Durante un ceremonia militar riba diabierna 28 di februari 2025, den oranan di mainta, Escuadron rotacion 47 a pasa su tareanan pa e siguiente unidad, rotacion 48. E Comandante nobo, Teniente Coronel Kjell procedente di Schaarsbergen, a tuma e comando di Mayor Jan, durante e tradicional traspaso di rema.

Despues di cuater luna intensivo den Region di Caribe, Mayor Jan ta wak back cu orguyo riba e cooperacion y entrenamento di e escuadron Delta “DJOKJA”. “Tabata un oportunidad unico pa train cu nos unidad di arma pisa den e clima tropical aki y pa traha hunto cu CZMCARIB y partnernan local. Nos a siña hopi tocante con pa opera den e condicionnan desafiante di Caribe y con pa adapta den un ambiente nobo.”

Un punto culminante di e periodo aki tabata e ehercicio Caribense DJOKJA. Durante e ehercicio aki tur e habilidadnan di e escuadron a bini hunto den e ambiente special di Caribe. Ehecutando maniobranan tur kaminda riba e isla, e sosten y integracion di inovacionnan tecnico, y e retonan di Corsou su clima y tereno a hacie un experencia sumamente valioso. Mayor Jan a enfatisa e balor di cooperacion den region.

“Ta bisto cu nos no por ehecuta nos tareanan nos so. E sosten y cooperacion cu militarnan di Corsou y partnernan di seguridad local ta di balor incalculabel. E sosten di e poblacion tambe tabata di gran importancia. Mi ta hopi agradecido pa e espacio cu nos a haya pa realisa nos entrenamento. Tabata special pa mira con, a pesar di diferencianan den antecedente y metodonan di trabou, nos por a contribui conhuntamente na seguridad y stabilidad. E periodo aki no solamente a fortifica nos capacidadnan operacional, pero tambe e lasonan cu nos partnernan den Caribe.”

Teniente Coronel Kjell ta anticipa pa trein y traha hunto cu Escuadron 11 di Ingeniero den Caribe a lo largo di e siguiente cuater lunanan. “E escuadron ta provee ​​sosten di combate di ingenieria na e Brigada Aereo Mobil. E ta haci esaki na bienestar di Hulanda mundialmente, bou di tur circunstancia, for di laira y riba tera. Dentro di e Baretnan Cora, e unidad ta un experto den condicionamento di tereno y specialisa den control y uso di explosivo. Normalmente e escuadron ta provee ​​un grupo di ingeniero pa rotacion na un escuadron di infanteria.

Awor e lo tin e oportunidad pa realisa tareanan den Caribe como unidad. Esaki ta special y un oportunidad unico pa e escuadron. Na prome luga, pasobra nos ta trece capacidadnan y recursonan unico cu por ta di gran balor si nos yudansa of asistencia ser pidi den e region. Na di dos luga, e ta un oportunidad unico pa nos train y experimenta den e clima tropical di Caribe. Mi ta anticipa cu nos ta bay tin un periodo hopi interesante, y mi ta spera cu nos por hacie un tempo bunita y significante hunto cu nos partnernan local.”

 

Ehercito Real Hulandes tin un escuadron permanente den Caribe. E unidad aki, comanda pa CZMCARIB, por keda desplega pa un variedad di tarea. Durante e cuater lunanan binidero e escuadron lo train na Aruba, Boneiro y a la bes na Corsou.