(AFP) – Microsoft a anuncia diabierna cu e lo retira Skype, e pionero den yamada y video yamada online cu e titan den tecnologia a adkiri den 2011.
“Cuminsando mei 2025, Skype no lo ta disponibel mas,” un publicacion di Skype support riba X a informa, dirigiendo usuarionan pa instala y haci uso di Microsoft su plataforma Teams pa uso di su servicionan.
Niklas Zennstrom y Janus Friis na Estonia a funda Skype den aña 2003, revolucionando comunicacion di internet pa medio di ofrece yamadanan gratis entre computer y tarifa accesibel pa yamada na celular y telefon di cas.
Durante e añanan, cu e aumento den velocidad di internet, Skype a evoluciona y inclui video yamada, mensahenan, compartimento di documento of files y funcionnan di comunicacion den grupo. Pa aña 2005, Skype a yega un cantidad di 50 miyon usuario registra, demostrando un adopcion global rapido.
Website di subasta online eBay a adkiri Skype den 2005 pa aproximadamente 2.6 biyon dollar, sinembargo e sinergia cu a anticipa no a tuma luga manera a pensa y den 2009, eBay a bende un mayoria di Skype na un grupo di inversionista cu despues a bende esaki na Microsoft.
Den añanan recien, specialmente despues di e yegada di smartphone, Skype no a logra mantene su posicion contra rivalnan nobo manera WhatsApp y Zoom, ademas di Microsoft su propio Teams.
“Nos a siña hopi di Skype.. mientras nos a evoluciona Teams durante e ultimo 7 pa 8 aña,” Jeff Tepper, presidente di Microsoft 365 a conta CNBC.
“Pero nos ta sinti cu awo ta e momento pa motibo cu e por ta hopi mas simpel pa e mercado, pa nos clientenan y nos por trece mas innovacion y mas lihe si nos enfoca solamente riba Teams.
Microsoft a bisa cu yamada den grupo riba Skype lo keda intacto durante e transicion pa Teams, y cu durante un bentana di 60 dia, mensahenan di Microsoft y Teams lo ta interoperabel pa asina bo por manda mensahe na contactonan for di Teams y e mensahenan aki lo yega na usuarionan cu te ainda ta usando Skype.
