Siman pasa mundo a bira un lugar mas peligroso ainda. Ta importante sigui loke ta pasando na nivel internacional pasobra, aunke nos no ta sintiendo un efecto ainda, si cos mester bay seriamente robez den e confrontacion entre Estadonan Uni y e te awe ainda aliadonan Europeo y Canada, nos perspectiva economico por haya cambio radical. Dos evento ta di special interes, no solamente pa nos, sino pa casi henter mundo. Nan ta e sucesonan relaciona cu e guera entre Rusia y Ucrania, y e probable guera economico a base di tarifa di importacion entre Merca, Canada y Mexico, y ademas muy probablemente entre Merca y Union Europeo. Den ultimo siman a bin mas claridad unda e actual gobierno Mericano ta para, y esey ta parce cada vez mas na banda di e dictaduranan mas despreciable di e mundo aki. E voto contra di Merca, hunto cu Rusia, Corea di Norte y China, riba un resolucion di Nacionnan Unipa condena Rusia como e agresor den e guera, a marca historia. Nunca antes den existencia di e organizacion mundial Merca a para na banda di e nacionnan cu ta e actornan principal den mina y ataca e sistema democratico, di cual Estadonan Uni semper tabata e defensor principal. Otro suceso importante tabata e bishita di presidente di Ucrania, na Cas Blanco pa supuestamente caba di acorda un convenio encuanto e recursonan natural di Ucrania, specialmente metal y elemento precioso, a cambio di garantia di suministro di material miitar y apoyo pa termina e guera cu dia 24 di februari ultimo a conclui su tercer aña. Sea ta kere cu e reunion tabata un trampa pa Zelensky of no, e resultado tabata cu e paisnan Europeo a parce di comprende finalmente cu nan mester atende nan propio asunto. Nan ta bisiña di Rusia y gobierno di Trump a laga sa bon cla cu nan no ta continua financiando NATO eternamente.

Mientras cu na Europa mes hopi politico y ciudadano lo ta di acuerdo cu esaki, y lo acepta tambe e consecuencianan di esaki pa dedica mas recurso na e aparato militar, varios pais Europeo ta den problema economico serio, y ademas esunnan di mas peso den e Union. Francia y Alemania entre nan, ademas cu Gran Bretaña, cu a sali di e Union pero no pa mira un rumbo mihor, ta e paisnan clave pa apoyo na Ucrania. E paisnan cerca di Rusia, Polonia, Estonia, Lituania y otronan ta mira e peligro di un Rusia cu intencion expansionista caba y ta preparando pa esey. Generalmente e idea ta cu para Rusia awor ta mas conveniente cu laga Ucrania cay y mester deal cu un Rusia cu hamber pa mas. Europa, incluyendo Hulanda, por ta enfrentandoalgun aña dificil, tambe pasobra no tin tanto perspectiva cu Trump lo yega na logra un paz den e guera, ya cu el a scoge banda di Rusia caba y no lo por hunga e papel di intermediario mas.

Ta imposible mira e sucesonan aki desliga di loke ta pasa na Merca mes. Den algo mas di un luna gobierno di Trump a logra caba cu a cuminza yama nan un ‘regimen’, termino mas tanto reserva pa gobierno autocratico o dictatorial. E cambionan den gobernacion, cu retiro masal di diezmiles di empleado publico y cortamento den presupuesto di un cantidad di programa social tin nan efecto caba den economia. Entre otro por mira cu e eliminacion di subsidionan di cuminda a causa cu e agricultornan pro Trump a keda sin entrada, pasobra ta nan tabata cultiva e alimentonan subsidia aki. Sin cu e medidanan contra otro paisnan ta na vigor ya economia di Merca ta cuminza mustra señal di recesion. Asina mes gobierno Mericano aparentemente tin e firme intencion di continua, despues di un pausa na februari, cu e imposicion di e impuesto di 25% riba Canada y Mexico, probablemente sigui pa un imposicion similar riba tur producto di Union Europeo na april proximo. Di loke por observa den prensa internacional y di medio na Merca, Canada y Europa, e guera ta mustra casi inevitable. Y manera semper, e tipo di guera aki no tin ganador, sigur no e ciudadano consumidor na tur pais. Ta anticipa un inflacion fuerte na Merca, Canada y Mexico, pa e conexion fuerte entre economia di e paisnan aki.

Tur esaki ta bay tin consecuencia pa nos tambe. Gran parti di nos importacion ta bin di Merca y cambio pa otro proveedorno ta facil, ta costa tempo y ademas cu economia global por bay sinti efecto negativo di e guera comercial aki, cu prijs mas halto tur caminda. Recesion na Merca y Canada tin consecuencia tambe pa nos turismo, aunke esey actualmente lo no ta visible ainda. Pero esey ta algo cu nunca nos por controla, no tin manera di scapa di esey. Loke si nos por a controla, pa ta mihor prepara, ta por ehemplo nos dependencia di producto petrolero, entre otro pa genera energia electrico. E desviacion den direccion di gas natural liquido (LNG) envez di sigui traha riba energia renovable a haci cu awor nos no tin nada di gas y energia renovable ta ainda na e nivel di 2008, tempo cu e molinanan di biento a cuminza produci. Menos di 20% di produccion regular ta di bin di energia di biento y solar.Tambe cambio pa vehiculo electrico no a resulta un exito te awor, mientras e distancianan limita riba nos isla ta un bentaha grandi, pasobra no ta necesario un red di distribucion extenso, bo ta charge na cas. Ban spera cu e gabinete nobo dedica atencion na esaki.