Casi tur lector lo un biaha of otro a bin den contact cu medicina cu mester tuma den forma di pildo. E moda aki di duna medicina no a cambia pa mas cu 200 aña. Ehempelnan conoci ta capsula di Paracetamol, Ibuprofen y nos por sigui. Awo danki na conceptonan masha innovativo te hasta pildo por ta kico nan ta yama “Smart”, esta den forma di un mini robot, cu su mesun sensornan, computer chikito y otro formanan di comunicacion.

E promesa di “Smart Pills”, ta uno masha grandi mes, cu por revoluciona diagnostica di malesa, duna medicamento den un forma ultra-personalisa y cu precision di e nivel di mas halto. Den contexto di prijs sumamente atractivo compara cu e standard di awo di opname na hospital y diagnostica dor di specialista.

Smart Pill pa Diagnostica

Na Aruba nos ta conoci cu e screening di cancer di tripa, pa esaki un pashent mester bay te hospital y mester haci testnan diagnostico sumamente fastioso. Awo imagina, si por gewoon tuma un pildo y cu e specialista por haya imagennan en bibo di un hende su tripa of stoma, sin cu mester haci un ingreep sumamente fastioso. Esaki ta e prome promesa di Smart Pills. Cu nan sensorsnan avansa un dokter por haya imagennan en bibo di un hende su stoma of trip, tur esaki mientras tanto e pashent por ta gewoon na cas of trabou. Den e caso aki, si e sensornan y camara detecta un malesa manera inflamacion of cancer, immediatemente e lo manda un signal y e specialista lo wordo alerta di esaki.

Tambe Smart Pills por brinda sumamente mas informacion cu simplemente imagennan, esta di tur sorto stoffen biologico, kimiconan, pH y hopi otro cos cu lo por ta den interes di un screening di stoma & tripa. Tur esaki tambe por wordo combina cu tecnologia avansa di Inteligencia Artificial medico, cu por bin cu un diagnose pa malesa na un nivel cu un dokter humano nunca lo por yega. Den un forma “schaalbaar” y automatisa, pa asina por haci screening di cantidadnan grandi di hende.

Medicina Ultra Personalisa

Nos tur ta diferente y ningun caminda esaki ta mas importante cu den rambo di medicina. Eigenlijk e lo ta masha deseabel si por duna tur hende un dosis y tratamento medico na un nivel ultra-personalisa. Well Smart Pills, ta brinda oportunidadnan grandi pa cu esaki. Usando sensornan avansa cu ta midi tur sorto di meetwaarden medico, e Smart Pill ta duna un dosis di medicina precies cual e pashent lo tin mester. Te hasta tin Smart Pills cu por keda pa mas cu un luna, y cu por duna un dosis di medicina den un manera hopi stabiel cual antes tawata solamente posibel cu un infuus y opname na hospital.

Nos tur sa cu un opname na hospital ta sumamente caro y ta pone hopi presion riba nos sistemanan social, cu e concepto di Smart Pills por reduci cantidad y gastonan di opnames den forma impresionante, mientras tanto cu un pashent ta haya un tratamento na un nivel di precision cual nos no conoce aki na Aruba ainda.

Tambe dor cu tur cos ta wordo midi ‘en bibo’ esta live, si e pashent por ehempel ta bayendo atras, inmediatamente e dokter medico lo wordo alerta y asina por grijp-in hopi mas prome cu kico tawata e standard di cuido di antes.

Fantastic Voyage:

En fin, danki na innovacion electronico y tecnologianan sofistica, tin conceptonan di Smart Pills cu por yuda cu diagnostica y duna tratamento den e forma mas personalisa & precies posibel, tur esaki lo reduci sufrimento humano, hisa e efectividad di tratamento baha e cantidad di complicacion di tratamento, y baha e total di pashent cu mester bay hospital cual lo reduci gastonan medico enormemente.

En berdad e tecnologia ta parce hopi riba e buki di science fiction “Fantastic Voyage” di Isaac Asimov di 1966. Pero den nos caso e ta tecnologianan cu ya caba t’ey. Mi speransa ta cu finalmente nos por wak innovacion berdadero na Aruba, mas pronto cu ta posibel.