6.5 porciento na 2025. E crecemento di China ta proyecta pa baha na 4.8 porciento na 2024 y 4.5 porciento na 2025 pa motibo di debilidad persistente den sector real estate y confiansa abao di consumidor.

Den contraste, crecemento den Medio Oriente y Asia Central ta spera di aumenta di 2.1 porciento na 2023 pa 3.9 porciento na 2025, mientras interupcion temporal den produccion y envio di azeta ta desaparece.

Na Latino America y Caribe, crecemento economico ta pronostica pa baha for di 2.2 porciento na 2023 pa 2.1 porciento na 2024, cu un rebound na 2.5 porciento spera na 2025.

E pronostico di crecemento di Brazil pa 2024 a keda revisa bay ariba na 3.0 porciento, atribui na un consumo priva y inversion mas fuerte pa motibo di un mercado laboral preta, transferencia di gobierno y interupcionnan minimo di inundacion. Sinembargo, ta spera cu crecemento lo slow na 2.2 porciento na 2025, pa motibo di politica monetario restrictivo y un mercado laboral friando.