(AFP) – Deforestacion na Amazon ta causa mas yobida den temporada muha y menos yobida den temporada seco, segun investigacion nobo publica diaranson unda ta enfatisa e rol importante di Amazon den regula e clima local y global.
Perdida di mata rapido den e region Amazon, motiva mas tanto pa agricultura y minamento cu no ta sostenibel, ta debilita Amazon su habilidad di absorbe carbondioxide, cual ta calenta e planeta.
Tambe e ta afecta e patronchi di tempo regional, cu investigacion anterior demostrando cu e reduccion den vegetacion a reduci e awa cu ta absorbe den atmosfera y a causa condicionnan generalmente mas seco.
E estudio nobo, publica den Nature, tabatin intencion di haya un imagen hopi mas detaya pa medio di usa simulacion di clima regional y data di satelite for di aña 2000 te cu 2020.
E investigadornan, basa na China y Tailandia, a haya cu e impacto di Amazon ta cambia cu e temporadanan.
Mas yobida a cay den areanan unda e matanan tabata yen den e temporada muha (december pa februari), segun nan a mira, cu e tera exponi birando mas cayente y causando un fluho di aire cu ta atrae humedad.
Den e temporada seco (juni pa augustus), ora cu matanan tin mester di mas awa, e area cu menos mata a mira un reduccion den evaporacion di vegetacion causando cu menos yobida a cay den un region mas hancho. “Danki na su rol clave den regula clima regional y global, esfuersonan sosteni ta necesario pa proteha loke ta keda di Amazon, ademas di rehabilita e tera cu ya a cuminsa degrada,” e autornan a conclui.
E autornan tambe a enfatisa cu e perdida di mata na Amazon, cual ta frecuentemente causa pa e expansion ilegal di tereno, ta un menasa particular pa cultivo. Aumento di yobida “por empeora e temporada muha su inundacion den cierto region, causando daño na agricultura regional y e economia social,” nan a bisa.
En general, nan a haya cu deforestacion continuo den Amazon “por causa un disminucion den yobida total,” cual ta menasa e bida salvahe, ta haci secura mas intenso y empeora e posibilidad di candela, ademas di reduci e capacidad den absorbe CO2.
Reduccion di yobida regional tambe por resulta den “perdida economico substancial den agricultura.”
Den comentario adhunto publica, Wim Thiery, profesor asocia na Vrije Universiteit na Bruselas, a bisa cu e estudio ta “pionero” y cu investigacion di e tipo aki ta importante pa compronde e interaccion compleho entre deforestacion, cambio di clima y salud di matanan.
Esaki por yuda e investigadornan evalua si Amazon ta yegando e asina yama “tipping point,” cual lo pone e ecosistema crucial na caminda pa bira un ‘savanna’, Thiery a comenta.
Den un estudio publica aña pasa den Nature, un grupo internacional di cientifico a calcula cu entre 10 pa 47% di e Amazon lo ta exponi na e stress combina di calentamento y perdida di mata pa 2050, cual por causa un cambio di ecosistema amplio.
Esaki por causa cu e ecosistema critico lo emiti carbon cu e ta warda, cual na su turno ta empeora calentamento global y su efectonan cu cada biaha ta bira mas intenso.
Securo a impacta e region Amazon for di mita di 2023 te cu 2024, motiva pa cambio di clima causa pa ser humano y e fenomeno El Nino, yudando crea e condicionnan pa candelanan record.
Globalmente, e moda den direccion di destruccion di mata ta siguiendo a pesar di compromiso pa caba e practica pa 2030, segun aña pasa su rapport “Forest Declaration Assesment” di organisacionnan di investigacion, NGO y gruponan defensor.
